كەي ادام ءۇشىن جانۋارلار جاي عانا سۇيىكتى سەرىك ەمەس، ولار وتباسىنىڭ ءبىر مۇشەسى. ولارعا قامقورلىق جاساپ، بىرگە سەرۋەندەپ، ويناتادى. سوندىقتان ساپارعا شىققاندا بىرگە الىپ شىعۋى دا زاڭدى قۇبىلىس. ساياحاتتىڭ تىنىش ءارى جايلى ءوتۋى ءۇشىن الدىن الا جانۋارىڭىزدىڭ قاۋىپسىزدىگى مەن قولايلى جاعدايىن ويلاستىرعان ءجون.
جانۋارلاردى الىپ ءجۇرۋدىڭ جالپى ەرەجەلەرى
جانۋاردى جابىق كولىكتە قالدىرماڭىز. قىزىپ كەتۋ نەمەسە توڭۋ بىرنەشە مينۋتتىڭ ىشىندە ورىن الۋى مۇمكىن.
جانۋاردى سالوندا ەركىن ءجۇرىپ-تۇرۋىنا جول بەرمەڭىز. بۇل جۇرگىزۋشىگە جانە وعان ءقاۋىپتى.
ارنايى تور، قاۋىپسىزدىك بەلدىگى نەمەسە قوسىمشا قۇرالداردى پايدالانىڭىز. بۇل كەنەت تەجەگىشتى باسقان جاعدايدا جاراقات الۋ ءقاۋپىن ازايتادى.
جايلى ورتا قالىپتاستىرىڭىز. اۋەن، جارىق پەن يىستەردىڭ بولماۋى جانۋاردىڭ مازاسىزدانۋىن تومەندەتەدى.
تەمپەراتۋرا مەن جەلدەتۋدى قاداعالاڭىز. سالوندا ىستىق تا، سۋىق تا بولماۋى ءتيىس - تەك جايلى ميكروكليمات.
پايدالى كەڭەس: ساپارعا شىعاردان بىرنەشە كۇن بۇرىن جانۋارىڭىزدى تاسىمالداۋ تورىنا نەمەسە كولىككە ۇيرەتىپ الىڭىز. ول ءيىسىن تانىپ، ءوز ورنىن ءقاۋىپسىز مەكەن رەتىندە قابىلداسىن.
🐕 يتتەر
ۇزاق ساپاردا ءار 2–3 ساعات سايىن ايالداما جاساپ، جانۋارعا سەرۋەندەپ، قاجەتىنە بارۋعا مۇمكىندىك بەرىڭىز.
ەڭ قولايلىسى ءيتتى تاسىمالداۋ تورىندا نەمەسە سالونمەن جالعاسقان جۇكسالعىشتا الىپ ءجۇرۋ.
يت قۇسۋعا بەيىم بولسا، ابسوربسيالىق جورگەكتەر مەن سۋلىقتاردى الدىن الا دايىنداپ قويىڭىز.
ىستىق كۇندەرى يتكە سۋ قاجەت: ارنايى قۇتى مەن ىڭعايلى توستاعاندى ۇمىتپاڭىز.
🐈 مىسىقتار
مىسىقتارعا قاتتى نەمەسە ماتا تورلارى بار ارنايى تاسىمالداعىش وتە قولايلى.
ىشىنە تانىس ويىنشىق نەمەسە يەسىنىڭ ءيىسى سىڭگەن كورپە سالىپ قويساڭىز، جانۋار ءوزىن جايلى سەزىنەدى.
مىسىق قاتتى ۇرەيلەنسە، باۋ تاعىپ، قولىڭىزعا ۇستاۋعا بولادى. ءبىراق تەك ءسىز كولىك جۇرگىزبەگەن جاعدايدا.
🦜 قۇستار
كادىمگى توردىڭ ورنىنا اۋا كىرەتىن تەسىكتەرى بار جەڭىل قوراپ نەمەسە كونتەينەر پايدالانعان دۇرىس.
قىستا توڭىپ قالماۋىنا، ال جازدا قىزىپ كەتپەۋىنە نازار اۋدارىڭىز. ەڭ قولايلى تەمپەراتۋرا – 20-25 C.
قۇستى تىنىشتاندىرۋ ءۇشىن قورابىن نەمەسە تورىن جەڭىل ماتامەن بۇركەپ قويىڭىز، ءبىراق اۋا الماسۋى ساقتالۋى ءتيىس.
🐹 كەمىرگىشتەر
الامان، ەگەۋقۇيرىق جانە تەڭىز دوڭىزىن پلاستيك تاسىمالداعىشتا، ىشىندە ازىعى مەن سۋى بار كۇيدە الىپ جۇرگەن دۇرىس.
توردى تەرەزە جانىنا قويماڭىز. كۇننىڭ ساۋلەسى مەن جەل زيان كەلتىرەدى.
ىستىقتا جانۋاردى سالقىنداتۋ ءۇشىن دىمقىل مايلىقتى پايدالانىڭىز.
🦎 باۋىرىمەن جورعالاۋشىلار مەن قوسمەكەندىلەر
جىلان مەن كەسىرتكەگە ارنايى ماتادان تىگىلگەن قاپ نەمەسە پلاستيك كونتەينەر ىڭعايلى.
قوسمەكەندىلەرگە (باقا، تريتون) ىلعالدى ورتا قاجەت، سوندىقتان كونتەينەر تۇبىنە دىمقىل مايلىق نەمەسە سۋلانعان قاعاز توسەۋ كەرەك.
نەگىزگى تالاپ – تۇراقتى تەمپەراتۋرا: باۋىرىمەن جورعالاۋشىلار كەنەت وزگەرىستەردى كوتەرە المايدى.
شاعىن لايفحاك: ساپارعا شىققاندا ءارقاشان جانۋارىڭىزعا ارنالعان شاعىن «جول ءدارىقوبديشاسىن» الىڭىز. العاشقى كومەككە قاجەت قۇرالدار مەن جول بويىنداعى ەڭ جاقىن ۆەتەرينارلىق كلينيكانىڭ بايلانىس نومىرلەرىن جازىپ قويىڭىز.