الەم قۇرعاقشىلىقتان زارداپ شەگە باستادى

اۋا رايىنىڭ قولايسىزدىعى شارۋالاردى ابىگەرگە سالىپ تۇر.

ەۋروپالىق ديقاندار ءزايتۇن تاپشىلىعىنان تارشىلىق كورسە، شري-لانكا حالقى كۇرىشسىز قالۋى مۇمكىن. ەۋروپا زايتۇنگە زار. تاپشىلىق اسىرەسە يسپانيا مەن يتاليا ەلدەرىندە بايقالادى. جەرگىلىكتى بيلىك وكىلدەرى بيىل ءوندىرىس كولەمىنىڭ 20 پايىزعا تومەندەيتىنىن العا تارتادى. شارۋالاردىڭ ايتۋىنشا، مۇنداي جاعدايعا ءبىرىنشى كەزەكتە قۇرعاقشىلىق اسەر ەتكەن، دەپ حابارلايدى Almaty-akshamy.kz 24.kz-كە سىلتەمە جاساپ.

بۇل ءوز كەزەگىندە ءزايتۇننىڭ قىمباتتاۋىنا تۇرتكى بولىپ وتىر. بىلتىرمەن سالىستىرعاندا باعا كادىمگىدەي ءوسىپ كەتكەن. ماسەلەن، يتاليا مەن پورتۋگاليادا كوتەرمە ساۋدا باعاسى 2 ەسە وسسە، گرەكيادا ءزايتۇننىڭ ءبىر كەلىسى 8 ەۋرودان ساۋدالانىپ جاتىر.

فرانسيا:

فرانسيالىق شارۋالار دا شىعىنعا باتتىق دەپ شىرىلداپ وتىر. ويتكەنى اپتاپ ىستىقتان ءجۇزىم القاپتارى قۋراپ كەتكەن. سونىڭ سالدارىنان بيىلعى ءونىم 10-20 پايىزعا تومەن بولادى دەيدى. تىعىرىققا تىرەلگەن شاراپ وندىرۋشىلەرى ەندى نە ىستەرىن بىلمەيدى. تەك وز-وزدەرىن جۇباتىپ، از دا بولسا، ساپالى ءونىم جيناپ الۋعا ۇمىتتەنەدى.

تاياۋ شىعىس:

گازا سەكتورىندا دا وسىعان ۇقساس جاعداي. ەككەن ءجۇزىم اپتاپقا شىداماي كەۋىپ كەتكەن. سونىڭ سالدارىنان بيىل ءتۇسىم وتە از. ءتىپتى بىلتىرعى كورسەتكىشتەن 60 پايىزعا كەم. اۋىل شارۋاشىلىعى مينيسترلىگى وكىلدەرىنىڭ ايتۋىنشا، اۋا رايىنىڭ قولايسىزدىعى جۇزىمگە عانا ەمەس، وزگە دە ونىمدەرگە زاردابىن تيگىزگەن. سالدارىنان باعا كۇرت كوتەرىلىپ، حالىقتىڭ قالتاسىنا سالماق سالىپ تۇر.

شري-لانكا:

شري-لانكادا «اقمارجان داعدارىسى» تۋىنداۋى مۇمكىن. داقىلدى سۋاراتىن سۋ جوق. جازدا جاۋىن از جاۋعاندىقتان سۋ قويمالارى دا كەۋىپ قالعان. بۇل احۋال ءقازىر بۇقارانى دا، بيلىكتى دە الاڭداتىپ وتىر. اۋىل شارۋاشىلىعى ءمينيسترى كەلتىرگەن مالىمەتكە سايكەس، 30 مىڭ گەكتاردان استام القاپ قۇردىمعا كەتۋى مۇمكىن. ءبىراق ساراپشىلار بۇل كورسەتكىشكە كۇمانمەن قارايدى. شىعىن كولەمى بۇدان الدەقايدا جوعارى بولاتىنىن ايتادى. ايتا وتەيىن، شري-لانكا حالقى ءۇشىن كۇرىش نەگىزگى ازىقتىڭ ءبىرى. ءھام ءىرى كاسىپ ءتۇرى. بۇگىندە بۇل سالادا 2 ميلليونداي ادام ەڭبەك ەتەدى.