الماتى اكىمدىگىندە مەديسينا قىزمەتكەرلەرى كۇنىنە وراي قالا اكىمى دارحان ساتىبالدى مەن دارىگەرلەردىڭ كەزدەسۋى ءوتتى. قالانىڭ دەنساۋلىق ساقتاۋ جۇيەسىن دامىتۋعا قوماقتى ۇلەس قوسقان دارىگەرلەرگە قازاقستان رەسپۋبليكاسى پرەزيدەنتىنىڭ اتىنان مەملەكەتتىك ناگرادالار تابىستالدى.
ماراپات ۇزاق جىلدار بويىنا مەديسينا سالاسىندا اتقارعان ادال جۇمىستارى، جوعارى كاسىبي بىلىكتىلىگى ءۇشىن بەرىلدى.
III دارەجەلى «بارىس» وردەنىمەن مەديسينا عىلىمدارىنىڭ دوكتورى، مەملەكەت قايراتكەرى ۆاسيليي ديەۆياتكو ماراپاتتالدى. «پاراسات» وردەنىن «ۇلتتىق مەديسينالىق قاۋىمداستىق» رەسپۋبليكالىق قوعامدىق بىرلەستىگىنىڭ پرەزيدەنتى ايجان سادىقوۆا الدى. «قۇرمەت» وردەنىمەن ا.ن.سىزعانوۆ اتىنداعى ۇعحو جالپى حيرۋرگيا ءبولىمىنىڭ مەڭگەرۋشىسى ەرلىك نۇرلانبايەۆ ماراپاتتالدى. «قازاقستاننىڭ ەڭبەك سىڭىرگەن دارىگەرى» قۇرمەتتى اتاعى وتورينولارينگولوگ-دارىگەر ايسۇلۋ نۇرماعامبەتوۆاعا بەرىلدى.
دارحان ساتىبالدى دەنساۋلىق ساقتاۋ سالاسىنىڭ تۇراقتى دامۋى كاسىبي بىلىكتى، ىسىنە شىنايى بەرىلگەن ءارى مىقتى مامانداردىڭ ارقاسىندا ەكەنىن ءوتىپ، مەملەكەت باسشىسىنىڭ اتىنان بارلىق مەديسينا قىزمەتكەرىنە جانكەشتى ەڭبەگى ءۇشىن العىس ايتتى.
«ءبىز ءۇشىن ساپالى مەديسينالىق كومەكتىڭ قالانىڭ بارلىق اۋداندارىندا قولجەتىمدى بولۋى ماڭىزدى. ءبىز ەل پرەزيدەنتى بەلگىلەگەن باعىتتى جالعاستىرامىز. اتاپ ايتساق، ينفراقۇرىلىمدى جاڭارتۋ، مەكەمەلەردى تەحنيكالىق قايتا جاراقتاندىرۋ، كادرلىق الەۋەتتى دامىتۋ جانە اۋرۋحانالاردا دا، ەمحانالاردا دا مەديسينالىق قىزمەتتىڭ قولجەتىمدىلىگىن ارتتىرۋ»، - دەدى الماتى اكىمى كەزدەسۋگە قاتىسۋشىلارعا ارناعان سوزىندە.