قالا باسشىسى پروبلەمالىق نىسانداردىڭ ۋاقىتىلى ءارى ساپالى اياقتالۋىن قامتاماسىز ەتۋدى مىندەتتەدى
الماتى اكىمى دارحان ساتىبالدى تۇركسىب اۋدانىنداعى الەۋمەتتىك جانە كوممۋنالدىق ينفراقۇرىلىم نىساندارىن ارالاپ شىقتى، دەپ حابارلايدى aqshamnews.kz.
«نۇرشاشقان» شاعىن اۋدانىندا قالا اكىمى اۋىزسۋ، كارىز جانە ەلەكتر جەلىلەرى بويىنشا ينفراقۇرىلىمدىق جوبالاردىڭ جۇزەگە اسىرىلۋ بارىسىمەن، سونداي-اق «حالىق قاتىساتىن بيۋدجەت» باعدارلاماسى اياسىندا اباتتاندىرىلىپ جاتقان «نىعمەت» سكۆەرىندەگى جۇمىستارمەن تانىستى.
تۇرعىندار جارىقتىڭ ءجيى ءسونىپ قالۋى مەن سۋدىڭ تۇراقسىز بەرىلۋى ماسەلەسىن كوتەردى.
«پودستانسيانى شەڭبەرلى جۇيەگە قوسپايىنشا، قۋات كوزى تۇراقتى بولمايدى، بۇل تۋرالى ماعان ەندى عانا باياندالىپ وتىر. مۇندا ستانسيا سالىندى، ەندى جەلىنى قوسۋ قاجەت. حالىق تۇراتىن اۋماق ارقىلى وتكىزۋگە تۇرعىندار قارسى بولعان، ءبىراق ءقازىر كەلىسىمگە كەلگەن»، - دەپ ءتۇسىندىردى دارحان ساتىبالدى.
سۋمەن جابدىقتاۋ بويىنشا جوباداعى كەمشىلىكتەرگە بايلانىستى قالا اكىمى قازىرگى مەردىگەرمەن جۇمىستى اياقتاۋدى جانە مەرزىم بۇزىلعان جاعدايدا باسقا ۇيىمدى تارتۋدى تاپسىردى.
«بۇل جوبانى جىلىتۋ ماۋسىمى باستالعانعا دەيىن اياقتاۋ قاجەت»، - دەپ اتاپ ءوتتى قالا باسشىسى.
ەنەرگەتيكا جانە سۋمەن جابدىقتاۋ باسقارماسىنىڭ وكىلى «تۇزدىباستاۋ» شاعىن اۋدانىندا وسى ايدىڭ سوڭىنا دەيىن شەڭبەرلى جۇيە تولىق اياقتالاتىنىن حابارلادى.
تۇرعىندار شاعىناۋدانداعى وزەكتى ماسەلەلەرگە ءمان بەرىپ، تولىققاندى اقپارات بەرگەنى ءۇشىن اكىمگە العىس ءبىلدىردى.
ساپار بارىسىندا وگاريەۆ كوشەسىندە سالىنىپ جاتقان بالاباقشا مەن شىعارماشىلىقتى دامىتۋ ورتالىعىنىڭ جوبالارى قارالدى. سانيتارلىق-قورعاۋ ايماعى شەگەرىمدەرىن ەسكەرە وتىرىپ، نىسانداردىڭ جوبالىق پارامەترلەرىن قالالىق قۇرىلىس تالاپتارى مەن قاداعالاۋشى ورگانداردىڭ قورىتىندىلارىنا سايكەس قايتا قاراۋ تاپسىرىلدى.
«المەرەك» جانە «ماياك» شاعىن اۋداندارىندا اكىم سۋ، كارىز جەلىلەرىن تارتۋ جانە ەلەكتر جەلىلەرىن جاڭارتۋ جوبالارىمەن تانىستى. سونىمەن قاتار، وتباسىلىق-دارىگەرلىك امبۋلاتوريا مەن بالاباقشانىڭ قۇرىلىس ۋچاسكەلەرى دە تەكسەرىلدى.
اۋداننىڭ كولىك بايلانىسىن جاقسارتۋعا ماڭىزدى اسەر بەرەتىن كىشى الماتى وزەنى ارقىلى وتەتىن كوپىر وتكەلىنىڭ اياقتالۋىنا ەرەكشە نازار اۋدارىلدى.
قالا باسشىسى اۋدان اكىمدىگى وكىلدەرىنە: «وزەندەگى جاعداي قانداي؟ كوكتەمگى تاسقىن كەزىندە جاعداي قالاي بولادى؟» - دەگەن ناقتى سۇراقتاردى قويدى.
تۇركسىب اۋدانىنىڭ اكىمى باقىتجان اقجاروۆ وزەن ارناسى يرەك بولعانىمەن، تاسقىن سۋعا قاتىستى ەش قيىندىق جوق ەكەنىن مالىمدەدى.
وسى رەتتە قالا اكىمى جاعالاۋ اۋماعىن اباتتاندىرۋدىڭ ماڭىزدىلىعىن اتاپ ءوتتى. تالقىلاۋ كەزىندە وزەن ارناسىن بەكىتۋ جۇمىستارى تۋرالى دا ايتىلدى.
بۇل جونىندە اكىم:
«مەن ءوز باسىم جاسىل جەلەك پەن قوعامدىق كەڭىستىكتەردىڭ كوبىرەك بولعانىن قولدايمىن. بۇل حالىقتىڭ مادەنيەتىن وزگەرتەدى دەپ سەنەمىن»، - دەدى دارحان ساتىبالدى.
مايلين كوشەسىندەگى «اۆياتور» دەنە شىنىقتىرۋ-ساۋىقتىرۋ كەشەنىنىڭ اۋماعىندا اكىم بولاشاق سپورت كەشەنىنىڭ جوباسىمەن تانىستى. وندا باسسەين مەن امبەباپ سپورت زالى قاراستىرىلعان. جوبا بويىنشا بۇل كەشەن تاۋلىگىنە 1300-گە دەيىن كەلۋشىنى قابىلداي الادى.
قونايەۆ اتىنداعى جوسپارلى كۆارتالدا اكىم «نۇرلى جەر» باعدارلاماسى اياسىندا سالىنىپ جاتقان 260 ورىندىق بالاباقشا مەن تۇرعىن ۇيلەردىڭ قۇرىلىس بارىسىمەن تانىستى. ينجەنەرلىك جەلىلەرگە قوسىلۋ جانە اباتتاندىرۋ ماسەلەلەرىنە ەرەكشە كوڭىل ءبولىندى.
«نىساندار ساپالى ءارى مەرزىمىندە اياقتالۋى ءتيىس. جۇمىس كەستەسىن بۇزاتىن مەردىگەرلەر جاۋاپكەرشىلىككە تارتىلادى.»، - دەدى قالا باسشىسى.
سونداي-اق حمەلنيسكيي كوشەسىن تالعار تاس جولىنا دەيىن جالعاستىرۋ جوباسى دا قارالدى. بۇل جوبا قالانىڭ شىعىس بولىگىندەگى كولىك جۇكتەمەسىن ازايتىپ، قولجەتىمدىلىكتى ارتتىرۋعا باعىتتالعان.
«بۇل - قوزعالىستىڭ ماڭىزدى كۇرەتامىرى. جوبانىڭ جۇزەگە اسىرىلۋى سوزبالاڭعا سالىنباۋى كەرەك. مەرزىم مەن ساپا – مەنىڭ جەكە باقىلاۋىمدا»، - دەپ اتاپ ءوتتى اكىم.
كەزدەسۋ بارىسىندا قونايەۆ پك اۋماعىنداعى بەس ءۇيدىڭ تۇرعىندارى ءالى كۇنگە دەيىن كارىزدەن شىققان جاعىمسىز ءيىستىڭ بارىن ايتىپ، ۇيلەرىندە گازدىڭ جوقتىعىن دا كوتەردى. بۇل ماسەلەلەر بويىنشا قالا اكىمى ءتيىستى ورىندارعا سەبەبىن انىقتاپ، ماسەلەنى شەشۋدى تاپسىردى.
اۆتوبۋس باعىتتارىنىڭ جەتىسپەۋشىلىگى تۋرالى سۇراققا الماتى اكىمى قوعامدىق كولىك جۇيەسى تۋرالى تولىق مالىمەت بەرىپ، تۇرعىندار ۇسىنىسى جاڭا مارشرۋتتىق سىزبانى ازىرلەۋ كەزىندە ەسكەرىلەتىنىن ايتتى.
جەكە تۇرعىن ءۇي سەكتورىنىڭ ءبىر تۇرعىنى جولداردىڭ توعانىن العا تارتتى. دارحان ساتىبالدى بۇل ماسەلە جاۋاپسىز مەردىگەرلەردىڭ ارەكەتىمەن بايلانىستى ەكەنىن جەتكىزدى.
«مەن ءوزىم اۋلامەن ءجۇرىپ ءوتتىم، تۇرعىنداردىڭ نەگە تاپ بولاتىنىن كوزىممەن كوردىم. مۇنداي ماسەلەلەر نازاردان تىس قالماۋى ءتيىس»، - دەدى اكىم.
كەزدەسۋ سوڭىندا قالا باسشىسى مەردىگەر ۇيىمدارعا باقىلاۋدىڭ كۇشەيتىلەتىنىن جانە تۇرعىندار كوتەرگەن ءاربىر ماسەلە بەلگىلەنگەن مەرزىمدە شەشىلۋى ءتيىس ەكەنىن اتاپ ءوتتى.
ساپار قورىتىندىسىندا دارحان ساتىبالدى ءبىرقاتار ناقتى تاپسىرمالار بەرىپ، كەشىگۋلەردى بولدىرماۋ، مەردىگەرلەرگە باقىلاۋدى كۇشەيتۋ جانە بارلىق جوبالاردى بەلگىلەنگەن مەرزىمدە اياقتاۋدى مىندەتتەدى. سونىمەن قاتار، قالادا جايلى ءومىر ءسۇرۋ ورتاسىن قالىپتاستىرۋ ءار جوبانىڭ جەرگىلىكتى دەڭگەيدە ساپالى جۇزەگە اسۋىنان باستالاتىنىن ەسكە سالدى.