الماتىدا اۋماقتىق دامۋداعى سايكەسسىزدىكتى جويۋ ماقساتىندا قالالىق پوليورتالىقتاردى قۇرۋ جۇمىستارى باستالدى. ءاربىر پوليورتالىق ادامدار ءجيى باراتىن جەكە ورىنعا اينالىپ، تۇرعىنداردى سەنىمدى ينفراقۇرىلىممەن قامتاماسىز ەتەدى. بۇل تۋرالى ورتالىق كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى مالىمدەدى.
"جوبانىڭ نەگىزىندە قالالىق بەلسەندىلىككە ارنالعان جاڭا ورتالىقتار قۇرۋ يدەياسى جاتىر. پوليورتالىقتاردىڭ دامۋ تۇجىرىمداماسىن حالىقارالىق ساراپشىلار ازىرلەدى. باستى باسىمدىق – "شىعىس قاقپاسى" مەن "باتىس" پوليورتالىقتارىن قالىپتاستىرۋ. بۇل اۋماقتاردا تاقىرىپتىق ويىن-ساۋىق پاركى، الماتى سۋ ارناسى، Almaty AI Park، EXPO Center، جاڭا ستاديون جانە باسقا دا نىسانداردى ورنالاستىرۋ جوسپارلانعان. اتالعان جوبالاردى جۇزەگە اسىرۋ قالا اۋماقتارىن بىردەي دامىتۋعا، تاريحي ورتالىققا تۇسەتىن جۇكتەمەنى ازايتۋعا جانە بارلىق اۋدانداعى قالالىق ورتانىڭ ساپاسىن ارتتىرۋعا مۇمكىندىك بەرەدى"، - دەدى الماتى اكىمى.
سونىمەن قاتار دارحان ساتىبالدى مەملەكەت باسشىسىنىڭ تاپسىرماسىنا سايكەس قالانىڭ باس جوسپارىنا تۇزەتۋلەر ەنگىزىلىپ جاتقانىن اتاپ ءوتتى. بۇل رەتتە قالانىڭ جوعارعى بولىگىندە كوپقاباتتى تۇرعىن ءۇي سالۋعا بۇعان دەيىن ەنگىزىلگەن موراتوريي تالاپتارى ەسكەرىلگەن. اتالعان قۇجاتتى بيىل 24-27 جەلتوقسان ارالىعىندا قوعامدىق تالقىلاۋعا شىعارۋ جوسپارلانىپ وتىر.