بيىل Almaty Marathon ون ءتورتىنشى رەت ءوتىپ جاتىر. تارتىستى دوداعا 60-تان اسا ەلدەن كەلگەن 16 مىڭ ادام قاتىسىپ، ب ا ق سىناپ جاتىر.
قاتىسۋشىلاردىڭ قاۋىپسىزدىگىن پوليسيا، دارىگەرلەر مەن ۇيىمداستىرۋشىلار قامتاماسىز ەتتى. اتاپ ايتقاندا، 13 مەديسينالىق پۋنكت ورناتىلىپ، 12 جەدەل جاردەم كولىگى، 10 ۆەلودارىگەر جانە شامامەن 90 مەديسينالىق ەرىكتى كەزەكشىلىك اتقاردى.
كاسىبي سپورتشىلاردان باستاپ، سالاۋاتتى ءومىر سالتىن ۇستاناتىن اۋەسقويلار وزدەرىن سىناپ كورۋ ماقساتىندا جانە قازاقستانداعى جۇگىرۋ قوزعالىسىن دامىتۋعا ۇلەس قوسۋ ءۇشىن 10-نان 42،2 كيلومەترگە دەيىنگى قاشىققا شىقتى.
تاڭ اتىسىمەن قالانىڭ ورتالىق كوشەلەرىندە ادەتتەگىدەن وزگەشە كورىنىس. ەنەرگياعا تولى مۋزىكا، كوڭىلدى ەرىكتىلەر مەن قاتىسۋشىلاردىڭ كۇلىمسىرەگەن جۇزدەرى مەرەكەلىك اتموسفەرانى ودان ءارى جانداندىردى. مارافون تەك سپورتتىق جارىس قانا ەمەس، ول – بىرلىك، رۋح جانە سالاۋاتتى بولاشاققا ۇمتىلۋدىڭ سيمۆولى.
الماتىدا وتكەن مارافونعا شەتەلدەن كەلگەن قاتىسۋشىلار دا بار.
«مەن فيليپپيننەن كەلدىم جانە بۇگىنگى الماتىداعى مارافونعا قاتىسۋ مەن ءۇشىن ۇلكەن قۋانىش بولدى. بۇل كەرەمەت تاجىريبە! بارلىق قاتىسۋشىنىڭ جىگەرى مەن ىنتاسى مەنى قاتتى تاڭعالدىردى. مارافون ارقىلى ادامداردىڭ سپورتقا دەگەن سۇيىسپەنشىلىگىن جانە بىر-بىرىنە قولداۋ كورسەتەتىنىن كورىپ، شابىت الدىم. وسىنداي ءىس-شارالارعا قاتىسۋ ارقىلى دەنساۋلىققا كوڭىل ءبولۋ جانە جاڭا دوستار تابۋ مۇمكىندىگىن جوعارى باعالايمىن. الماتى مارافونى – شىنىمەن ەرەكشە، ەستە قالارلىق وقيعا، – دەدى فيليپپيندىك ارۋ دجونا فلورريدو.
«الاتاۋ اقپارات» مەدياحولدينگىنىڭ «ۆەچەرنيي الماتى» گازەتىنىڭ ءجۋرناليسى ايگۇل كولۋمبەتوۆا ەكىنشى رەت 10 شاقىرىم جۇگىرىپ شىقتى. ول حولدينگتىڭ سپورت جەتىستىكتەرى قورجىنىنا تاعى دا مەدال قوسىپ، مارافونعا قاتىسۋ ونىڭ ءداستۇرى مەن شابىت كوزىنە اينالعانىن اتاپ ءوتتى.
«مەن ءۇشىن مارافونعا قاتىسۋ جاي عانا سپورت ەمەس. بىلتىر العاش رەت باعىمدى سىناپ كوردىم، ال بيىل قاتارىنان ەكىنشى رەت مارەگە شىعىپ، تاعى دا مەدال الىپ وتىرمىن. بۇل مەنى العا ۇمتىلۋعا شابىتتاندىرادى جانە جىگەر بەرەدى».
استانا قالاسىنان كەلگەن ايدانا ۋتەنيازوۆا مارافونعا ەكىنشى رەت قاتىسىپتى.
«ەكىنشى رەت قاتىسقان بايقاۋعا بۇكىل دوستارىمدى شاقىردىم. دايىندىعىم از بولسا دا، بويىمداعى ەنەرگيا مەن تولقۋدى سوزبەن ايتىپ جەتكىزۋ مۇمكىن ەمەس»، – دەدى.
سكانديناۆيالىق جاياۋ جۇگىرۋ قاتىسۋشىلارىنىڭ ءبىرى دينا كاريبايەۆا سالاۋاتتى ءومىر سالتىن ۇستانۋ كەرەك ەكەنىن جەتكىزدى.
«سكانديناۆيالىق جاياۋ جۇگىرۋگە ەكىنشى رەت قاتىسىپ وتىرمىن. ءبىرىنشى رەت وتكەن جىلى بولدى. سالاۋاتتى ءومىر سالتىن ۇستانامىن، ءوزىم دارىگەرمىن. Almaty Marathon-عا دوسىممەن بىرگە كەلدىم»، – دەدى.
رامينا سايداليموۆا، بايقاۋعا قاتىسۋشى:
«باستى ماقساتىم – جەڭىس ەمەس، ءبىر تەمپتە جۇگىرىپ، دەنساۋلىعىمدى جاقسارتۋعا كۇش سالۋ. ءبىراق مەدالدى جەڭىپ السام، بۇل مەن ءۇشىن زور جەتىستىك بولار ەدى»، – دەدى.
تراسسا بويىنداعى كورەرمەننىڭ قولداۋى كەرەمەت بولدى. جانكۇيەرلەر جۇگىرۋشىلەردى جىگەرلەندىرىپ، بارلىعىنا شابىت بەرەتىن اتموسفەرا سىيلادى.
Almaty Marathon – 2025 تاعى دا ورتالىق ازياداعى ەڭ ءىرى جۇگىرۋ الاڭى ەكەنىن دالەلدەدى. ۇيىمداستىرىلۋ جۇمىستارى جوعارى دەڭگەيدە ءوتىپ، بارلىق قاتىسۋشى قاۋىپسىزدىك پەن جايلىلىقتى سەزىندى.
