2025 جىلى 23-27 شىلدە ارالىعىندا الماتىدا قالا اكىمدىگىنىڭ قولداۋىمەن III حالىقارالىق سيرك ونەرى فەستيۆالى — ALMATY CIRCUS FESTIVAL ءوتتى. فەستيۆالگە الەمنىڭ 15 ەلىنەن كەلگەن ارتيستەر قاتىسىپ، ۇزدىك سيرك قويىلىمدارىن ۇسىندى.
فەستيۆال شىمىلدىعى قالا اكىمى دارحان ساتىبالدىنىڭ قۇتتىقتاۋ سوزىمەن اشىلدى. قالا باسشىسى سيرك مەرەكەسىنە جينالعانداردى قۇتتىقتاپ، الماتىنىڭ ونەر مەن مادەنيەت ءۇشىن اشىق الاڭ ەكەنىن جانە حالىقارالىق مادەني بايلانىستىڭ ماڭىزىن اتاپ ءوتتى. بۇل قۇتتىقتاۋ اۋقىمدى فەستيۆالدىڭ رەسمي باستاۋىن ءبىلدىردى.
فەستيۆال اياسىنداعى ەڭ جارقىن ساتتەردىڭ ءبىرى قازاق مەملەكەتتىك سيركىنىڭ «Hassak» توبىنىڭ ونەرى بولدى. ارتيستەر الەمدە بۇرىن-سوڭدى قايتالانباعان ەرەكشە تريۋكتى ورىندادى: توپ مۇشەلەرى ماڭدايمەن ءبىر مەزگىلدە ءۇش ادامدى كوتەرىپ، وتكەل باسپالداعىمەن ءجۇرىپ ءوتتى. جالپى سالماعى شامامەن 180 كەلى بولاتىن بۇل رەكوردتىق ءنومىر حالىقارالىق قازىلار تاراپىنان جوعارى باعالانىپ، Hassak ۇجىمى فەستيۆالدىڭ باس جۇلدەسىن يەلەندى.
ونەرپازدار جەڭىسىن قازاق مەملەكەتتىك سيركىنىڭ 55 جىلدىعىنا جانە وتاندىق سيرك ونەرىنىڭ نەگىزىن ساڭلاقتارعا ارنادى.
ۇيىمداستىرۋشىلاردىڭ ايتۋىنشا، ءۇش جىل ىشىندە ALMATY CIRCUS FESTIVAL الماتىنىڭ عانا ەمەس، بۇكىل ايماقتىڭ ماڭىزدى مادەني وقيعاسىنا اينالدى. فەستيۆال الەمدەگى ەڭ ءىرى ون سيرك فورۋمىنىڭ قاتارىنا كىرىپ ۇلگەردى. بيىل رەسەي، جۇڭگو، ۋكراينا، ۆەتنام، يزرايل، ياكۋتيا جانە ت.ب. ەلدەردەن بارلىعى 20 مەملەكەتتەن 180-نەن استام ءوتىنىم كەلىپ ءتۇستى.
بايقاۋ باعدارلاماسىندا اۋە گيمناستارى، ەكۆيليبريستتەر، اكروباتتار مەن ەرەكشە جانر ارتيستەرى ونەرىن پاش ەتتى. كوپتەگەن قويىلىم العاش رەت كورەرمەن كورسەتىلىپ، كوپشىلىكتىڭ ىستىق ىقىلاسىنا بولەندى.
فەستيۆالدىڭ ەرەكشە قوناعى الەمدەگى ەڭ تانىمال سايقىمازاقتاردىڭ ءبىرى بولدى. ونىڭ اسەرلى قويىلىمى كورەرمەنگە كوتەرىڭكى كوڭىل كۇي سىيلاپ، باعدارلامانىڭ ەڭ ەستە قالارلىق ساتتەردىڭ بىرىنە اينالدى.
ايتا كەتەيىك، بيىل فەستيۆال جەڭىمپازدارى مەن جۇلدەگەرلەرىنىڭ قاتىسۋىمەن 2-24 تامىز ارالىعىندا الماتىدا گالا-كونسەرتتەر وتەدى. لاۋرەاتتاردىڭ تولىق ءتىزىمى قازاق مەملەكەتتىك سيركىنىڭ رەسمي پاراقشاسىندا جاريالانعان.