وڭىرلىك كوممۋنيكاسيالار قىزمەتىندە الماتى قالاسى سپورت باسقارماسىنىڭ باسشىسى دارحان نۇرحان ۇلى جوعارى جەتىستىكتەر سپورتىن دامىتۋ مەن سپورتتا رەزەرۆ دايارلاۋدىڭ قالاي قولعا الىنىپ جاتقانىن باياندادى.
ونىڭ ايتۋىنشا، ءقازىر الماتىدا سپورتتىڭ 87 ءتۇرى بويىنشا رەزەرۆ دايارلانىپ جاتىر. بۇل قالانى ەلىمىزدەگى كاسىبي سپورتتى دامىتىپ جاتقان نەگىزگى ورتالىقتىڭ ءبىرى ەتىپ وتىر.
«2025 جىلى الماتىلىق سپورتشىلارعا 6 187 سپورتتىق اتاق بەرىلدى. بۇل 2024 جىلمەن سالىستىرعاندا 14%-عا ارتىق (5 426 اتاق). ولاردىڭ قاتارىندا قازاقستان رەسپۋبليكاسىنىڭ 8 ەڭبەك سىڭىرگەن سپورت شەبەرى مەن 117 حالىقارالىق دارەجەدەگى سپورت شەبەرى بار. بۇل سپورتشىلاردى دايارلاۋ دەڭگەيىنىڭ جوعارى ەكەندىگىنە دالەل»، – دەدى سپورت باسقارماسىنىڭ باسشىسى.
سپيكەردىڭ سوزىنشە، 2025 جىلى قازاقستان رەسپۋبليكاسىنىڭ ۇلتتىق قۇرامالارىنا 2 376 سپورتشى دايارلانعان. ونىڭ ىشىندە 853 سپورتشى نەگىزگى قۇرامعا، 713 – جاستار قۇراماسىنا، 296 – جاسوسپىرىمدەر قۇراماسىنا ەندى. بۇل كورسەتكىش وتكەن جىلمەن سالىستىرعاندا 7،8%-عا جوعارى بولىپ شىققان.
سونىمەن قاتار، ەلىمىزدىڭ ۇلتتىق قۇرامانىڭ جالپى سانىنىڭ ۇشتەن بىرىنە جۋىعىن الماتى قالاسىنىڭ سپورتشىلارى قۇرايدى. بۇل قالانىڭ قازاقستاننىڭ سپورتتىق الەۋەتىن قالىپتاستىرۋداعى جەتەكشى ءرولىن كورسەتەدى.
الماتىلىق سپورتشىلار ءتۇرلى دەڭگەيدەگى رەسمي جارىستاردا تۇراقتى تۇردە جوعارى ناتيجە كورسەتىپ كەلەدى. 2025 جىلى ولار 5 562 مەدال جەڭىپ الدى، بۇل 2024 جىلمەن سالىستىرعاندا 9%-عا كوپ (5 102 مەدال).
ولاردىڭ ىشىندە:
– قازاقستان رەسپۋبليكاسىنىڭ چەمپيوناتتارىندا – 4 800 مەدال؛
– ازيا چەمپيوناتتارىندا – 362 مەدال؛
– الەم كۋبوگىنىڭ كەزەڭدەرىندە – 212 مەدال؛
– الەم چەمپيوناتتارىندا – 188 مەدال.
دارحان نۇرحان ۇلى الماتىعا عانا ەمەس، بۇكىل ەل ءۇشىن ماڭىزدى بولعان ءبىراز جەتىستىككە دە توقتالىپ ءوتتى.
نازىم قىزايباي قازاقستان تاريحىندا العاش رەت بوكستان ءۇش دۇركىن الەم چەمپيونى اتانىپ، جاس ۇرپاققا ۇلكەن ۇلگى بولدى.
مانەرلەپ سىرعاناۋشى ميحايل شايدوروۆ بوستوندا وتكەن الەم چەمپيوناتىندا كۇمىس مەدال يەلەنىپ، قازاقستاندىق مانەرلەپ سىرعاناۋداعى ەڭ ەلەۋلى جەتىستىكتىڭ بىرىنە قول جەتكىزدى. ول وسى تابىسىمەن ون جىل بۇرىنعى اتى اڭىزعا اينالعان دەنيس تەننىڭ جەتىستىگىن قايتالادى.
ايدانا قۇمارتايەۆا قىتايدىڭ ۋسي قالاسىندا وتكەن تاەكۆوندو WT بويىنشا الەم چەمپيوناتىندا قولا جۇلدەگەر اتانىپ، سپورتتىڭ وسى تۇرىنەن الماتىعا العاش رەت الەم چەمپيوناتىنىڭ مەدالىن الىپ كەلدى. اتالعان جۇلدە 2007 جىلدان بەرى قازاقستان ايەلدەر قۇراماسىنىڭ WT الەم چەمپيوناتىنداعى ەكىنشى مەدالى بولدى.
سونداي-اق ليۆەرپۋل قالاسىندا وتكەن بوكستان الەم چەمپيوناتىندا قازاقستان قۇراماسى 10 مەدال (7 التىن، 1 كۇمىس پەن 2 قولا) جەڭىپ الىپ، جالپىكوماندالىق ەسەپتە كوش باستادى. ونىڭ ىشىندە 4 مەدال الماتىلىق سپورتشى قىزداردىڭ ەنشىسىندە بولىپ، بۇل كوماندانىڭ جالپى ناتيجەسىنىڭ 40%-ىن قۇرادى.
ءسوز سوڭىندا دارحان نۇرحان ۇلى جوعارى جەتىستىكتەر سپورتىن دامىتۋ، دارىندى سپورتشىلاردى قولداۋ مەن الماتىنىڭ حالىقارالىق سپورت ارەناسىنداعى پوزيسياسىن نىعايتۋ قالا ساياساتىنىڭ سپورت سالاسىنداعى ستراتەگيالىق مىندەتى بولىپ قالا بەرەتىنىن اتاپ ءوتتى.