وكق الاڭىندا وتكەن بريفينگتە الماتى قالاسىنىڭ اكىمى دارحان ساتىبالدى مەردىگەر ۇيىمدارعا اۆانستىق تولەم بەرۋدى توقتاتۋ تۋرالى شەشىم قابىلدانعانىن مالىمدەدى. بۇدان بىلاي كەلىسىمشارت بويىنشا تولەم تەك ناقتى ورىندالعان جۇمىستىڭ ناتيجەسى بويىنشا بەرىلەدى.
جۇمىس ساپارى مەن كۇردەلى نىسانداردى تەكسەرۋ بارىسىندا ءبىرقاتار كومپانيانىڭ كونكۋرستا جەڭىسكە جەتىپ، اۆانس الىپ، وزىنە جۇكتەلگەن جۇمىستىڭ بارلىعىن قوسالقى مەردىگەر ۇيىمدارعا تولىقتاي بەرىپ وتىرعانى انىقتالعان. بۇل رەتتە ولار جوبالاردى جۇزەگە اسىرۋعا ءىس جۇزىندە قاتىسپايدى.
"جۇمىسقا كىرىسكەن العاشقى كۇننەن باستاپ كوپتەگەن كومپانيانىڭ كونكۋرسقا قاتىسىپ، اۆانس الىپ، كەيىن جۇمىستى 100% قوسالقى مەردىگەرلەرگە تاپسىراتىنىن كوردىم. وزدەرى باسقا وڭىرلەردە بولىپ، نىسانعا ءىس جۇزىندە كەلمەيدى"، – دەدى دارحان ساتىبالدى.
اكىم قازىرگى ۋاقىتتا كونكۋرستاردىڭ جەڭىمپازى قارجى مينيسترلىگىنىڭ پورتالىندا قولدانىلاتىن رەيتينگتىك-بالدىق جۇيە ارقىلى ايقىندالاتىنىن ەسكە سالدى. بۇل جۇيەدە جەڭىمپاز اۆتوماتتى تۇردە انىقتالادى، وندا ادامي فاكتور جوق.
"كومپانيالار كونكۋرستاردا 30 پايىزدىق اۆانس قاراستىرىلعانىن كورىپ، شىن مانىندە تەك سول قاراجات ءۇشىن عانا قاتىسادى. سونىڭ كەسىرىنەن جوبالاردى جۇزەگە اسىرۋ مەرزىمى سوزىلىپ كەتەدى، ال تاپسىرىس بەرۋشى كومپانيا قۇرىلتايشىلارىن باسقا قالالاردان ىزدەۋگە ءماجبۇر بولادى"، – دەدى مەگاپوليس باسشىسى.
وسىعان بايلانىستى الماتى قالاسىنىڭ اكىمدىگى اۆانستىق تولەمنەن باس تارتۋ تۋرالى شەشىم قابىلدادى. "مۇنداي جاعداي ەندى قايتالانباۋى ءۇشىن ءبىز ناقتى شەشىم قابىلدادىق: الدىمەن جۇمىس ورىندالادى، سودان كەيىن عانا تولەم جاسالادى. اۆانسسىز"، – دەدى الماتى اكىمى.
جاڭا تاجىريبە مەردىگەر ۇيىمداردىڭ جاۋاپكەرشىلىگىن ارتتىرۋعا، ولاردىڭ جوبالارعا ناقتى قاتىسۋىن قامتاماسىز ەتۋگە، سونداي-اق قالاداعى قۇرىلىس جانە ينفراقۇرىلىمدىق جۇمىستاردى ۋاقىتىلى ورىنداۋعا مۇمكىندىك بەرمەك.