اپاتتى اعاشتاردى سانيتارلىق ماقساتتا كەسۋ قالا تۇرعىندارىنىڭ قاۋىپسىزدىگىن قامتاماسىز ەتۋدىڭ ماڭىزدى قۇرامداس بولىگى، بۇل الماتى قالاسى اكىمدىگىنىڭ ەرەكشە باقىلاۋىندا، دەپ حابارلايدى اlmaty-akshamy.kz.
بۇگىندە وسى باعىت بويىنشا جۇمىستار قالانىڭ بارلىق اۋدانىندا جۇرگىزىلدى. الاتاۋ اۋدانىندا 500، اۋەزوۆ اۋدانىندا 700، المالى اۋدانىندا 900، بوستاندىق اۋدانىندا 900، مەدەۋ اۋدانىندا 100، جەتىسۋ اۋدانىندا 300، ناۋرىزباي اۋدانىندا 400 جانە تۇركسىب اۋدانىندا 1400 اعاش سانيتارلىق ماقساتتا كەسىلدى. «الماتى جازى» ناۋقانى اياسىندا 5 200 اعاش سانيتارلىق ماقساتتا كەسىلدى.
اعاشتى سانيتارلىق ماقساتتا كەسۋدىڭ ۋاقىتىلى جۇرگىزىلمەۋى ادامنىڭ دەنساۋلىعىنا جانە مۇلىككە زيان كەلتىرۋى مۇمكىن. وسىعان بايلانىستى اۋرۋ جانە قۋراعان اعاشتاردىڭ باسىن سانيتارلىق جانە پىشىندەپ كەسۋ جۇمىستارىن كۇشەيتۋ داۋىل، قاتتى جەل مەن نوسەر كەزىندە بۇتاقتاردىڭ قۇلاۋ مۇمكىندىگىن ازايتادى.
الماتى قالاسىنىڭ جاسىل جەلەگىن كۇتىپ-ۇستاۋ جانە قورعاۋ ەرەجەسىنە سايكەس، اعاشتىڭ پىشىنىنە، ولاردىڭ جاسىنا قاراي وزگەرەتىنە، كەسۋگە توزىمدىلىك سىندى وسىمدىكتەردىڭ تۇرلىك جانە بيولوگيالىق ەرەكشەلىگىن ەسكەرە وتىرىپ، بارلىق نورما ساقتالىپ سانيتارلىق ماقساتتا كەسىلەدى. سانيتارلىق كەسۋدەن كەيىن اعاشتىڭ كەسىلگەن جەرى ارنايى جاسالعان قۇرالدارمەن وڭدەلەدى.
ناۋقان وتكىزۋ بارىسىندا ءقاۋىپتى ەڭىستە وسكەن اۋرۋ جانە قۋراعان اعاشتاردى كەسۋ كوزدەلگەن. ونىڭ ورنىنا 10 ەسە كوپ مولشەردە كوشەت وتىرعىزىلادى.
ەستەرىڭىزگە سالا كەتەيىك، «الماتى جازى» ناۋقانى بيىل 6 شىلدەدە اياقتالادى. بۇل ءىس-شارا مەملەكەت باسشىسىنىڭ تاپسىرماسىمەن جۇزەگە اسىرىلاتىن جانە ەلدى مەكەندەردىڭ اۋماعىن اباتتاندىرۋ مەن كوگالداندىرۋعا، سونداي-اق حالىق اراسىندا ەكولوگيالىق مادەنيەتتى قالىپتاستىرۋعا باعىتتالعان «تازا قازاقستان» رەسپۋبليكالىق اكسياسى اياسىندا ءوتىپ جاتىر.