ارحيتەكتۋرا، ديزاين جانە ينجەنەريا كوللەدجى «جۇمىسشى ماماندىقتار جىلى» باستاماسىنا بەلسەندى قاتىسىپ، زاماناۋي ءبىلىم بەرۋ تەحنولوگيالارى مەن ادىستەمەلەرىن ەنگىزۋدە.
ستۋدەنتتەردىڭ ءبىلىمىن باعالاۋدىڭ اشىقتىعى مەن وبەكتيۆتىلىگىن ارتتىرۋعا مۇمكىندىك بەرەتىن ECVET (كاسىپتىك ءبىلىم بەرۋگە ارنالعان كرەديتتەردىڭ ەۋروپالىق جۇيەسى) ءادىسناماسى بويىنشا باعالاۋدىڭ بالدىق-رەيتينگتىك جۇيەسى ەنگىزىلدى. بۇل تۋرالى كوللەدج ديرەكتورى كامال جامانگوزوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ايتتى، دەپ حابارلايدى aqshamnews.kz.
سپيكەردىڭ ايتۋىنشا، كوللەدج ستۋدەنتتەرى WorldSkills، JasSkills جانە پروفماستەروك چەمپيوناتتارىنا تۇراقتى تۇردە قاتىسىپ، جوعارى دايىندىق دەڭگەيىن كورسەتۋدە. سونىمەن قاتار، بيزنەستىڭ قولداۋىمەن تالىمگەرلىك جانە ءدۋالدى وقىتۋ جۇيەسى ەنگىزىلىپ، بۇل تۇلەكتەردىڭ ءبىلىم ساپاسىن جانە جۇمىسقا ورنالاسۋ دەڭگەيىن ارتتىرۋعا ىقپال ەتۋدە.
كوللەدجدە تالانتتى ستۋدەنتتەردى قولداۋ باعدارلاماسى ىسكە اسىرىلىپ، ونىڭ اياسىندا اتاۋلى ستيپەنديالار تاعايىندالادى جانە حالىقارالىق تاعىلىمدامالار ۇيىمداستىرىلادى. 2023-2024 جىلدارى 20 وقىتۋشى شەتەلدىك بىلىكتىلىكتى ارتتىرۋ كۋرستارىنان ءوتتى، ال 2025 جىلى تاعى 10 تاعىلىمدامادان ءوتۋ جوسپارلانعان.
وقۋ ورنىنىڭ الداعى جوسپارلارىنا تۇركيا جانە قىتايدىڭ ءبىلىم بەرۋ ورتالىقتارىمەن حالىقارالىق ىنتىماقتاستىقتى كەڭەيتۋ جانە انا تىلىندە وقىتاتىن ماماننىڭ كومەگىمەن «تۇرىك ءتىلىن ۇيرەنەمىز» جوباسىن ىسكە قوسۋ كىرەدى.
«ءبىز تەك بىلىكتى مامانداردى دايارلاۋمەن عانا شەكتەلمەي، ولار ءۇشىن حالىقارالىق دەڭگەيدە كاسىبي ءوسۋ مۇمكىندىكتەرىن جاساۋعا ۇمتىلامىز»، – دەپ اتاپ ءوتتى كامال جاماگوزوۆ.
كوللەدج ءبىلىم بەرۋ ۇدەرىسىنە ينۆەستيسيا تارتۋدى، ءدۋالدى وقىتۋ مەن كاسىبي باعدار بەرۋ جۇمىستارىن دامىتۋدى جالعاستىرۋدا. جاقىن جىلدارى ساندىق قۇرىلىس جانە ەنەرگيا ۇنەمدەۋ تەحنولوگيالارى بويىنشا جاڭا باعىتتار اشۋ، سونداي-اق Saint-Gobain كومپانياسىنىڭ قولداۋىمەن قۇرىلىس سالاسىنا ارنالعان قۇزىرەتتىلىك ورتالىعىن قۇرۋ جوسپارلانىپ وتىر.