الماتى اكىمى ەربولات دوسايەۆ اۋەزوۆ اۋدانىنىڭ تۇرعىندارىمەن ەسەپتىك كەزدەسۋدە ينجەنەرلىك ينفراقۇرىلىمنىڭ دامۋ قارقىنى تۋرالى ايتىپ بەردى، دەپ حابارلايدى اlmaty-akshamy.kz
سۋمەن جابدىقتاۋ جانە سۋ بۇرۋ جەلىلەرىنىڭ قۇرىلىسى تۋرالى ايتا كەلە، قالا باسشىسى بيىل تامىز ايىندا اۋداندا 27 شاقىرىم سۋمەن جابدىقتاۋ جانە 22 شاقىرىم سۋ بۇرۋ جەلىلەرىن سالۋ بويىنشا ءىرى جوبالاردىڭ ءبىرى ىسكە اسىرىلا باستالاتىنىن ايتتى. سونىمەن قاتار، جەلىلەر 90-شى جىلدارى قالاعا قوسىلعان اۋماقتاردا سالىنادى. بۇل دۋبوك، شكولنيك جانە مامىر شاعىن اۋداندارىنىڭ جەكە سەكتورى، جاندوسوۆ – ساين – شالياپين كوشەلەرىنىڭ جانە قارعالى وزەنىنىڭ الاڭىندا. مۇندا بۇگىنگى كۇنگە دەيىن «شارۋاشىلىق ءادىس» دەپ اتالاتىن ستاندارتتارعا سايكەس سالىنباعان قۇبىرلار قولدانىلادى. 2025 جىلدىڭ سوڭىنا جوسپارلانعان جوبا اياقتالعاننان كەيىن اۋداننىڭ 12 مىڭ تۇرعىنى ساپالى ۇزدىكسىز سۋمەن جانە سۋ بۇرۋمەن قامتاماسىز ەتىلەدى.
بۇعان قوسا، بيىل شىلدە ايىندا مامىر-4 شاعىن اۋدانىندا 750-گە جۋىق تۇرعىنى بار 197 ءۇيدى قامتيتىن 4،5 كم سۋمەن جابدىقتاۋ جانە 9،5 كم سۋ بۇرۋ جەلىلەرىنىڭ قۇرىلىسى باستالدى. 2025 جىلدىڭ قىركۇيەك ايىندا اياقتالادى.
قازان ايىندا ساين كوشەسىندە جۇبانوۆ كوشەسىنەن تولە بي كوشەسىنە دەيىن جانە تولە بي كوشەسىندە ساين كوشەسىنەن وتەگەن باتىر كوشەسىنە دەيىن 2،1 كم سۋ قۇبىرى جەلىلەرىن قايتا جاڭارتۋدى اياقتاۋ جوسپارلانۋدا.
سونداي-اق، مەگاپوليس باسشىسى تۇرعىنداردىڭ الدىڭعى كەزدەسۋلەردە كوتەرگەن سۋمەن قامتاماسىز ەتۋ ماسەلەلەرىنىڭ شەشىلگەنى تۋرالى حابارلادى. ماسەلەن، بۇگىندە تولە بي جانە ۇلىقبەك كوشەلەرىندە ساين كوشەسىنەن مومىش ۇلى كوشەسىنە دەيىنگى ۋچاسكەدە 5 كم سۋ قۇبىرىن سالۋ جۇمىستارى اياقتالدى. سونداي-اق، بۇرىنعى «ۆوسحود»، «سادوۆود»، «ارداگەر» باۋ-باقشا سەرىكتەستىكتەرىنىڭ 8 كوشەسىندە 5،2 كم سۋمەن جابدىقتاۋ جانە سۋ بۇرۋ جەلىلەرىنىڭ قۇرىلىسى ءبىتتى. وسى ايدىڭ سوڭىنا دەيىن ولاردى جالپىقالالىق جەلىلەرگە ەنگىزۋ بويىنشا جۇمىستاردى اياقتاۋ جوسپارلانۋدا. وسىلايشا، 117 جەكە ءۇيدىڭ تۇرعىندارى ورتالىق سۋمەن جانە كارىزبەن قامتىلادى.
ايتا كەتۋ كەرەك، تۇزەتۋ ەنگىزۋ كەزىندە 2017 جىلى باستالعان دوستىق شاعىن اۋدانىندا سۋ قۇبىرى مەن كارىز قۇرىلىسى ۋاقىتشا توقتاتىلدى. جوبادا سۋ بۇرۋ بويىنشا 22 كوشە جانە سۋمەن جابدىقتاۋ بويىنشا 3 كوشە قامتىلماي قالعان. جۇمىستار بيىل تامىز ايىندا رابات، ۆينوگرادنايا جانە داستان كوشەلەرىندە سۋ قۇبىرى جەلىلەرىنىڭ قۇرىلىسىن، سونداي-اق جەلىلەر تارتىلعان سوڭ كوشەلەردىڭ بۇكىل ەنى بويىنشا جول جابىنىن قالپىنا كەلتىرىلەدى. قۇرىلىستى اياقتاۋ 2025 جىلدىڭ سوڭىنا دەيىن جوسپارلانعان. ورتالىق كوممۋنيكاسيالارمەن 759 جەكە ءۇي قامتىلادى، وندا 3650 تۇرعىن تۇرادى.
سونىمەن قاتار، اۋداندا جىلۋمەن جابدىقتاۋ جۇيەسىن جاڭعىرتۋ جالعاسۋدا. 30 جىل بۇرىن سالىنعان ساين، شالياپين كوشەلەرى مەن التىنسارين داڭعىلى بويىنداعى 6،5 كم جىلۋ جەلىلەرى قايتا جاڭعىرتىلۋدا. جۇمىستار جىل سوڭىنا دەيىن اياقتالادى.
الماتى اكىمى قالا تۇرعىندارىنا ساپالى كوممۋنالدىق قىزمەت كورسەتۋ ماقساتىندا ينجەنەرلىك ينفراقۇرىلىمدى جاڭعىرتۋ باسىم مىندەت ەكەنىن اتاپ ءوتتى.