ۇلت پەرزەنتىنىڭ مەرەيتويى الماتىداعى «الاتاۋ» ءداستۇرلى ونەر تەاترىندا ءوتتى
مەملەكەت جانە قوعام قايراتكەرى، سوسياليستىك ەڭبەك ەرى اسانباي اسقاروۆتىڭ تۋعانىنا بيىل - 100 جىل. ۇلت پەرزەنتىنىڭ مەرەيتويى الماتىداعى «الاتاۋ» ءداستۇرلى ونەر تەاترىندا اتالىپ ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بىلىكتىلىك پەن زيالىلىق، تازالىق پەن ادالدىق جانە حالقىن شەكسىز ءسۇيۋ. ەلى ءۇشىن ايانباي ەڭبەك ەتكەن اسانباي اسقاروۆ جاقسى باسشى بولۋ ءۇشىن ادامدا وسى ءۇش قاسيەتتىڭ بولۋى شارت دەگەن. دانالىعىمەن دارالانعان ول جۇمىستا دا وسى قاعيدانى ۇستانىپ، قىزمەتكەرلەرىنەن وسىنى تالاپ ەتەتىن. الاش اماناتىنىڭ اسانبايى اتانعان تۇلعانىڭ مەرەيتويىن الماتى قالاسىندا اتاپ ءوتىلۋى دە بەكەر ەمەس. ول ەل باسقارعان تۇستا ەڭ اۋقىمدى دەگەن قۇرىلىس مەگاپوليستە سالىنعان ەدى.
«قازاقستان قوناق ءۇيى، رەسپۋبليكا سارايى، وقۋشىلار سارايى، سونىمەن قاتار، قازىرگى ستاديون قايتا جاڭعىرتىلدى. 1973 جىلى مەدەۋ مۇز ايدىنى جاڭعىرتىلدى. يدەياسى قونايەۆتىكى، ىسكە اسىرعان وسى اسانباي اسقاروۆ بولدى»، – دەدى جازۋشى مۇحتار قازىبەك.
اسانباي اسقاروۆ تەك ساياسات ساحناسىندا عانا ەمەس، ادەبيەت الەمىندە دە وزىندىك قولتاڭباسىن قالدىرىپ كەتتى. ءومىرىنىڭ سوڭعى جىلدارى ول قاراسوزگە دەن قويدى. «تاعدىر»، «جۇماق پەن توزاق جىرلارى»، «كوزقاراس»، «ۇلى تۇراننىڭ ۇلدارى» كىتاپتارى بۇگىنگە دەيىن جەتىپ، ۇرپاققا امانات بولىپ قالدى. كورنەكتى مەملەكەت جانە قوعام قايراتكەرىن ەسكە الۋعا ارنالعان كەشتە جاستار ونىڭ شىعارمالارىنان ءۇزىندى وقىدى.
«اسانباي اعانىڭ كەرەمەت ءسوزى بار ەدى. ءومىر دارياسىندا ءار ادامنىڭ لايىقتى ورنى بار. بۇگىن اسەكەڭ لايىقتى ورنىن تاپتى. ول كىسى العىر، قانداي ماسەلە بولسا دا تۋرا ايتاتىن»، – دەدى ا. اسقاروۆتىڭ زامانداسى راۋشانبەك قىرعىزباي.
ۇلت جاناشىرى اسانباي اسقاروۆ «جەلتوقسان كوتەرىلىسىن ۇيىمداستىرۋعا قاتىستى، ۇلتشىل» دەگەن ايىپپەن 4 جىلدان اسا ۋاقىت قاماۋدا بولدى. ول ماسكەۋدىڭ بۋتىركا، موتروسكايا تيشينا سەكىلدى تۇرمەلەرىندە اۋىر ازاپ شەكتى.
«ءبىز قاي كەزدە بولماسىن، بىرەۋدى جاماندايمىز. سول كەزدە ارىز جازىپ، بۇكىل شارۋاسىن جوققا شىعارعىسى كەلگەن ازاماتتار بولدى. قازاقتا «تاۋ الىستاعان سايىن، بيىكتەي بەرەدى» دەگەن ءسوز بار. ۋاقىت وتكەن سايىن، ونىڭ كىم ەكەنى، ورنى ءبىلىپ جاتىر»، – دەدى مەملەكەت جانە قوعام قايراتكەرى امالبەك تشانوۆ.
1991 جىلى اسانباي اسقاروۆقا تاعىلعان ايىپتىڭ مۇلدە نەگىزسىز ەكەنى انىقتالىپ، اقتالىپ شىقتى. شىمكەنت قالاسىندا ونىڭ ەسكەرتكىشى مەن مۇراجايى بار. ءوزىنىڭ ادالدىعىمەن، بيىك پايىم-پاراساتىمەن ەل ەسىندە قالعان قايراتكەردى حالقى قاشاندا ۇلىقتاي بەرمەك. قانداي زامان بولسا دا، قانشا ۋاقىت وتسە دە الىپتار الاسارمايدى. ولاردىڭ اسقاق تۇلعاسى بيىكتەي بەرەدى.