الماتىدا وتكەن دجەننيفەر لوپەستىڭ كونسەرتى قورىتىندىلاندى. ورتالىق ستاديونداعى اۋقىمدى شوۋعا 27 مىڭ كورەرمەن جينالعان. ونىڭ شامامەن 7 مىڭى تمد ەلدەرىنەن باستاپ اقش، كانادا، تۇركيا، جاپونيا، جۇڭگو، گەرمانيا، ۇلىبريتانيا، فرانسيا سەكىلدى 35 مەملەكەتتەن ارنايى كەلگەن.
بيلەت باعاسى 40 مىڭنان 180 مىڭ تەڭگەگە دەيىن جەتكەن. ۇيىمداستىرۋشىلاردىڭ الدىن الا جاساعان ەسەبى بويىنشا بۇل ءىس-شارادان بيۋدجەتكە تۇسەتىن سالىق كولەمى 600 ملن تەڭگە شاماسىندا بولماق.
Up All Night تۋرى اياسىندا التى اپتا بويى الەم ەلدەرىندە دجەننيفەر لوپەستىڭ كونسەرتتەرىندە باس رەجيسسور بولعان كريستيان لامب پەن الماتى، استانا جانە تاشكەنت قالالارىندا ارتيستپەن بىرگە جۇمىس ىستەگەن تەحنيكالىق ديرەكتور گريگوريي انتروپوۆ الماتىداعى ساحنانىڭ، شوۋ وتكەن الاڭنىڭ دايىندىعىن بارلىق الاڭداردىڭ ىشىندەگى ەڭ ۇزدىگى دەپ اتاپ، ۇيىمداستىرۋشىلار ەڭبەگىن جوعارى باعالادى. بۇل تۋرالى First Media Group وكىلى مالىمدەدى.
«الەمدىك دەڭگەيدەگى جۇلدىزدىڭ كومانداسىنان مۇنداي جوعارى باعا الۋ بىزگە ۇلكەن شابىت بەرەدى. دجەننيفەر لوپەستىڭ كونسەرتىن جوعارى دەڭگەيدە وتكىزە العانىمىزعا قۋانىشتىمىز.
ءبىز ءوز تاراپىمىزدان كونسەرتتەن كەيىن تالداۋ جۇمىستارىن جۇرگىزدىك. الداعى ۋاقىتتا ەسكەرىپ، جەتىلدىرۋگە بولاتىن تۇستارى دا بار ەكەنىن بىلەمىز. سول ءۇشىن كەلەشەكتە ودان دا جوعارى دەڭگەيگە شىعۋ ماقساتىندا ناقتى جوسپار قۇرىپ جاتىرمىز. كونسەرتكە كەلىپ، پىكىر بىلدىرگەن بارلىق كورەرمەنگە العىس ايتامىز»، — دەدى First Media Group باسقارۋشى ديرەكتورى ءالفيا نۇرعۇماروۆا.
ءىس-شارانىڭ قالا ەكونوميكاسىنا تيگىزگەن اسەرى دە اۋقىمدى. Mastercard تولەم جۇيەسىنىڭ دەرەگىنە سۇيەنسەك، شەتەلدىك تۋريستەر الماتىدا ورتا ەسەپپەن ءۇش جارىم كۇن ايالداپ، تاۋلىگىنە شامامەن 440 دوللاردى ءقوناقۇي، تاماق، كولىك، ەكسكۋرسيا جانە ساۋداعا جۇمسايدى. كونسەرت كۇندەرى تەك شەتەلدىك قوناقتار قالاعا شامامەن 5 ميلليارد تەڭگەدەن استام تابىس اكەلدى.
بۇل ۋاقىتتا مەيرامحانالار، كوفەحانالار، قوناقۇيلەر مەن ءتۇرلى كولىك كومپانيالارى دا قوسىمشا پايدا تاپتى. تاعى ءبىر مىسال، كونسەرت وتكەن كۇنى ستاديون اۋماعىنداعى فۋد-كورت 15 ميلليون تەڭگە تابىس تاپقان.
تۋريزم باسقارماسىنىڭ پايىمداۋىنشا، كورەرمەندەردىڭ شىعىنى مەن جاناما كىرىستەردى قوسا ەسەپتەگەندە، كونسەرتتەن قالاعا تۇسكەن تابىس اينالىمى 10 ميلليارد تەڭگەدەن اسادى. مۇنداي مادەني ءىس-شارالار قالا قازىناسىنا قوماقتى كىرىس اكەلىپ قانا قويماي، الماتىنىڭ تۋريستىك تارتىمدىلىعىن ارتتىرىپ، ونى الەمدىك گاسترول كارتاسىنداعى ماڭىزدى ورتالىق رەتىندە نىعايتادى.