تالدىبۇلاق اۋىلىنداعا 100-گە جۋىق تۇرعىن ۇيدە سۋ، گاز، ەلەكتر جارىعى جوق
الماتى وبلىسىنىڭ تالعار اۋدانىنا قاراستى تالدىبۇلاق اۋىلىندا 100-گە جۋىق تۇرعىن تالاي جىلدان بەرى جەرىن زاڭداستىرا الماي كەلەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
سونىڭ كەسىرىنەن ەل جارىق پەن كوگىلدىر گازدان، باسقا دا مەملەكەتتىك قىزمەتتەن قاعىلىپ وتىر. بۇقارا مۇنداي ولقىلىقتىڭ بارىنە كەزىندە ۋچاسكەلەردى ساتقان اراداعى دەلدالداردى كىنالايدى.
و باستا نىسانالى ماقساتى شارۋا قوجالىعىن جۇرگىزۋگە ارنالعان تالدىبۇلاق اۋىلىنداعى جەرلەر وسىدان التى جىل بۇرىن 100 شاقتى ادامعا ساتىلعان. سول كەزدە جەردى ساتىپ اقشاسىن العان ادامدار قۇجاتىن رەتتەپ بەرەمىز دەپ ەلدى سەندىرىپ كەلگەن. ۋادەگە يلانعان جۇرت شاما-شارقى كەلگەنشە ءقازىر ءۇيىن سالىپ تاستاعان. الايدا حالىق ءالى كۇنگە دەيىن قۇجاتىن زاڭداستىرا الماي كەلەدى.
«باسجوسپاردى كورسەتتى، قولىمىزعا بەردى. اراعاك ۋاقىت سالىپ، جەر ساياجاي اۋماعىندا ەكەن، ۆينوگرادوۆ، سادوۆايا، ۆيشنيەۆايا كوشەسى بولاتىنىن ايتتى. سوسىن قايتادان اۋىلدىڭ ايماعىنا قارايتىنىن ايتىپ، قۇجات جاسالادى دەپ سەندىردى. التى جىل سوزىپ كەلدى»، – دەدى تالدىبۇلاق اۋىلىنىڭ تۇرعىنى نۇربولات جاباعييەۆ
5 گەكتارداي جەردىڭ يەسى - جەكە ادام. ۋچاسكە ءتورت لەككە ءبولىنىپ دەلدالدار ارقىلى جۇرتقا ساتىلعان. الايدا ولار تىراشتانىپ تاۋىپ، جيناپ بەرگەن اقشامىزدى يەسىنە تولىق جەتكىزبەگەن كورىنەدى. تۇرعىنداردىڭ ايتۋىشا، ەل جەرىن قوجايىنىنان قايتادان ساتىپ الۋعا ءماجبۇر بولىپتى.
«تاۋىپ بەرەم اقشانى، جاساپ بەرەم دەگەنىنە4 جىل بولدى. مەن ءقازىر ءۇي دە سالا الماي وتىرمىن. بالالارمەن قاڭعىرىپ پاتەر جالداپ ءجۇرمىن. نە دەگەن سۇمدىق»، – دەدى تالدىبۇلاق اۋىلىنىڭ تۇرعىنى مارجان ەربول.
تۇرعىندار قۇجاتتىڭ دۇرىس ەمەستىگىنە قاراماستان زاڭسىز ءۇي سالىپ العانىن مويىندايدى. ءبىراق الاياقتاردىڭ ارباۋىندا ءتۇسىپ، سەنگەنىن جاسىرمادى. ءقازىر بۇقارا جارىقسىز، جىلۋسىز وتىر. مەكتەپ پەن ەمحاناعا تىركەلۋ دە قيىن.
«نە بالالارىمىزدى تىركەۋگە وتىرعىزا المايمىز، نە بالالارىمىزدى دۇرىستاپ وقىتايىق دەسەك نە جارىق جوق، نە گاز جوق. جان-جاعىمىزداكورشىلەردەن ەلەكتر توعىن ۋاقىتشا جالعاپ وتىرمىز»، – دەدى تالدىبۇلاق اۋىلىنىڭ تۇرعىنى اينۇر نۇسىپبەكوۆا.
جەردى ساتقانداردان ەشقانداي قايىر بولمايتىنىن تۇسىنگەن حالىق اۋدان اكىمشىلىگىنە بارىپ جەردى قولدانۋ ماقساتىن اۋىستىرىپ بەرۋىن تالاپ ەتتى. ال ونى اۋىستىرۋ ءۇشىن مەملەكەتكە جەردىڭ كادارسترلىق قۇنىن تولەۋى ءتيىس ەكەن. ءبىراق تۇرعىندار ول اقشانى ءبولىپ تولەۋدى سۇرايدى.
«بۇل كىسىلەر ءبارى كوللەكتيۆنو جينالىپ، سوتقا ارىز جازسا، ەگەر سوت ءبولىپ تولەۋگە ءبىزدى مىندەتتەسە، گرافيك جاساپ بەرەمىز. زاڭ بار. ەندى ءبىز زاڭنان اسا المايمىز عوي»، – دەدى تالعار اۋدانى اكىمىنىڭ ورىنباسارى ەرمەك تولقىنوۆ.
جەردىڭ زاڭداستىرىلۋى ەندى سوتتىڭ شىعارعان شەشىمىنە بايلانىستى بولماق. ال ەلدىڭ اقشاسىن الىپ، ۋادەسىن ورىنداماعانداردىڭ اتىنا وبلىستىق پروكۋراتۋراعا ارىز جازۋعا كەڭەس بەرىلدى.