الماتى اكىمى دارحان ساتىبالدى ءماسليحات وتىرىسىندا 2026–2030 جىلدارعا ارنالعان دامۋ جوسپارىن ۇسىنىپ، قالانىڭ جالپى وڭىرلىك ءونىمىن 70 ترلن تەڭگەگە دەيىن جەتكىزۋ، كولىك جۇيەسىن جاڭعىرتۋ جانە ەكولوگيالىق جاعدايدى ايتارلىقتاي جاقسارتۋ ماقساتىن جاريالادى، - دەپ حابارلايدى aqshamnews.kz ءتىلشىسى.
الماتى قالاسىنىڭ اكىمى دارحان ساتىبالدى 10 جەلتوقساندا وتكەن ءماسليحات وتىرىسىندا 2026–2030 جىلدارعا ارنالعان دامۋ جوسپارى مەن 2026–2028 جىلدارعا ارنالعان بيۋدجەتتى تانىستىردى. سوڭعى بەس جىلدا قالا حالقى 2،3 ميلليون ادامعا دەيىن ءوسىپ، ەكونوميكانىڭ ورتاشا جىلدىق ءوسىمى 6،8 پايىزدى قۇرادى، ال جۇمىسسىزدىق 5،2 پايىزدان 4،4 پايىزعا دەيىن تومەندەدى.
اكىم الداعى بەس جىلدا الماتىنىڭ جالپى وڭىرلىك ءونىمىن ەكى ەسە كوبەيتىپ، 70 تريلليون تەڭگەگە جەتكىزۋ مىندەتى قويىلعانىن ايتتى. بۇل ءۇشىن ەكونوميكانىڭ ناقتى ءوسىمى جىل سايىن كەمىندە 6 پايىز بولۋعا ءتيىس. ءداستۇرلى سالالارمەن قاتار تۋريزم، IT-سەكتور، كرەاتيۆتى يندۋستريالار مەن وڭدەۋشى ونەركاسىپ جاڭا ءوسۋ درايۆەرلەرى رەتىندە بەلگىلەنگەن. شاعىن جانە ورتا بيزنەستىڭ جوو-دەگى ۇلەسىن 60 پايىزدان 65 پايىزعا دەيىن ارتتىرۋ جوسپارلانىپ، جەڭىلدەتىلگەن رەجيمدەگى كاسىپكەرلەر ءۇشىن مولشەرلەمە 4 پايىزدان 3 پايىزعا دەيىن تومەندەتىلگەنى اتاپ ءوتىلدى.
قالا دامۋىنىڭ ماڭىزدى باعىتى – كولىك ينفراقۇرىلىمىن جاڭعىرتۋ. جوسپارعا مەترونى كەڭەيتۋ، BRT جانە LRT جەلىلەرىن ىسكە قوسۋ، قوعامدىق كولىكتىڭ جاڭا تۇرلەرىن ەنگىزۋ كىرەدى. بۇل 2030 جىلعا قاراي قوعامدىق كولىكپەن جاسالاتىن تاۋلىكتىك ساپار سانىن 1،7 ميلليوننان 3 ميلليونعا دەيىن ۇلعايتۋعا مۇمكىندىك بەرەدى. سونىمەن قاتار، بەس قالالىق پوليسەنتر قالىپتاستىرۋ ارقىلى تاريحي ورتالىققا تۇسەتىن جۇكتەمەنى ازايتىپ، بارلىق اۋدانداردا قالالىق ورتانىڭ ساپاسىن ارتتىرۋ كوزدەلگەن.
ەكولوگيالىق باعىتتا №2 جىلۋ ەلەكتر ورتالىعىن 2026 جىلدىڭ اياعىنا دەيىن گازعا كوشىرۋ، كەيىن №3 جەو-نى بۋ-گاز تەحنولوگياسىنا اۋىستىرۋ جوسپارلانىپ وتىر. بۇل جىلۋ كوزدەرىنەن شىعاتىن زياندى شىعارىندىلاردى 92 پايىزعا دەيىن قىسقارتۋعا مۇمكىندىك بەرەدى. جەكە سەكتوردى گازداندىرۋ دەڭگەيى ءقازىر 99،6 پايىزدى قۇراپ، 2027 جىلعا قاراي 100 پايىزعا جەتكىزۋ جوسپارلانعان. اكىمنىڭ ايتۋىنشا، ۇسىنىلعان جوسپار مەملەكەت باسشىسىنىڭ تاپسىرمالارىنا ساي الماتى تۇرعىندارىنىڭ ءومىر ءسۇرۋ ساپاسىن جاقسارتۋعا باعىتتالعان.