ق ر پرەمەر-مينيسترى ءاليحان سمايىلوۆ ق ر پارلامەنتى سەناتىنىڭ وتىرىسىنان كەيىن وتكەن بريفينگ بارىسىندا زاڭسىز يەمدەلىنگەن جانە ەلدەن شىعارىلعان اكتيۆتەردى قايتارۋ جونىندەگى جۇمىس تۋرالى ايتىپ بەردى، دەپ حابارلايدى almaty-akshamy.kz
پرەمەر-مينيستر اكتيۆتەردى قايتارۋ جونىندەگى جۇمىس قابىلدانعان زاڭعا سايكەس ءجۇرىپ جاتقانىن جانە ول مەملەكەت باسشىسىنىڭ ساياسي جانە ەكونوميكالىق رەفورمالارىنىڭ قيسىندى جالعاسى ەكەنىن اتاپ ءوتتى. نەگىزگى مىندەت – الەۋمەتتىك ادىلدىكتى قالپىنا كەلتىرۋ، اكتيۆتەردى قايتارۋ جانە ولاردى رەسپۋبليكا ەكونوميكاسىنا جۇمىس ىستەۋگە باعدارلاۋ.
«ەكى جولى بار – ەرىكتى جانە ءماجبۇرلى تۇردە، ولار سوت شەشىمىنە سايكەس جۇزەگە اسىرىلادى. زاڭنىڭ كۇشى جۇرەتىن ادامدار توبى انىقتالعان. بۇل – اكىمشىلىك رەسۋرستاردى پايدالانىپ، اكتيۆتەردى زاڭسىز يەمدەنگەن ادامدار. ادال بيزنەسكە الاڭداۋعا نەگىز جوق»، — دەدى ءاليحان سمايىلوۆ.
ۇكىمەت باسشىسىنىڭ ايتۋىنشا، قايتارىلعان قاراجات الەۋمەتتىك سالاداعى ماڭىزدى جوبالاردى، سونداي-اق جاڭا جۇمىس ورىندارىن قۇرۋعا مۇمكىندىك بەرەتىن ينفراقۇرىلىمدىق جانە وندىرىستىك جوبالاردى ىسكە اسىرۋعا باعىتتالاتىن بولادى.
«بۇگىنگى تاڭدا شامامەن 1 ترلن تەڭگەنىڭ اكتيۆتەرى قايتارىلدى. ونىڭ ىشىندە شامامەن $600 ملرد-ى شەتەلدەن قايتارىلىپ وتىر. بۇل جۇمىس جالعاسۋدا»، — دەدى پرەمەر-مينيستر.