قالا اكىمى اۋەزوۆ اۋدانىندا قۇرىلاتىن جاڭا قوعامدىق كەڭىستىكتەر تۋرالى ايتتى
الماتىنىڭ اۋەزوۆ اۋدانىندا ءتورت جايلى قوعامدىق كەڭىستىك پايدا بولادى. بۇل تۋرالى اۋەزوۆ اۋدانىنىڭ تۇرعىندارىمەن وتكەن كەزدەسۋدە قالا اكىمى ەربولات دوسايەۆ مالىمدەدى، دەپ حابارلايدى almaty-akshamy.kz
جايلى دەمالىس ايماعى اقساي-4، مامىر-3، 4، جەتىسۋ-3 ىقشاماۋداندارى مەن №7، 12 ىقشاماۋدانداردا قۇرىلادى. قۇرىلىس جۇمىسى وسى جىلدىڭ تامىز ايىندا باستالادى. ءتورت جوبانى جۇزەگە اسىرۋعا 4 ملرد تەڭگە ءبولىندى.
اقساي-4 ىقشاماۋدانىندا مارعۇلان مەن ۇلىقبەك كوشەلەرىنىڭ اراسىنداعى جالپى اۋدانى 3،3 گا بولاتىن قولدانىستاعى سكۆەر اباتتاندىرىلادى. بوس ايماق ادام كوپ شوعىرلانعان اۋداننىڭ ىشىندە ءارى الەۋمەتتىك نىساندارعا جاقىن ورنالاسقان. ءقازىر بۇل ۋچاسكەدە دەمالىس ورنى، سپورت پەن ويىن الاڭدارى جوق. سونىمەن قاتار، جارىقتاندىرۋ مەن تروتۋارلار زاماناۋي تالاپقا ساي ەمەس.
جوبادا 14،3 مىڭ شارشى مەترگە اسفالت، 4،6 مىڭ شارشى مەترگە تروتۋار توسەۋ ارقىلى جايلى دەمالىس ايماعىن قۇرۋ كوزدەلگەن. سونداي-اق 16،2 مىڭ شارشى مەتر اۋماقتى كوگالداندىرۋ جوسپاردا بار. سەرۋەندەۋ ايماعىنىڭ بويىندا ءتورت بالالار ويىن الاڭى مەن سپورت الاڭى قۇرىلىپ، 45 شام، 50 ورىندىق پەن 46 ۋرنا ورناتۋ جوسپاردا بار. قۇرعاق سۋبۇرقاق تا ورناتىلادى.
مامىر-3، 4 ىقشاماۋداندارىندا شالياپين كوشەسى بويىنشا مومىش ۇلى مەن ساين كوشەلەرىنىڭ اراسىنداعى جالپى اۋدانى 3،6 گا اباتتاندىرىلعان جاياۋ جۇرگىنشىلەر ايماعى بار ۋچاسكەدە كۇردەلى جوندەۋ جۇمىسى جوسپارلانعان. قاراۋسىز ايماق ادام كوپ شوعىرلانعان ايماقتىڭ ىشىندە، الەۋمەتتىك نىسانداردىڭ جانىندا ورنالاسقان. قاربالاس ۋاقىتتا كولىك پەن جاياۋ جۇرگىنشىلەر جۇكتەمەسى جوعارى.
جوبا اياسىندا جالپى اۋدانى 13،2 مىڭ شارشى مەتر اسفالت جابىنى، 6،5 مىڭ شارشى مەترگە تروتۋار جابىنى توسەلگەن جايلى سەرۋەندەۋ ايماعى قۇرىلادى. سونداي-اق 3 مىڭ شارشى مەتر اۋماقتى كوگالداندىرۋ جوسپاردا بار. جاياۋ جۇرگىنشىلەر ايماعىنىڭ پەريمەترى بويىنشا 3 بالالار ويىن جانە سپورت الاڭى، 3 اسپالى بەسەدكا، 137 شام، 46 ورىندىق پەن 32 ۋرنا قويىلادى.
جەتىسۋ-3 ىقشاماۋدانىندا اباي داڭعىلىنان مومىش ۇلى كوشەسىنە شىعاتىن №61 ۇيگە دەيىنگى ۋچاسكە اباتتاندىرىلادى. بۇل ۋچاسكەدە ءقازىر ۇيىمداستىرىلعان جاياۋ جۇرگىنشىلەر ايماعى جوق، سونداي-اق رەتتەلمەگەن كولىك اعىندارى بايقالادى. ۋچاسكەنىڭ جالپى اۋدانى 2،1 گا قۇرايدى.
جوبادا 10 دەمالىس ايماعى، بالالار مەن سپورت الاڭى بار جاڭا قوعامدىق كەڭىستىك قۇرۋ كوزدەلگەن.
№7 ىقشاماۋدانىندا التىنسارين داڭعىلىنان يانتارنىي كوشەسىنە دەيىن جانە اباي داڭعىلىنان №12 ىقشاماۋدانىنداعى №16 ۇيگە دەيىن جالپى اۋدانى 5،1 گا ۋچاسكە اباتتاندىرىلادى.
بۇل ۋچاسكە سونىمەن قاتار بوس ەمەس اۋدانداردىڭ ىشىندە ورنالاسقان، وندا دەمالۋعا جانە سەرۋەندەۋگە ورىن جوق.
تۇرعىندارعا ىڭعايلى بولۋ ءۇشىن تروتۋار كەڭىستىگى كەڭەيتىلەدى. بۇل 8 بالالار ويىن الاڭى مەن 9 سپورت الاڭى بار 12 الاڭدى جابدىقتاۋعا مۇمكىندىك بەرەدى. سونداي-اق 130 شام، 68 ورىندىق پەن 44 ۋرنا ورناتىلادى. جوبا اياسىندا 5،2 مىڭ شارشى مەترگە اسفالت توسەلىپ، 6 مىڭ شارشى مەترگە تروتۋار پليتكالارى سالىنادى.
جاڭا دەمالىس ايماعى ىرگەلەس تۇرعان ءۇي الاپتارىنىڭ تۇرعىندارىنىڭ دەمالىپ، جايلى سەرۋەندەۋى ءۇشىن قولايلى جاعدايلارمەن قامتاماسىز ەتەدى.