1 تامىزدان باستاپ الماتى حالىقارالىق اۋەجايىندا جاڭا رەسمي قىزمەت — Almaty Airport Taxi قوسىلدى، - دەپ حابارلايدى اqshamnews.kz.
بۇل جوبا قالا تۇرعىندارى مەن قوناقتارىنا كورسەتىلەتىن قىزمەت ساپاسىن ارتتىرۋعا جانە ترانسفەرلىك قىزمەتتەرگە ءبىرىڭعاي ستاندارت ەنگىزۋگە باعىتتالعان.
Almaty Airport Taxi سەرۆيسىنىڭ ىسكە قوسىلۋى — جولاۋشىلاردىڭ جايلى، ءقاۋىپسىز جانە اشىق قىزمەتكە دەگەن سۇرانىسىنا بەرىلگەن ناقتى جاۋاپ. جوبا زاڭسىز تاسىمالدار مەن بەيرەسمي تاكسي قىزمەتتەرىنىڭ ارتۋىنا بايلانىستى تۋىنداعان ماسەلەنى شەشۋگە، سونداي-اق قالاعا كەلگەن العاشقى ساتتەن باستاپ وڭ اسەر قالىپتاستىرۋعا باعىتتالعان.
باستاپقى كەزەڭدە جولاۋشىلارعا ءبىرىڭعاي زاماناۋي ستيلدە برەندتەلگەن 40 BYD Qin Plus ەلەكتروموبيلى قىزمەت كورسەتەدى. بۇل كولىكتەر ەكولوگيالىق تازا ءارى جوعارى جايلىلىق ستاندارتتارىنا تولىق ساي كەلەدى. قازىرگى تاڭدا ءار كولىككە باعىت كورسەتەتىن جانە وزەكتى تۋريستىك اقپاراتپەن جابدىقتالعان ينتەراكتيۆتى ەكراندار ورناتۋ جۇمىستارى جۇرگىزىلىپ جاتىر.
جۇرگىزۋشىلەر ارنايى دايىندىقتان ءوتىپ، جولاۋشىلارمەن كاسىبي دەڭگەيدە جۇمىس ىستەۋگە داعدىلانعان. ولار تەرمينالدان شىققان ساتتەن باستاپ مەجەلى جەرگە دەيىن ءىلتيپاتتى قىزمەت كورسەتىپ، بارلىق دەتالگە مۇقيات كوڭىل بولەدى. سونىمەن قاتار جۇرگىزۋشىلەرگە ارنالعان ءبىرىڭعاي فيرمالىق ارنايى كيىم كەزەڭ-كەزەڭىمەن ەنگىزىلەدى.
تاپسىرىستاردى ديناميكالىق ۇلەستىرۋ جۇيەسى بويىنشا ءبولۋ ارقىلى كولىكتى ورتا ەسەپپەن 5 مينۋت ىشىندە شاقىرتۋعا بولادى. جولاقى باعىتقا قاراي ءۇش ايماققا بولىنگەن تۇراقتى تاريفتەر بويىنشا جۇزەگە اسىرىلادى. بارلىق شارتتار اشىق كورسەتىلەدى، جاسىرىن قوسىمشا تولەمدەر جوق. جولاقىنى بانكتىك كارتامەن، تولەم تەرمينالى ارقىلى نەمەسە QR-كودپەن تولەۋگە بولادى.
جىل اياعىنا دەيىن اۆتوپارك 10 بيزنەس-كلاسس ساناتىنداعى كولىكپەن تولىعادى. سونىمەن قاتار، قازان ايىندا ءارقايسىسى 14 جولاۋشىعا ارنالعان 4 شاعىن اۆتوبۋس (شاتتل) ىسكە قوسىلادى. ولاردىڭ ءارقايسىسىندا ينكليۋزيۆتى كەڭىستىك جانە جۇك سالاتىن ارنايى ورىن قاراستىرىلعان.
Almaty Airport Taxi — ەكولوگيانى، زاماناۋي تەحنولوگيالاردى جانە كليەنتكە باعدارلانعان قىزمەتتى ۇيلەستىرە وتىرىپ، قالالىق سەرۆيستىڭ جاڭا ەتالونىنا اينالماق. جوبا الداعى ۋاقىتتا دا دامىپ، الماتى تۇرعىندارى مەن قوناقتارىنا جايلى ءارى سەنىمدى قوزعالىس مۇمكىندىكتەرىن ۇسىنۋدى جالعاستىرادى.