ۇكىمەت تۇرمىستىق زورلىق-زومبىلىق ءۇشىن جاۋاپكەرشىلىكتى كۇشەيتۋ جۇمىستارىن جالعاستىرادى
ق ر پرەمەر-مينيسترى ءاليحان سمايىلوۆ سەنات وتىرىسىنان كەيىنگى ب ا ق وكىلدەرىنە ارنالعان بريفينگ بارىسىندا وتباسىلىق-تۇرمىستىق قاتىناستار سالاسىنداعى قىلمىستار ءۇشىن جاۋاپكەرشىلىكتى كۇشەيتۋ شارالارى تۋرالى ايتتى، دەپ حابارلايدى almaty-akshamy.kz
ۇكىمەت باسشىسى اتاپ وتكەندەي، 2009 جىلى ەلىمىزدە «تۇرمىستىق زورلىق-زومبىلىق پروفيلاكتيكاسى تۋرالى» زاڭ قابىلداندى. قازاقستان تمد-دا وسىنداي زاڭ قابىلدانعان العاشقى ەل بولدى. كەيىنگى جىلدارى زاڭناماعا جاۋاپكەرشىلىكتى كۇشەيتۋ جاعىنا قاراي بىرنەشە رەت وزگەرىستەر ەنگىزىلدى.
«بيىل سوڭعى وزگەرىستەر قابىلداندى. اتاپ ايتقاندا، قاماۋعا الۋ مەرزىمى 5 تاۋلىكتەن 15 تاۋلىككە دەيىن، ال زاڭ بۇزۋشىلىق قايتالانعان جاعدايدا 25 تاۋلىككە دەيىن ۇزارتىلدى. سونىمەن قاتار قايتادان تاتۋلاسۋ مۇمكىندىگى الىنىپ تاستالدى جانە تۇرمىستىق جانجال بارىسىندا دەنساۋلىققا اۋىر نەمەسە ورتاشا زيان كەلتىرىلسە، ول ادام 3 جىلدان 6 جىلعا دەيىن باس بوستاندىعىنان ايىرىلادى»، — دەدى ءاليحان سمايىلوۆ.
سونىمەن بىرگە ول بۇرىن قابىلدانعان نورمالار ءوز ناتيجەسىن بەرىپ جاتقانىن ايتتى. سوڭعى 4 ايدا جاۋاپقا تارتىلعان وتباسىنىڭ شىرقىن بۇزۋشىلاردىڭ سانى ءوستى. ەگەر وسى جىلدىڭ ءىى توقسانىندا 7 مىڭ ادام جاۋاپكەرشىلىككە تارتىلسا، ءىىى توقساندا ولاردىڭ سانى 27 مىڭ ادامدى قۇرادى.
«زاڭناماداعى وزگەرىستەرگە سايكەس، ەندى جابىرلەنۋشى تاراپتىڭ مىندەتتى مالىمدەمەسى تالاپ ەتىلمەيدى. كۋاگەرلەردىڭ ايعاقتارى نەمەسە بەينەكامەرالاردان الىنعان جازبالار جەتكىلىكتى. كوبىنەسە جابىرلەنۋشى تاراپ ارىز جازبايدى، نە ونى قايتارىپ الادى. ەندى بۇل جاعداي تۇبەگەيلى وزگەردى. ءبىز قۇقىق قورعاۋ ورگاندارىنىڭ ستاتيستيكاسىنان وڭ ديناميكا كورىپ وتىرمىز»، — دەدى پرەمەر-مينيستر.
ءاليحان سمايىلوۆتىڭ ايتۋىنشا، اتالعان باعىتتاعى جۇمىستار جالعاسۋدا. قازان ايىنىڭ ورتاسىندا ۇكىمەتكە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى زاڭ جوباسى ۇسىنىلدى. تۇرمىستىق زورلىق-زومبىلىق ءۇشىن جاۋاپكەرشىلىكتى كۇشەيتۋگە باعىتتالعان تۇزەتۋلەردىڭ سانى 90-نان اسىپ تۇسەدى. ولاردىڭ باسىم بولىگى قولداۋ تاۋىپ، جاقىن ارادا زاڭ جوباسى ق ر پارلامەنتى ءماجىلىسىنىڭ قاراۋىنا ەنگىزىلمەك.
«ءوز باسىم ايەلدەرگە قاتىستى زورلىق-زومبىلىقتىڭ كەز كەلگەن تۇرىنە قارسىمىن. مەن دە قىز تاربيەلەپ وتىرمىن، ولاردىڭ ەلىمىزدە وزدەرىن ءقاۋىپسىز سەزىنگەنىن قالايمىن»، — دەدى پرەمەر-مينيستر.