الماتى اكىمى ەربولات دوسايەۆ بولاشاق «قالقامان» مەترو بەكەتىنىڭ قۇرىلىس الاڭىنا بارىپ، قالانىڭ ماڭىزدى ينفراقۇرىلىمدىق نىساندارىنىڭ بىرىندەگى جۇمىس بارىسىمەن تانىستى.
مەترو بەكەتتىڭ قۇرىلىسى 2020 جىلى باستالدى، ءبىراق ناۋرىزباي اۋدانىنىڭ قارقىندى دامۋىنا بايلانىستى 2022 جىلى ونىڭ تراسسيروۆكاسى مەن ورنالاسۋى قايتا قارالدى، دەپ حابارلايدى aqshamnews.kz.
جاڭا جوبادا جەراستى توننەلدەرىنىڭ ۇزىندىعى 1،98 كم بولادى، ال بەكەت اباي داڭعىلى بويىندا، ءاشىموۆ كوشەسىنەن باتىسقا قاراي ورنالاسادى. پلاتفورمانىڭ ۇزىندىعى 98 مەتر، ال وعان ىرگەلەس اۋماقتا 380 اۆتوتۇراق ورنى جانە 28 اۆتوبۋس تۇراق ورنى قاراستىرىلادى. جوبانىڭ باس مەردىگەرى – «BCN-Group» (بۇرىنعى Bazis Construction).
2024 جىلى قارجىلاندىرۋدىڭ جەتكىلىكسىزدىگىنە قاراماستان، قازىرگى ۋاقىتتا جاڭا بەكەت ءۇشىن قازىلعان شۇڭقىردى ازىرلەۋ جۇمىستارى قارقىندى جۇرگىزىلۋدە. سول جاق توننەلدى قازۋ جۇمىستارى 100% اياقتالدى. باستاپقىدا ەكى توننەلدە بىردەن ەكى قازۋ كەشەنىمەن قازۋ جۇمىستارى تاۋلىگىنە ورتاشا 3 مەتر جىلدامدىقپەن ءجۇردى. الايدا، قۇرىلعىلاردىڭ ءبىرىنىڭ ىستەن شىعۋىنا بايلانىستى وڭ جاق توننەل بويىنشا تەك 559 مەتر قازىلدى، ال جوسپار بويىنشا 1587 مەتر بولۋى كەرەك ەدى.
2024 جىلى جوبانى جالعاستىرۋ ءۇشىن 28 ملرد تەڭگە بولىنەدى. بۇل قاراجاتقا ەكىنشى توننەلدى قازۋ، جەر قازۋ جانە بەتونداۋ جۇمىستارى، سونداي-اق قاجەتتى جابدىقتاردى ساتىپ الۋ جوسپارلانعان.
«BCN-Group» ديرەكتورلار كەڭەسىنىڭ ءتوراعاسى الەكساندر بەلوۆيچ قازىرگى ۋاقىتتا قۇرىلىس الاڭىندا 150 مامان جانە 50-دەن استام ارنايى تەحنيكا جۇمىس ىستەپ جاتقانىن، جۇمىستار ءۇش اۋىسىمدا جۇرگىزىلىپ جاتقانىن حابارلادى.
ساپار بارىسىندا ەربولات دوسايەۆ مەردىگەرگە بولىنگەن قاراجاتتى تولىق يگەرۋدى تاپسىردى. قالا باسشىسى قۇرىلىس قارقىنىن جەدەلدەتۋ ءۇشىن جۇمىس ۇيىمداستىرۋ تاسىلدەرىن قايتا قاراۋ قاجەتتىگىن اتاپ ءوتىپ، نىساندى 2026 جىلدىڭ قاڭتارىنا دەيىن اياقتاۋدى مىندەتتەدى.
اكىم مەردىگەرگە قوسىمشا قازۋ كەشەنىن ىزدەپ، وڭ جاق توننەلدى ەكى جاقتان ءبىر ۋاقىتتا قازۋدى جالعاستىرۋدى ۇسىندى. سونىمەن قاتار، قوسىمشا رەسۋرستاردى جۇمىلدىرۋدى ەسكەرە وتىرىپ، جاڭارتىلعان جۇمىس كەستەسىن تەز ارادا ۇسىنۋ تاپسىرىلدى.
بۇل مەترو بەكەتىنىڭ اشىلۋى قالاداعى كولىك قوزعالىسىن جاقسارتىپ، مەترو پايدالانۋشىلارىنىڭ سانىن تاۋلىگىنە 30 مىڭ ادامعا ارتتىرادى. مىسالى، «سارىارقا» جانە «باۋىرجان مومىش ۇلى» بەكەتتەرى ىسكە قوسىلعاننان كەيىن مەترو جولاۋشىلارىنىڭ سانى 50 مىڭنان 110 مىڭ ادامعا دەيىن كوبەيدى.