اتىراۋ وبلىستىق سوتىندا ءوڭىر اكىمىنىڭ بۇرىنعى ورىنباسارى باقىتگۇل حامەنوۆانىڭ ىسىنە قاتىستى اپەللياسيالىق شاعىم قارالىپ جاتىر، دەپ حابارلايدى Almaty-akshamy.kz.
«بۇگىن، 20 اقپاندا باقىتگۇل حامەنوۆانىڭ ىسىنە قاتىستى اپەللياسيالىق شاعىمدى قاراۋ باستالدى. اپپەلياسيالىق شاعىم وبلىستىق سوتتىڭ قىلمىستىق ىستەر جونىندەگى سوت القاسىندا قارالۋدا»، - دەپ ءمالىم وبلىستىق سوتتىڭ باسپا ءسوز قىزمەتىنەن.
باقىتگۇل حامەنوۆانىڭ ىسىنە قاتىستى سوت وتىرىسى بىلتىرعى 11 تامىزدا باستالعان ەدى. ايىپتاۋ اكتىسى 55 بەتتەن تۇردى.
بىلتىرعى 15 قاراشادا ۇكىم شىعىپ، ول 7 جىلعا سوتتالدى. سوت وبلىس اكىمىنىڭ بۇرىنعى ورىنباسارىن ق ر قىلمىستىق كودەكسىنىڭ 366-بابى 3-بولىگىنىڭ 2-تارماعىمەن (ءىرى كولەمدە پارا الۋ) كىنالى دەپ تانىدى.
«سوت باقىتگۇل حامەنوۆانىڭ قابىلداعان انتتى بۇزۋ ارقىلى قىلمىس جاساعانىن جازانى اۋىرلاتاتىن جاعداي دەپ تانىدى. جەڭىلدەتەتىن ءمان-جاي رەتىندە جاس بالالارىنىڭ بارى ەسكەرىلدى. سوتتالۋشىعا ءومىر بويىنا مەملەكەتتىك قىزمەتتە لاۋازىمداردى اتقارۋعا تىيىم سالۋ، 7 جىل مەرزىمگە باس بوستاندىعىنان ايىرۋ جازاسى تاعايىندالدى. ەكى جاس بالاسىنىڭ بولۋىنا بايلانىستى ق ر قىلمىستىق كودەكسىنىڭ 74-بابى 1-بولىگىنە سايكەس جازانى وتەۋ مەرزىمى 3 جىلعا كەيىنگە قالدىرىلدى»، - دەلىنگەن بولاتىن سوت ۇكىمىندە.
سونىمەن قاتار ب.حامەنوۆا «قۇرمەت» وردەنىنەن ايىرىلدى. ول سوت زالىنان بوساتىلدى.
كەيىن ەكس-شەنەۋنىك سوت ۇكىمىنە اپپەلياسيالىق شاعىم تۇسىرگەن.
«اتىراۋ قالاسىنىڭ №2 سوتىنا ب.حامەنوۆادان، ونىڭ ادۆوكاتى ي.ۆرانچيەۆتان، ۋ.اداموۆ پەن ونىڭ ادۆوكاتى ك.اداموۆادان جانە ا.رىسقالييەۆتىڭ ادۆوكاتى ن.جولبولوۆتان اپەللياسيالىق شاعىمدار تۇسكەنىن حابارلايمىز»، - دەپ حابارلاعان ەدى اتىراۋ وبلىستىق سوتىنىڭ باسپا ءسوز قىزمەتىنەن.