وڭىرلىك كوممۋنيكاسيالار قىزمەتى الاڭىندا الماتى قالاسىنىڭ سپورت باسقارماسىنىڭ باسشىسى دارحان نۇرحان ۇلى دەنە شىنىقتىرۋ مەن سپورتتى دامىتۋ بويىنشا ىستەلىپ جاتقان جۇمىستى، بۇقارالىق سپورتتىق جوبالاردىڭ قالاي جۇزەگە اسىپ جاتقانىن، الماتىلىق سپورتشىلاردىڭ جەتىستىگى مەن قالانىڭ سپورتتىق ينفراقۇرىلىمىن دامىتۋ جوسپارلارى تۋرالى باياندادى.
بۇقارالىق سپورتتىڭ دامۋى مەن حالىقتىڭ قامتىلۋىنىڭ ارتۋى
2025 جىلدىڭ قورىتىندىسى بويىنشا الماتىدا دەنە شىنىقتىرۋمەن جانە سپورتپەن جۇيەلى تۇردە اينالىساتىن تۇرعىندار سانى ەداۋىر وسكەن. 2024 جىلمەن سالىستىرعاندا بۇل كورسەتكىش 40%-دان 42%-عا دەيىن ءوسىپ، 955 مىڭ ادامعا جەتىپ وتىر، ونىڭ 325 مىڭى – بالالار ەكەن. وسىلايشا، قالا تۋريزم جانە سپورت مينيسترلىگى بەلگىلەگەن ينديكاتورعا قول جەتكىزدى.
2025 جىلدىڭ باسىنان بەرى الماتىدا 3 000-نان استام سپورتتىق-بۇقارالىق ءىس-شارا ءوتىپ، ول 380 مىڭنان استام ادامدى قامتىعان. قالا تۇرعىندارى بەلسەندى بولىپ، دەنە شىنىقتىرۋعا دەن قويا باستاعان.
حالىقارالىق تۋرنيرلەر مەنە ستۋدەنتتىك سپورت
2025 جىلى الماتى 35 ءىرى حالىقارالىق سپورتتىق جارىس ءوتتى.
ولاردىڭ قاتارىندا Almaty Marathon، ATP-250 Almaty Open، ۇستەل تەننيسىنەن WTT Contender، شاحماتتان الەم چەمپيوناتى، دزيۋدودان ازيا كۋبوگى مەن باسقا دا بەدەلدى جارىستار بار.
ماڭىزدى جاڭالىقتىڭ ءبىرى – 2025 جىلى العاش رەت ىسكە اسىرىلعان ستۋدەنتتىك ليگا. جوباعا 35 جوعارى وقۋ ورنى، 108 كوماندا مەن شامامەن 1 500 ستۋدەنت قاتىستى. جارىس فۋتبول، ۆولەيبول جانە باسكەتبول بويىنشا ءوتىپ جاتىر، بيىلدان باستاپ باعدارلاماعا جەڭىل اتلەتيكا دا ەندى.
بالالار سپورتى مەن فۋتبولدى دامىتۋ
2023 جىلدان بەرى جۇزەگە اسىرىلىپ كەلە جاتقان «بالالار فۋتبول ليگاسى» جوباسى دا جۇمىسىن جالعاستىرىپ جاتىر. ءقازىر ليگا 320 كوماندا مەن 7–15 جاس ارالىعىنداعى 8 مىڭنان استام بالانىڭ باسىن قوسقان. بۇل جوبا قالاداعى سپورت مەكتەپتەرى مەن اكادەميالاردىڭ دارىندى جاس فۋتبولشىلاردى ىرىكتەيتىن الاڭىنا اينالدى.
حالىقارالىق يميدج بەن ءىرى ءىس-شارالار
وتكەن جىل الماتىنىڭ حالىقارالىق ءيميدجىن نىعايتۋ تۇرعىسىنان دا ماڭىزدى بولدى. «قايرات» فۋتبول كلۋبى ۋەفا چەمپيوندار ليگاسىنىڭ توپتىق كەزەڭىنە شىقسا، «قايرات» فۋتزال كلۋبى ءتۋرنيردىڭ 1/4 فينالىنا دەيىن جەتتى. قالانىڭ ورتالىق ستاديونىندا چەمپيوندار ليگاسىنىڭ ماچتارى، سونداي-اق الەمدىك جۇلدىزداردىڭ كونسەرتتەرى ءوتتى. بۇل الماتىنىڭ حالىقارالىق ءىس-شارالار وتكىزۋگە دايىن ەكەنىن كورسەتتى.
الەۋمەتتىك جوبالار مەن قىسقى ينفراقۇرىلىم
وتكەن جىلدىڭ قاراشا ايىنان باستاپ قالادا «سپورت – دوستىق الاڭى» جوباسى جۇزەگە اسىرىلا باستادى. ەكى اي ىشىندە الماتىنىڭ بارلىق اۋدانىندا 86-دان استام ءىس-شارا ءوتىپ، شامامەن 7 500 تۇرعىندى قامتىدى.
2025–2026 جىلدارداعى قىسقى ماۋسىمدا الماتىدا قالانىڭ سەگىز اۋدانىندا ورنالاسقان 21 مۇز ايدىنى انىقتالدى. ونىڭ ىشىندە 11 اشىق الەۋمەتتىك مۇز ايدىنى مەن ينۆەستورلار ەسەبىنەن جۇمىس ىستەيتىن 10 نىسان بار.
ءسوز سوڭىندا دارحان نۇرحان ۇلى بۇقارالىق سپورتتى دامىتۋ، كاسىبي سپورتشىلاردى قولداۋ مەن قولجەتىمدى سپورتتىق ينفراقۇرىلىم قالىپتاستىرۋ الماتى قالاسى سپورت باسقارماسىنىڭ باستى مىندەتى بولىپ قالا بەرەتىنىن اتاپ ءوتتى.