دەنساۋلىق ساقتاۋ ءمينيسترى قاراعاندىداعى ۋلانعان بالالارعا باردى

 دەنساۋلىق ساقتاۋ ءمينيسترى اجار عينيات قاراعاندىعا جۇمىس ساپارى بارىسىندا وبلىستىق كلينيكالىق اۋرۋحانانىڭ ينفەكسيالىق ورتالىعىنا بارىپ، زارداپ شەككەن بالالارعا مەديسينالىق كومەك بارىسىمەن تانىستى، دەپ حابارلايدى Almaty-akshamy.kz مينيسترلىكتىڭ باسپا ءسوز قىزمەتىنە سىلتەمە جاساپ.

«قاراعاندى وبلىسىنىڭ ارناۋلى الەۋمەتتىك قىزمەت كورسەتۋ ورتالىعىنان تۇسكەن 14 بالانىڭ 5ء-ى بۇگىندە ەم الۋدا. بالالاردا وڭ ديناميكا بايقالادى، ەستەرى انىق، ەرتە وڭالىپ كەلەدى»، - دەپ جازىلعان مينيسترلىك حابارلاماسىندا.

ءوز سوزىندە مينيستر جاس پاسيەنتتەردىڭ دەنساۋلىعى جاقسارىپ كەلە جاتقانىن ايتتى. بالالاردى ەمدەۋ ءتاسىلىن رەسپۋبليكالىق ماماندار ۇنەمى باقىلايدى.

دەنساۋلىق ساقتاۋ مينيسترلىگى زارداپ شەككەن بالالاردىڭ جاعدايىنا جانە ولارعا مەديسينالىق كومەك كورسەتۋگە تۇراقتى مونيتورينگ جۇرگىزەدى.

ەسكە سالساق، 30 شىلدەدە قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا بىرنەشە بالا ۋلانىپ، ونىڭ بىرەۋى قايتىس بولدى.

التاۋى جانساقتاۋ بولىمىنە جەتكىزىلدى.

تامىز ايىنىڭ باسىندا تەرگەۋ اياقتالعانعا دەيىن ورتالىق ديرەكتورىنىڭ مىندەتىن اتقارۋشى جانە وسى ورتالىقتىڭ 12 مەديسينا قىزمەتكەرى جۇمىستان شەتتەتىلدى.

كەيىننەن بالالار تاماقتان ۋلانباعان بولىپ شىقتى.

28 تامىزدا ۋلانعان بالالاردىڭ تاعى بىرەۋى اۋرۋحانادا كوز جۇمدى.