الاياقتاردىڭ ارباۋىنا ءتۇسىپ، جالعىز باسپاناسىنان ايىرىلىپ قالا جازداعان فيلولوگيا عىلىمدارىنىڭ دوكتورى، پروفەسسور، ارداگەر جۋرناليست كاكەن قامزين جاقسى جاڭالىعىن ايتتى، - دەپ حابارلايدى اqshamnews.kz ءتىلشىسى.
جاعداي قالاي بولدى؟
قازاق جۋرناليستيكاسىنىڭ ابىز ۇستازى، بىرنەشە بۋىندى تاربيەلەگەن كاكەن قامزين بيىل شىلدەنىڭ باسىندا الاياقتاردىڭ قۇربانىنا اينالدى. الدىمەن وزدەرىن "ەنەرگوسبىت" قىزمەتكەرلەرى رەتىندە تانىستىرعان الاياقتار ونىڭ مەكەنجايى، جسن جانە پاتەر تۋرالى دەرەكتەرىن الىپ، كەيىن ۇلتتىق قاۋىپسىزدىك كوميتەتىنىڭ اتىن جامىلىپ حابارلاسقان. "ءۇيىڭىزدى تارتىپ العالى جاتىر" دەگەن سىلتاۋمەن شۇعىل ساتۋعا كوندىرىپ، ساتىلىمنان تۇسكەن اقشانى "ۇلتتىق بانكتىڭ ارنايى شوتىنا ساقتايمىز" دەپ الداپ، كۋرەر ارقىلى الىپ كەتكەن.
پوليسيا نە دەيدى؟
وسى وقيعادان كەيىن الماتى قالاسى اۋەزوۆ اۋداندىق پوليسيا دەپارتامەنتىندە قىلمىستىق ءىس قوزعالدى. قوعام بەلسەندىلەرى، جۋرناليستەر مەن ساياساتكەرلەر بۇل ءىستى نازارعا الىپ، ارداگەر ۇستازعا كومەكتەسۋ ءۇشىن ۇندەۋ جاسادى.
ارداگەر ءجۋرناليستىڭ جاڭالىعى
كاكەن قامزين ءۇيىن قايتارىپ الۋ ءۇشىن 5 شىلدەدەن باستاپ ەلدەن "جىلۋ" جيناۋعا ءماجبۇر بولدى. بۇل قادام ونىڭ ءوزى ءۇشىن دە، وتباسى ءۇشىن دە وڭاي بولماعانىن ايتادى.
"ولىمنەن ۇيات كۇشتى. ءبىراق سىزدەردىڭ شىنايى جاناشىرلىقتارىڭىز، قولداۋلارىڭىز، جىلى سوزدەرىڭىز بىزگە ءۇمىت سىيلادى"، – دەپ جازدى ول.
جينالعان قارجى 9 529 836 تەڭگەگە جەتكەندە، تاعى ءبىر قۋانىشتى جاعداي بولدى: ءبىر قايىرىمدى ازامات (ءاتى-جونىن اتاماۋدى سۇراعان - ەسك.) جەتپەي تۇرعان 23 ميلليون تەڭگەنى قولما-قول اكەلىپ بەرگەن.
كاكەن قامزين بۇل ءساتتى جۇرەك تولقىنىسپەن سيپاتتادى.
"بۇل تەك قارجىلاي كومەك ەمەس، بۇل - سەنىمنىڭ، بىرلىكتىڭ، مەيىرىمنىڭ ناعىز كورىنىسى. ول ازاماتقا اللا رازى بولسىن!وتباسىنا، وزىنە تەك جاقسىلىق تىلەيمىن! ريزاشىلىعىمدى بىلدىرەمىن!” – دەپ ريزاشىلىعىن ءبىلدىردى.
ءۇيدى قايتا راسىمدەۋ باستالادى
الداعى كۇندەرى ول ساتىپ الۋشى وتباسىعا تولىق اقشاسىن قايتارىپ، ءۇيىن ءوز اتىنا قايتا راسىمدەۋگە كىرىسەتىنىن مالىمدەدى. سونىمەن قاتار، كومەك كورسەتكەن، جىلى ءسوز ايتقان، سۇحبات العان، دۇعا جاساعان بارشاعا شىن جۇرەكتەن العىس ايتتى.