سالىقتىق اكىمشىلەندىرۋدى وڭايلاتۋعا ەرەكشە نازار اۋدارىلاتىن بولادى
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ينۆەستيسيالىق احۋالدى جاقسارتۋ جونىندەگى كەڭەستىڭ كەزەكتى وتىرىسىندا سالىقتىق اكىمشىلەندىرۋدى ودان ءارى دامىتۋ بويىنشا ۇسىنىستار قارالدى. Almaty-akshamy.kz بۇل تۋرالى primeminister.kz سايتىنا سىلتەمە جاساپ حابارلايدى.
ءىس-شاراعا قازاقستاندا اككرەديتتەلگەن اقش ەلشىسى دەنيەل روزەنبليۋم، ۇلىبريتانيا ەلشىسى كەتي ليچ، ەۋروپالىق وداق ەلشىسى كەستۋتيس يانكاۋسكاس، كانادا ەلشىسى الان حەمسون، قازاقستانداعى امەريكالىق ساۋدا پالاتاسىنىڭ اتقارۋشى ديرەكتورى دوريس برەدبەري، سونداي-اق ءىرى بيزنەستىڭ جانە ورتالىق مەملەكەتتىك ورگانداردىڭ وكىلدەرى قاتىستى.
پرەمەر-مينيستر ءوز سوزىندە ۇكىمەت مەملەكەتتىڭ شەكتەن تىس ارالاسۋدان باس تارتىپ، بارلىق قاتىسۋشىلار ءۇشىن تەڭ مۇمكىندىكتەردى قامتاماسىز ەتۋگە باعىتتالعان باسەكەگە قابىلەتتى نارىقتىق ەكونوميكا قۇرۋ باعىتىن جالعاستىراتىنىن اتاپ ءوتتى.
«بۇل باعىتتا شىنايى نارىقتىق باسەكەلەستىكتى كۇشەيتۋ، زاڭناما جانە سوت پراكتيكاسىن جەتىلدىرۋ، سونداي-اق سىبايلاس جەمقورلىققا قارسى كۇرەس جونىندەگى شارالار ىسكە اسىرىلىپ جاتىر. بۇل بيزنەستىڭ مۇددەلەرى مەن قۇقىقتارىن قورعاۋ جۇيەسىن ەداۋىر نىعايتادى، ينۆەستورلارعا كەڭ اۋقىمدى ەكونوميكالىق مۇمكىندىكتەر بەرەدى»، – دەدى ءاليحان سمايىلوۆ.
ۇكىمەت باسشىسى بيۋدجەت-سالىق ساياساتىن جەتىلدىرۋ ءۇشىن 2030 جىلعا دەيىنگى مەملەكەتتىك قارجىنى باسقارۋ تۇجىرىمداماسى قابىلدانعانىن، ال فيسكالدى ساياساتتى قايتا جاڭارتۋ ماقساتىندا 2023 جىلى جاڭا سالىق كودەكسى ازىرلەنەتىنىن اتاپ ءوتتى.
سالىق زاڭناماسىن جاقسارتۋ جۇمىستارىنىڭ بارلىعى سالىق تولەۋشىلەرمەن، ساراپشىلارمەن جانە حالىقارالىق كونسۋلتانتتارمەن تىعىز ىنتىماقتاستىقتا جۇرگىزىلەدى.
«بۇل رەتتە سالىقتىق اكىمشىلەندىرۋدى وڭايلاتۋعا جانە سيفرلاندىرۋعا، تابىستى رەينۆەستيسيالاۋ كەزىندە كورپوراتيۆتىك تابىس سالىعى بويىنشا جەڭىلدىكتەردى قولدانۋدى كەڭەيتۋگە ەرەكشە نازار اۋدارىلاتىن بولادى»، — دەدى ءاليحان سمايىلوۆ.
وتىرىس اياسىندا قاتىسۋشىلار سالىق ساياساتىنىڭ تيىمدىلىگىن ارتتىرۋ بويىنشا ۇسىنىمداردى، جاڭا سالىق كودەكسىن ازىرلەۋ، تاۋارلاردى كەدەندىك وڭدەۋ، زياتكەرلىك مەنشىك قۇقىقتارىن قورعاۋ، سونداي-اق قازاقستاندىق جانە شەتەلدىك كاسىپكەرلەر اراسىنداعى بيزنەس بايلانىستاردى نىعايتۋ ماسەلەلەرىن تالقىلادى.
قورىتىندىلاي كەلە، پرەمەر-مينيستر بارلىق ۇسىنىستار مەن ۇسىنىمداردى ءتيىستى مەملەكەتتىك ورگاندار پىسىقتايتىنىن اتاپ ءوتتى.
«قازاقستان ۇكىمەتى سالىق ساياساتىنىڭ بارلىق وزەكتى ماسەلەلەرى بويىنشا ينۆەستورلارمەن ىنتىماقتاستىقتى ودان ءارى جالعاستىرۋعا دايىن»، — دەپ تۇيىندەدى ول.