ارحيتەكتۋرا، ديزاين جانە ينجەنەريا كوللەدجى ەڭبەك نارىعىنىڭ زاماناۋي تالاپتارىن ەسكەرە وتىرىپ، ءبىلىم بەرۋ باعدارلامالارىن جەتىلدىرۋدى جالعاستىرۋدا. 2025 جىلعى «جۇمىسشى ماماندىقتار جىلىنا» سايكەس كوللەدجدە ەكى جاڭا باعىت اشىلادى، دەپ حابارلايدى aqshamnews.kz
ءبىرى – عيماراتتاردى جوبالاۋدىڭ جانە پايدالانۋدىڭ اۆتوماتتاندىرىلعان جۇيەلەرى (BIM-تەحنولوگيالار) بولسا، ەكىنشىسى – ليفت شارۋاشىلىعى مەن ەسكالاتورلار. بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا كوللەدج ديرەكتورى كامال جامانگوزوۆ مالىمدەدى.
ونىڭ ايتۋىنشا، حالىقارالىق ستاندارتتارعا سايكەس قايتا دايارلاۋ جانە بىلىكتىلىكتى ارتتىرۋ باعدارلامالارىن قۇرۋ بويىنشا قوسىمشا جۇمىستار جۇرگىزىلۋدە. 2025 جىلدىڭ قاڭتارىندا قىتايدىڭ يۋبەي ءبىلىم بەرۋ ورتالىعىمەن ىنتىماقتاستىق تۋرالى مەموراندۋمعا قول قويىلدى، بۇل ستۋدەنتتەر مەن وقىتۋشىلارعا تاجىريبە الماسۋ جانە تاعىلىمدامادان ءوتۋ ءۇشىن جاڭا مۇمكىندىكتەر اشادى.
«جاس مامان» جوباسىنىڭ ارقاسىندا كوللەدج قۇنى 170 ميلليون تەڭگەدەن استام زاماناۋي قۇرال-جابدىقتارعا يە بولدى. 2023 جىلى «تەحنونيكول» قۇرىلىس اكادەمياسىمەن بىرلەسىپ، 120 ميلليون تەڭگە ينۆەستيسيا تارتىلعان حالىقارالىق قۇزىرەت ورتالىعى اشىلدى.
«تەحنونيكول» كومپانياسى جىل سايىن وقۋ پروسەسىنە قاجەتتى شىعىن ماتەريالدارىنا شامامەن 12 ملن تەڭگە بولەدى. ورتالىق اشىلعاننان بەرى 2320 ادام قىسقامەرزىمدى وقۋدان ءوتتى، ال 2025 جىلى كەمىندە 2600 مامان دايارلاۋ جوسپارلانىپ وتىر.
سونداي-اق «جۇمىسشى ماماندىقتارى جىلى» اياسىندا كوللەدجدە OXYPROP (جۇڭگو)، Flugger (دانيا) جانە Vetonit (فرانسيا، Saint-Gobain كونسەرنى) حالىقارالىق برەندتەرىمەن بىرلەسكەن سىرلاۋ ءىسى مەكتەبىن اشىلدى. . قازىرگى ۋاقىتتا Saint-Gobain كومپانياسىمەن قۇرىلىس تەحنولوگيالارى سالاسىندا قۇزىرەتتىلىك ورتالىعىن قۇرۋ بويىنشا كەلىسسوزدەر جۇرگىزىلۋدە.