پەتروپاۆلداعى وقيعادان كەيىن مەكتەپتەردەگى قاۋىپسىزدىك ماسەلەسى ەرەكشە نازارعا الىنا باستادى.
الماتى ءبىلىم وشاقتارىنداعى بەينەباقىلاۋ، تاۋلىك بويعى كۇزەت، تۋرنيكەت سەكىلدى قاۋىپسىزدىك جۇيەلەرى ەندى زاماناۋي تەحنولوگيامەن تولىقتىرىلدى. دالىرەك ايتقاندا سمارتفونداردا كەڭىنەن تانىمال Face ID جۇيەسى مەكتەپتەردە دە پايدالانىلا باستادى. №34 گيمنازيانىڭ مۇعالىمدەرى تۋرنيكەتتە ورناتىلعان كامەراعا تىكە قاراعاندا عانا مەكتەپكە كىرە الادى، دەپ حابارلايدى Almaty-akshamy.kz 24.kz-كە سىلتەمە جاساپ.
سمارتفوندا كەڭىنەن تانىمال Face ID قاۋىپسىزدىك جۇيەسى بۇل ءبىلىم بەرۋ مەكەمەسىنە قىركۇيەكتە ورناتىلعان. ازىرگە باعدارلاما قىزمەتكەرلەردى عانا تانيدى.
ەگەر اتا-انالار رۇقسات بەرسە، وقۋشىلاردىڭ دا بەت-الپەتىن ەنگىزۋ جوسپاردا بار. سول ارقىلى بالالاردىڭ مەكتەپكە كىرگەن جانە شىققان ۋاقىتى اكە-شەشەلەرىنە سمس ارقىلى حابارلانادى. ازىرگە وقۋشىلار ارنايى كارتا ارقىلى كىرىپ شىعادى ەكەن. گيمنازيانىڭ كىرە بەرىسىندەگى 4 تۋرنيكەتكە 4 Face ID كامەراسى مەن ماگنيتتى كارتانى وقيتىن جۇيە ورنالاستىرىلعان. بارلىق اقپارات ورتالىق كومپيۋتەرگە جۇكتەلىپ وتىرادى.
«ءبىزدىڭ مەكتەپتە 2154 بالا وقيدى، 180 ادام جۇمىس ىستەيدى. ورتالىق كىرە بەرىستەگى «سكۋد» جۇيەسى ءۇش جەردە ورنالاسقان 6 تۋرنيكەتپەن جابدىقتالعان. ءاربىر تۋرنيكەتتەن كىرگەن وقۋشىلاردىڭ كارتاسى ارقىلى كەلگەن جانە كەتكەن ۋاقىتى جازىلىپ وتىرادى»، - دەيدى №34 گيمنازيانىڭ ديرەكتورى رۋستام دجاحانوۆ.
ءبىلىم بەرۋ مەكەمەسىنىڭ مالىمەتىنشە، Face ID جۇيەسى ەڭ جوعارى قاۋىپسىزدىك ساناتىنا جاتادى. وعان قوسىمشا، مەكتەپ اينالاسىنداعى 121 بەينەباقىلاۋ كامەراسىنىڭ 21ء-ى پوليسيا دەپارتامەنتىنىڭ جەدەل باسقارۋ ورتالىعىنا قوسىلعان.
«گيمنازيانىڭ كەشەندى قاۋىپسىزدىك جۇيەسى ارنايى كۇزەت قىزمەتىمەن قامتاماسىز ەتىلگەن. مەكتەپ اۋماعىندا ءۇش كۇزەت پۋنكتى بار، ەكەۋى عيماراتتىڭ ىشىندە. ولار ءار ەكى ساعات سايىن مەكتەپتىڭ ءىشىن جانە اۋماقتى ارالاپ تەكسەرىپ وتىرادى»، - دەيدى №34 گيمنازيانىڭ ديرەكتورى رۋستام دجاحانوۆ.
مەكتەپتەردەگى قاۋىپسىزدىك باستى نازاردا. قازىرگى ۋاقىتقا دەيىن قالا بويىنشا 41 مەكتەپكە Face ID جۇيەسى ورناتىلعان. 98 مەكتەپتە كارتا ارقىلى اشىلاتىن تۋرنيكەت بار. وعان قوسا 214 مەكتەپكە دابىل باتىرماسى جۇمىس ىستەيدى.