الماتى اكىمى دارحان ساتىبالدى الاتاۋ اۋدانىنا جاساعان جۇمىس ساپارى بارىسىندا «ايگەرىم-1،2» جانە «شاڭىراق-1» شاعىناۋداندارىنىڭ تۇرعىندارىمەن كەزدەستى.
تۇرعىندار اۋىزسۋ جانە كارىز جەلىلەرىنىڭ قۇرىلىسى باياۋ ءجۇرىپ جاتقانىنا نارازىلىق ءبىلدىردى.
«ايگەرىم-1،2» شاعىناۋدانىندا تاراتۋ جەلىلەرىنىڭ قۇرىلىسى جۇرگىزىلىپ جاتىر. جوبانى جۇزەگە اسىرۋ 2021 جىلى باستالعان. سۋ قۇبىرىنىڭ جالپى ۇزىندىعى – 104،5 شاقىرىم، كارىز جەلىسى – 29،5 شاقىرىم. قالا اكىمى جۇمىستىڭ ورىندالۋ قارقىنىنا كوڭىلى تولماي، باقىلاۋدى كۇشەيتۋدى تاپسىردى. قۇرىلىستى اياقتاۋ كەلەسى جىلعا جوسپارلانعان.
بۇدان بولەك، دارحان ساتىبالدى كوشەلەردى اسفالتتاۋدى سوزا بەرمەي، جەلى قۇرىلىسى بىتكەن اۋماقتارعا جول جابىندىسىن كەزەڭ-كەزەڭىمەن توسەۋدى، ال جۇمىس ءالى ءجۇرىپ جاتقان ۋچاسكەلەردە ۋاقىتشا اسفالت قيىرشىعىن پايدالانۋدى تاپسىردى.
سونىمەن قاتار، «شاڭىراق-1» شاعىناۋدانىندا تۇرعىندارمەن كەزدەسۋ ءوتتى. مۇندا دا تاراتۋ جەلىلەرىن سالۋ جوباسى جۇزەگە اسىرىلىپ جاتىر. جوبا بويىنشا ۇزىندىعى 45،7 شاقىرىم سۋ قۇبىرى، 53،8 شاقىرىم كارىز جەلىسى جانە 10 كارىزدىك-سورعى ستانسياسى سالىنىپ، 2،2 مىڭنان استام تۇتىنۋشى قامتىلۋى ءتيىس.
تۇرعىندار جوبانىڭ ۇزاققا سوزىلعانىنا شاعىمداندى. الماتى اكىمى جۇمىستى ەكى اي مەرزىمىندە اياقتاۋدى تاپسىردى. سونىمەن قاتار، تۇرعىنداردىڭ ءوتىنىشى بويىنشا باستاپقى جوباعا كىرمەگەن ءتورت كوشەگە اسفالت توسەلەدى. ينجەنەرلىك جەلىلەر تارتىلىپ بىتكەن ۋچاسكەلەردە دە كەزەڭ-كەزەڭىمەن جول جابىندىسى توسەلەدى.
جەرگىلىكتى حالىق جول قاۋىپسىزدىگى، كوشە جارىعى، بالالار الاڭقايلارىن سالۋ جانە وزگە دە ماسەلەلەردى كوتەردى. دارحان ساتىبالدى جاۋاپتى باسقارمالارعا ولاردى شەشۋ جولدارىن قاراستىرىپ، تۇراقتى باقىلاۋدا ۇستاۋدى تاپسىردى.