الماتىدا «الماتى جازى» اكسياسى اياسىندا سۋبۇرقاقتار، وزەن جاعالاۋلارى، سۋ ايدىندارى، جول ينفراقۇرىلىمى، ارىق جەلىلەرى تازارتىلىپ، اعاشتار سانيتارلىق ماقساتتا كەسىلدى.
26 ماۋسىم مەن 6 شىلدە ارالىعىندا كوممۋنالدىق كاسىپورىندار مەن مەردىگەرلىك ۇيىمدار شاھارداعى بارلىق 150 سۋبۇرقاق تازارتىلىپ، رەتكە كەلتىرىلدى. جابدىقتاردى تەكسەرۋ جانە ارنايى قۇرالداردى قولدانا وتىرىپ توستاعاندى جۋۋ، ينجەنەرلىك كوممۋنيكاسيالىق جەلىلەردى وڭتايلاندىرۋ بويىنشا جۇمىس تولىق ورىندالدى، كابەلدەر اۋىستىرىلدى، سورعىلار مەن قوزعالتقىشتار جوندەلدى، سۋبۇرقاقتاردىڭ گيدرويزولياسياسى تەكسەرىلدى، دەپ حابارلايدى اlmaty-akshamy.kz. 
اكسيا بارىسىندا قتق تولىقتاي جينالىپ، شىعارىلدى. جۇمىسقا 171 بىرلىك مامانداندىرىلعان تەحنيكا جۇمىلدىرىلدى، 21 قوقىس شىعارۋشى ۇيىم قالدىق شىعارۋ قىزمەتىن ۇسىندى. «الماتى جازى» اكسياسى كەزىندە قالا اۋماعىنان بارلىعى 15 مىڭ توننادان استام قوقىس شىعارىلدى.
1 454 كونتەينەرلىك الاڭ سانيتارلىق وڭدەۋدەن ءوتىپ، 24 747 كوشە جانە اۋلانىڭ قوقىس جاشىكتەرى تازارتىلدى، 105 كونتەينەردى جوندەلىپ، سىرلاندى.
5 مىڭنان استام ارنايى تەحنيكا جول بويى مەن تروتۋارلاردى، سونداي-اق اۋلا اۋماعىن سىپىرۋعا جۇمىلدىرىلعان. نوسەر كارىزدەرى تازارتىلدى، 5 567 اۋلا ۋچاسكەسى سىپىرىلىپ، قوقىستان تازارتىلدى.
تازالىق پەن ءتارتىپ ساقتاۋ ماقساتىندا قالا كوشەلەرىندە 798-دەن استام ايالداما كەشەنى، 122 باعدارشام نىسانى مەن 3 181 جول بەلگىسى جۋىلدى.
كۇن سايىن مەردىگەر ۇيىمدار ارىق جەلىلەرىنەن 250 تەكشە مەتر قوقىس شىعاردى. «الماتى تازالىق» مكك-مەن بىرلەسىپ، ارىقتى تازارتۋعا 6 مەردىگەر ۇيىم جۇمىلدىرىلدى. 54 بىرلىك ارنايى تەحنيكا مەن 700-دەن استام جۇمىسشى كۇندەلىكتى ناۋقانعا اتسالىستى.
كىشى الماتى، ەسەنتاي، ۇلكەن الماتى، قارعالى، بورالداي، جاربۇلاق، تىكساي وزەنى جانە ۇلكەن الماتى كانالىنىڭ اۋماعىنان قوقىس جينالدى. جالپى ۇزىندىعى 52 كم ارنا تازارتىلدى. 460 ادام جانە 52 ارنايى تەحنيكا كۇندەلىكتى تازالىق جۇمىستارىنا جۇمىلدىرىلدى.
الماتى قالاسى اكىمدىگىنىڭ ەرەكشە باقىلاۋىنداعى جاسىل جەلەك تولىقتاي قالالىق كەلبەتتىڭ ماڭىزدى بولىگى بولىپ تابىلادى. «الماتى جازى» اكسياسى اياسىندا مەردىگەر ۇيىمدار تۇرعىنداردىڭ قاۋىپسىزدىگىن قامتاماسىز ەتۋ ءۇشىن اپاتتى جاعدايداعى جانە قۋراعان 6 مىڭ اعاشتى سانيتارلىق ماقساتتا كەستى.
الماتى قالاسىنىڭ جاسىل جەلەگىن كۇتىپ-ۇستاۋ جانە قورعاۋ ەرەجەسىنە سايكەس، اعاشتىڭ پىشىنىنە، ولاردىڭ جاسىنا قاراي وزگەرەتىنە، كەسۋگە توزىمدىلىك سىندى وسىمدىكتەردىڭ تۇرلىك جانە بيولوگيالىق ەرەكشەلىگىن ەسكەرە وتىرىپ، بارلىق نورما ساقتالىپ سانيتارلىق ماقساتتا كەسىلەدى. سانيتارلىق كەسۋدەن كەيىن اعاشتىڭ كەسىلگەن جەرى ارنايى جاسالعان قۇرالدارمەن وڭدەلەدى.
ەستەرىڭىزگە سالا كەتەيىك، «الماتى جازى» اكسياسى جالپى رەسپۋبليكالىق «تازا قازاقستان» اكسياسى اياسىندا ءوتىپ جاتىر جانە جاز كەزىندە قالالىق ينفراقۇرىلىم مەن قوعامدىق مۇلىككە ۇقىپتى قاراۋدى قالىپتاستىرۋعا، حالىق اراسىندا ەكولوگيالىق مادەنيەتتى ارتتىرۋعا باعىتتالعان «الماتى – ءبىزدىڭ ورتاق ءۇيىمىز» ناۋقانىنىڭ جالعاسى بولىپ تابىلادى.