ەلىمىزدە 2023 جىلدان بەرى ماۋسىم ايىنىڭ ءۇشىنشى جەكسەنبىسى «اكەلەر كۇنى» مەرەكەسى بولىپ اتالىپ كەلەدى.
بۇل مەرەكەنى اتاپ وتۋدەگى باستى ماقسات – ەلىمىزدەگى وتباسىلىق قۇندىلىقتاردى ىلگەرلەتۋ، وتباسى ينستيتۋتىن نىعايتۋ، اكەلەردىڭ قوعامداعى ءرولىن ايشىقتاۋ.
مەملەكەت باسشىسى ق.توقايەۆ: «حالقىمىز قاي زاماندا دا وتباسى ءداستۇرىن بەرىك ۇستانىپ، قادىرلەي بىلگەن. اكە-شەشەسىنىڭ، اتا-اجەسىنىڭ تاربيەسىن كورىپ، ۇلكەندەردەن تاعىلىم الىپ وسكەن بالا ەسەيگەندە وتانشىل، ءبىلىمپاز، ەڭبەكقور ازاماتقا اينالادى»، دەگەنى بەلگىلى. حالقىمىزدىڭ «وتان وتباسىنان باستالادى» دەگەن ناقىل ءسوزىنىڭ ءمانى دە وسىندا بولسا كەرەك. ۇلتتى تۇزەۋ ءۇشىن وتباسىنداعى تاربيەنى تۇزەۋ كەرەك دەسەك، وتباسىندا اكەنىڭ ءرولى ماڭىزدى.
بۇل مەرەكە قازاقستانداعى وتباسىلىق قۇندىلىقتاردى ىلگەرىلەتۋگە، وتباسى ينستيتۋتىن نىعايتۋعا، سونداي-اق اكەلەر ينستيتۋتىن دامىتۋعا ىقپال ەتەدى. ءجۇز مەكتەپ بەرە المايتىن تاربيەنى بويعا ءسىڭىرىپ، تاۋدان بيىك تالاپتى بولۋدى ۇيرەتەتىن اسقار تاۋدىڭ ءجونى دارا ەكەنى داۋسىز.