اۋداندا جالپى سانى 43 مەكتەپ جۇمىس ىستەيدى، ونىڭ 29-ى مەملەكەتتىك تە، 14ء-ى جەكە مەنشىك مەكتەپ.
№58 مەكتەپكە قوسىمشا 600 ورىندىق جاپسارلاس جاي سالىنىپ جاتىر. №16 مەكتەپتە دە تۋرا وسىنداي 300 ورىندىق جاپسارلاس عيماراتتى سالۋدى باستادىق، ونىڭ قۇرىلىسى 2026 جىلدىڭ ەكىنشى توقسانىندا اياقتالىپ قالادى دەيدى، وڭىرلىك كوممۋنيكاسيالار قىزمەتىندە وتكەن پرەسس-كونفەرەنسيادا المالى اۋدانىنىڭ اكىمى ارمان شامشين.
بۇدان بولەك، اۋدانداعى 4 مەكتەپتى سەيسميكالىق تۇرعىدا بەرىك قىلۋ جۇمىسى دا قولعا الىنعان. بيىل №10، 13، 21، 43 پەن مەملەكەتتىڭ مەنشىگىنە قايتارىلعان «تەرەموك» بالاباقشاسىندا جوندەۋ مەن سەيسميكالىق كۇشەيتۋ جۇمىستارى باستالىپتى. اۋداندا جالپى 62 بالاباقشا جۇمىس ىستەيدى. ونىڭ 35- جەكە بالاباقشا دا، 29ء-ى مەملەكەتتىك تاپسىرىس بويىنشا جۇمىس ىستەيتىندەر.
«ءقازىر قۇرىلىس باسقارماسى تاستاق شاعىناۋدانىندا 240 ورىندىق جاڭا بالاباقشا سالۋ ءۇشىن بايقاۋ وتكىزىپ جاتىر. قۇرىلىسى بيىلعى تامىزدا باستالىپ، 2026 جىلدىڭ تامىزىندا اياقتالادى. سونىمەن بىرگە، 13 بالاباقشادا بيىل جوندەۋ جۇمىسىن باستايمىز»، - دەپ تولىقتىردى اكىم.
الەۋمەتتىك ينفراقۇرىلىمنىڭ تاعى ءبىر ماڭىزدى باعىتى – دەنساۋلىق ساقتاۋ. №3 قالالىق ەمحانا كۇردەلى جوندەۋدەن ءوتىپ، جاقىندا پايدالانۋعا بەرىلمەك. اۋداندا جالپى سانى 12 مەملەكەتتىك جانە 13 جەكە مەنشىك مەكەمە بار. المالى اۋدانىنىڭ دەنساۋلىق ساقتاۋ جۇيەسىنە رەسپۋبليكالىق جانە قالالىق ۇيىمدار كىرەدى، ولار تۇرعىندارعا ساپالى مەديسينالىق كومەك كورسەتىپ كەلەدى.
تورەكۇلوۆ كوشەسى مەن جىبەك جولى داڭعىلىندا ورنالاسقان ادام رەپرودۋكسياسى قالالىق ورتالىعىنىڭ ەكى كورپۋسىن جاڭالاۋ جۇمىستارى اياقتالىپ قالعان. قۇرىلىس باسقارماسى №1 پەرزەنتحانا قۇرىلىسى بويىنشا جانە ايتەكە بي – ماسانشى كوشەلەرىنىڭ قيىلىسىندا 500 ادام قابىلدايتىن ەمحانا قۇرىلىسى بويىنشا (مەملەكەتتىك ساراپتامانىڭ قورىتىندىسى 2025 جىلعى 14 ساۋىردە الىنعان، قۇرىلىس سوماسى – 9 301 ملن تگ) مەردىگەر ۇيىمدى انىقتاۋ ماقساتىندا بايقاۋ وتكىزىپ جاتىر. قۇرىلىس-مونتاج جۇمىستارىن شىلدە مەن قىركۇيەك ايىندا باستاۋ جوسپارلانىپتى. 2026 جىلدىڭ 4 توقسانىنا اياقتالماق.
«تاستاق اۋدانىندا، رايىمبەك داڭعىلى 312 مەكەنجايىندا ورنالاسقان مۇمكىندىگى شەكتەۋلى جاندارعا ارنالعان سپورت ورتالىعىنىڭ قۇرىلىسى ەرەكشە ماڭىزعا يە. كوپفۋنكسيالى بۇل ورتالىق ەرەكشە قاجەتتىلىگى بار ادامداردى ساۋىقتىرۋ مەن جاتتىقتىرۋعا ارنالعان. قۇرىلىس جۇمىستارى ماۋسىم ايىندا باستالدى. 2026 جىلدىڭ قاراشا ايىندا اياقتاۋدى جوسپارلاپ وتىرمىز. بيۋدجەتى – 3،9 ملرد تەڭگە»،- دەيدى اۋدان اكىمى.
اباي مەن ماسانشى كوشەسىنىڭ قيىلىسىنداعى عيماراتتى جاڭارتۋ جوباسى ازىرلەۋدىڭ سوڭعى كەزەڭىندە تۇر. اكىمدىكتەگىلەردىڭ ايتۋىنشا، بۇل جەردە بالالارعا ارنالعان كوپبەيىندى وڭالتۋ ورتالىعى ورنالاسپاق.
اۋدان اكىمدىگىمەن تەلەگرام كانال ارقىلى دا بايلانىسقا شىعا الاسىز. ول جەردە سۇراق قويىپ، مەكەنجايىڭىزدى كورسەتىپ، سۋرەتىڭىزدى قويساڭىز بولدى. تۇرعىنداردىڭ ءارىز-وتىنىشى بىردەن قابىلدانادى دەيدى، اكىمدىكتىڭ وكىلدەرى.