ماسەلەنىڭ تامىرى تەرەڭدە جاتىر.
الماتىدا ماگيسترالدى سۋ قۇبىرىنداعى تۇراقتى اۆاريالاردىڭ سالدارىنان «نۇرلى دالا» تۇرعىن ءۇي كەشەنىنىڭ تۇرعىندارى اۋىز سۋسىز قالدى. بۇل تۋرالى الماتى قالاسىنىڭ اكىمى ەربولات دوسايەۆ ناۋرىزباي اۋدانىنىڭ تۇرعىندارىمەن كەزدەسۋى كەزىندە ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قالا اكىمىنىڭ ايتۋىنشا، ماسەلەنىڭ تامىرى تەرەڭدە جاتىر.
«2019 جىلى مەردىگەر ۇيىم «الماتى ينجستروي» جاڭا سۋ قۇبىر جەلىلەرىن جۇرگىزۋ كەزىندە بولات قۇبىرلاردى ديامەترى 600 ميلليمەتر (ۇزىندىعى 5 كم) شىنى-پلاستيك قۇبىرعا اۋىستىرعان. وسىدان سوڭ سۋ جەلىسىندە اپاتتى جاعدايلار كوبەيىپ كەتتى. 2019 جىلدان باستاپ بۇل ۋچاسكەدە 28 اپات تىركەلدى (بيىل 15 اپات). اتالعان ماسەلەنى شەشۋ ءۇشىن الماتى قالاسىنىڭ اكىمدىگى ۋاقىتشا سۋ قۇبىرىن جۇرگىزۋ تۋرالى شەشىم قابىلدادى»،- دەدى ەربولات دوسايەۆ.
بۇل رەتتە قالا اكىمىنىڭ تاپسىرماسىمەن 19 قازاندا مەردىگەر ۇيىم Qazaq Stroy «نۇرلى دالا» تۇرعىن ءۇي كەشەنىن تۇراقتى سۋمەن جابدىقتاۋ ءۇشىن ۇزىندىعى 400 مەتر، ديامەترى 325 ميلليمەتر ۋاقىتشا سۋ قۇبىرىن جۇرگىزۋگە كىرىستى. جۇمىستار قاراشا ايىنىڭ سوڭىنا دەيىن اياقتالادى دەپ كۇتىلۋدە.
«بۇل ماقساتقا الماتى قالاسى اكىمدىگىنىڭ رەزەرۆىنەن 102 ملن تەڭگە ءبولىندى. سونداي-اق، مەردىگەر ۇيىم «الماتى ينجسترويعا» قاتىستى ءتيىستى ماتەريالدار قىلمىستىق ءىس قوزعاۋ ءۇشىن زاڭ قورعاۋ ورگاندارىنا بەرىلدى»،- دەدى الماتى قالاسىنىڭ اكىمى ەربولات دوسايەۆ.