بۇگىن الماتى جۇرتشىلىعى بەلگىلى ادەبيەتتانۋشى، فولكلورتانۋشى عالىم، ق ر مەملەكەتتىك سىيلىعىنىڭ لاۋرەاتى، ۇلتتىق عىلىم اكادەمياسىنىڭ اكادەميگى، فيلولوگيا عىلىمدارىنىڭ دوكتورى سەيىت قاسقاباسوۆتى اقتىق ساپارعا شىعارىپ سالدى.
سەيىت قاسقاباسوۆ سانالى عۇمىرىن ۇلتتىق ادەبيەتتى زەرتتەپ، عىلىمنىڭ دامۋىنا ۇلەس قوسىپ، جۇزدەگەن شاكىرت تاربيەلەگەن اكادەميك، قازاق ادەبيەتى مەن فولكلورتانۋ عىلىمىندا تەرەڭ ءىز قالدىرعان بىرەگەي عالىم.
سەيىت اسقار ۇلى قاسقاباسوۆ 1940 جىلى 24 ماۋسىم كۇنى سەمەي قالاسىندا دۇنيەگە كەلگەن.
1964 جىلى اباي اتىنداعى قازاق پەداگوگيكا ينستيتۋتىن ۇزدىك تامامداعان.
ق ر مينيسترلەر كابينەتى جانىنداعى جوعارى اتتەستاسيا كوميسسياسىنىڭ ءتوراعاسى، ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى شىعىستانۋ فاكۋلتەتىنىڭ دەكانى، قازاقستان رەسپۋبليكاسى ۇلتتىق عىلىم اكادەمياسى ادەبيەت جانە ونەر ينستيتۋتىنىڭ ديرەكتورى قىزمەتتەرىن اتقارعان.
تانىمال ەڭبەكتەرىنىڭ قاتارىندا "كازاحسكايا ۆولشەبنايا سكازكا" (1972)، "قازاقتىڭ حالىق پروزاسى" (1984)، "رودنيكي يسكۋسستۆا" (1986)، "كولىبەل يسكۋسستۆا" (1990)، "كازاحسكايا نەسكازوچنايا پروزا" (1992)،"اباي جانە فولكلور" (1995)، "زولوتايا جيلا" (2000)، "جانازىق" (2002)، "قوزى كورپەش-بايان سۇلۋ. قىز جىبەك. قازاقتىڭ عاشىقتىق جىرلارى" (2003)، "XV-XVIII عاسىرلارداعى قازاق ادەبيەتى" (2005)، "و فولكلورە ي نە تولكو" (2005) "ەلزەردە" (2008) سياقتى مونوگرافيالار مەن زەرتتەۋلەر كىتابىنىڭ جانە 300-دەن اسا ەڭبەكتىڭ، سونىڭ ىشىندە فولكلور، ادەبيەت پەن ونەر بويىنشا 9 مونوگرافيانىڭ اۆتورى.
سەيىت قاسقاباسوۆ قازاقستان رەسپۋبليكاسى مەملەكەتتىك سىيلىعىنىڭ، ش.ءۋاليحانوۆ اتىنداعى سىيلىقتىڭ، جامبىل اتىنداعى سىيلىقتىڭ، ماحامبەت اتىنداعى سىيلىقتىڭ لاۋرەاتى اتاعىنا يە بولعان. م.شولوحوۆ جانە ۇلى پەتر اتىنداعى رەسەيلىك مەدالدارمەن ماراپاتتالعان. 2011 جىلى تمد جالپى عىلىم جانە ءبىلىم كەڭىستىگىن دامىتۋعا جاردەمدەسەتىن عىلىم جانە ءبىلىم سالاسىنداعى زور ۇلەسى ءۇشىن مەملەكەتارالىق "دوستاستىق جۇلدىزدارى" سىيلىعىمەن ماراپاتتالدى.