الماتىدا ءبىلىم بەرۋ مەكەمەلەرىنىڭ قاۋىپسىزدىگى مەن سيفرلانۋىن قامتاماسىز ەتۋدى كوزدەيتىن ءۇش جىلدىق اۋقىمدى باعدارلاما اياقتالدى. بۇگىنگى كۇنى قالاداعى بارلىق مەملەكەتتىك مەكتەپ (216) پەن بالاباقشا (196) كەشەندى قاۋىپسىزدىك جۇيەسىمەن جابدىقتالعان.
بۇل جۇيەگە بەينەباقىلاۋ، دابىل تۇيمەلەرى، كىرىپ-شىعۋدى باقىلايتىن جۇيەلەر مەن ءورت دابىلى كىرەدى. وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا قالالىق ءبىلىم باسقارماسىنىڭ باسشىسى سايران سايفەدەنوۆ وسىلاي دەدى.
ءبىلىم بەرۋ مەكەمەلەرىنە بارلىعى 21 106 سيفرلىق بەينەكامەرا ورناتىلدى، ونىڭ 12 450ء-ى مەكتەپتە، 8 656-سى بالاباقشادا ورنالاسقان. بارلىق نىساندارعا بىر-بىردەن 412 دابىل تۇيمەسى قويىلعان. مەكتەپكە كىرىپ-شىعۋدى باسقاراتىن، باقىلايتىن جۇيە ەنگىزىلسە، بالاباقشالارعا دوموفون ورناتىلدى. سونىمەن قاتار، ءار نىساندا ءورت دابىلى جۇيەسى دە جۇمىس ىستەيدى.
پرەزيدەنتىمىزدىڭ «ادىلەتتى قازاقستان: ءبارىمىز جانە ءارقايسىمىز ءۇشىن. ءقازىر جانە ءاردايىم» اتتى سايلاۋالدى باعدارلاماسىن جۇزەگە اسىرۋ اياسىندا، 2025 جىلعا قاراي الماتىدا جان باسىنا قارجىلاندىرۋ ەسەبىنەن 75 جاڭا پاندىك كابينەت (حيميا، فيزيكا، بيولوگيا، STEM جانە روبوتوتەحنيكا) ساتىپ الۋ جوسپارلانعان. 2025 جىلعى 4 تامىزدا 41 كابينەت تولىق جەتكىزىلىپ، پايدالانۋعا بەرىلگەن، 24 كابينەتتى جەتكىزۋ جاعى قولعا الىندى، 10 كابينەت بويىنشا بايقاۋ راسىمدەرى ءوتىپ جاتىر.
ءقازىر الماتىنىڭ 216 مەكتەبى 1 095 مامانداندىرىلعان پاندىك كابينەتتەرمەن جابدىقتالعان، ولاردىڭ 991ء-ى جاڭارتىلعان ۇلگىدەگىسى. بۇل جالپى سانىنىڭ 90،5%-ى دەگەن ءسوز. الماتى وسى جاعىنان باسقا وڭىرلەردىڭ اراسىندا كوش باسىندا كەلە جاتىر.
بارلىق مەكتەپر جىلدام ينتەرنەتپەن قامتىلعان. وپتيكالىق-تالشىقتى بايلانىس جەلىسىنىڭ (وتبج) ارقاسىندا 216 مەكتەپتىڭ ءارقايسىسى سەكۋندىنا 100 مبيت جىلدامدىقپەن جەلىگە كىرە الادى. ينتەرنەت قاۋىپسىزدىگىن ارتتىرۋ ماقساتىندا CGNAT (Carrier-Grade Network Address Translation) جۇيەسى ەنگىزىلدى. بۇل جۇيە تىيىم سالىنعان، تەرروريستىك جانە باسقا دا قاجەتسىز رەسۋرستارعا كىرىپ-شىعۋدى شەكتەۋگە مۇمكىندىك بەرەدى.
مەكتەپتەر مەن بالاباقشالاردا قاۋىپسىزدىكتى، سيفرلاندىرۋدى جانە تەحنولوگيالىق جاڭعىرتۋدى قامتاماسىز ەتۋدىڭ كەشەندى ءتاسىلى ءقاۋىپسىز جانە تەحنولوگيالىق ءبىلىم بەرەتىن ورتا قۇرىپ جاتقان الماتىنى بۇكىل ەل بويىنشا الدىڭعى قاتارداعى قالالاردىڭ بىرىنە اينالدىرىپ وتىر.