الماتى مەكتەپتەرىندە وقۋشىلارعا بەرىلەتىن تەگىن تاعامداردىڭ ءمازىرى وزگەرۋى مۇمكىن. ءقازىر پيلوتتىق جوبا قولعا الىندى، - دەپ حابارلايدى اlmaty-akshamy.kz Almaty.tv-عا سىلتەمە جاساپ.
دۇرىس تاماقتانباۋ، تەز دايىندالاتىن تاعام تۇرلەرىن ءجيى تۇتىنۋ سوزىلمالى اۋرۋلارعا اكەلەدى. ديەتولوگتاردىڭ ايتۋىنشا، دۇرىس تاماقتانۋدى مەكتەپ قابىرعاسىنان باستاۋ كەرەك. الماتى قالالىق ءبىلىم باسقارماسى "ۇلتتىق سالاۋاتتى تاماقتانۋ" ورتالىعىنىڭ ماماندارىمەن بىرلەسىپ، ارنايى ءمازىر دايىنداپ جاتىر. وندا بالالار ءۇشىن قۇنارلى ءارى ءار ەلدىڭ ۇلتتىق تاعام تۇرلەرى ەنگىزىلمەك.
"الماتى قالاسى بويىنشا 3 مەكتەپتى ەكسپەريمەنت رەتىندە الدىق. مەكتەپتەردە انتروپوتولوگيالىق زەرتتەۋ وتكىزدىك. اتا-انالارمەن كەزدەسىپ، وقۋشىلارعا ترەنينگ وتكىزىلدى. وقۋشىلارمەن بىرگە تاماقتىڭ ساپاسىن انىقتادىق"، – دەدى الماتى سەرۆيستىك قىزمەت كورسەتۋ كوللەدجىنىڭ ديرەكتورى ەرۇلان قاراعۇلوۆ.
جاڭا مازىردەگى تاعام تۇرلەرى مۇعالىمدەر مەن اتا-انالارعا جانە ساراپشى ماماندارعا ۇسىنىلدى. ولار تاعامنىڭ قۇنارلىعى مەن دامىنە باعا بەرىپ، ۇسىنىس-تىلەگىن جەتكىزدى. كوپتىڭ كوڭىلىنەن شىقسا، الداعى ۋاقىتتا وسى ءمازىر مەگاپوليستەگى بارلىق مەكتەپكە ەنگىزىلۋى مۇمكىن.
ايتا كەتەيىك، بۇل – ازىرگە تەك پيلوتتىق جوبا.
"بارلىق تاماقتار وتە ۇنادى، بالالارعا پايدالى. سۇزبەلەرى دە ۇنادى. بالالارىم ءسۇيسىنىپ، تامسانىپ جەدى. اسحاناعا وسىنداي ۇلتتىق تاماقتاردى ەنگىزسە دەيمىن. ەشقانداي شاعىم جوق. ءبىراق كوكونىستەردى كوبىرەك قوسسا دەيمىن"، – دەدى اتا-انا ديليرا امانيلوۆا.
بۇگىن كوپشىلىككە ۇسىنىلعان تاعام تۇرلەرى ناقتى بەكىتىلگەن ءتىزىم ەمەس. زەرتتەۋ جۇمىستارى مامىرعا دەيىن جالعاسادى. ول ءۇشىن وزگە دە مامانداردىڭ پىكىرى تىڭدالىپ، شەتەلدىك ادىستەمەلەر قولدانىلىپ كورمەك. جاڭا مازىرگە ەنگىزىلگەن تاعام تۇرلەرىن الماتىداعى سەرۆيستىك قىزمەت كورسەتۋ كوللەدجىنىڭ ۇستازدارى دايىندايدى.
"جاڭادان دايىندالعان ءمازىر تىزىمىندە بالىق تا بار. ونىڭ بالالار ءۇشىن پايداسى كوپ. قۇرامى ومەگا، يود پەن ءتۇرلى دارۋمەندەرگە تولى. سونداي-اق ىرىمشىك پەن سۇزبە سەكىلدى ءسۇت ونىمدەرىمەن تولىقتىردىق. ولار قۇنارلى بولىپ كەلەدى. ءمازىردى دايىنداۋ كەزىندە بارلىق تاراپتىڭ وي-پىكىرى ەسكەرىلدى"، – دەدى ديەتولوگ ۆەرونيكا يۆانوۆا.
بۇگىندە الماتىداعى مەملەكەتتىك ءبىلىم بەرۋ ۇيىمدارىندا 134 مىڭنان استام وقۋشى تەگىن تاماقپەن قامتىلعان. ءبىر بالانىڭ كۇندىك تاعام باعاسى ورتاشا ەسەپپەن 830 تەڭگە.