اۋىل اكىمدەرىنىڭ 64 پايىزى جەرگىلىكتى جۇرتتىڭ تىكەلەي سايلاۋىمەن قىزمەتكە كەلدى. بۇل تۋرالى ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جەرگىلىكتى دەپۋتاتتار ايماقتاعى تەكسەرۋ كوميسسيالارىمەن تىعىز قارىم-قاتىناس ورناتۋى كەرەك. بۇل كوميسسيالاردىڭ ءرولى ەداۋىر ارتىپ، جاۋاپكەرشىلىگى كۇشەيتىلەدى. الداعى ەكى جىلدا پيلوتتىق جوبا رەتىندە اۋدان جانە وبلىستىق ماڭىزى بار قالا اكىمدەرىن تىكەلەي سايلاۋ وتەدى. وسى ورايدا قاجەتتى نورماتيۆتىك بازانى جانە جول كارتاسىن ازىرلەۋ قاجەت. ۇكىمەت بۇل جۇمىستى ورتالىق سايلاۋ كوميسسياسىمەن جانە وبلىس اكىمدەرىمەن بىرلەسىپ جۇرگىزەدى. ءبىز قوعامدى دەموكراتيالاندىرۋ جانە بيلىك قۇزىرەتتەرىن تومەنگە بەرۋ ۇدەرىسىن جالعاستىرامىز. «جەرگىلىكتى ءوزىن-وزى باسقارۋ تۋرالى» زاڭنىڭ قابىلدانۋى بۇل باعىتتاعى تاعى ءبىر ماڭىزدى قادام بولماق. ءقازىر ءتيىستى زاڭ جوباسى ماجىلىستە تالقىلانىپ جاتقانىن بىلەسىزدەر»، – دەدى قاسىم-جومارت توقايەۆ.
پرەزيدەنت اۋىل اكىمدەرىنىڭ باسىم بولىگى سايلانعانىن ايتتى.
«اۋىل اكىمدەرى كۇن سايىن تۇرعىنداردىڭ مۇڭ-مۇقتاجىن تىڭداپ، ماسەلەلەرىن شەشەدى. سوندىقتان ولار ەلىمىزدە ايرىقشا ءرول اتقارادى. اۋىل اكىمدەرىنىڭ 64 پايىزى جەرگىلىكتى جۇرتتىڭ تىكەلەي سايلاۋىمەن قىزمەتكە كەلدى. مۇنى، شىن مانىندە، زور جەتىستىك دەۋگە بولادى. تۇرعىنداردىڭ ماسەلەسىن جەدەل ءارى ءتيىمدى شەشۋ ءۇشىن ولارعا كوبىرەك مۇمكىندىك بەرىلىپ جاتىر. بۇل جۇمىس تا جالعاسىن تابادى»، – دەدى مەملەكەت باسشىسى.