رەسمي اقپاراتقا سايكەس، الاياقتار قازىرگى تاڭدا قازاقستان ۇلتتىق بانكىنىڭ اتىن جامىلىپ، ازاماتتاردى ءتۇرلى ادىسپەن قارجىلىق الداۋعا تىرىسۋدا، دەپ حابارلايدى aqshamnews.kz.
ولار جالعان حاتتار مەن جاساندى ۆيدەولار ارقىلى جۇرتتى سەندىرىپ، اقشا جىمقىرۋ ارەكەتتەرىن كۇشەيتكەن.
الاياقتىقتىڭ العاشقى ءتۇرى – جالعان قۇجات
الاياقتار:
-
ۇلتتىق بانك وكىلىنىڭ قولى مەن ءمورى قويىلعان جالعان حاتتاردى جاساپ،
-
«اتىڭىزعا نەسيە شوتى اشىلعان»، «تولەنبەي جاتقان كرەديت بار» دەگەن جەلەۋمەن،
-
ازاماتتارعا حات جولداپ، دۇرلىكتىرىپ وتىر.
بۇل — حالىقتى ۇركىتۋ ارقىلى جەكە دەرەكتەر مەن قارجى الۋ ماقساتىنداعى الاياقتىق ارەكەت.
ەكىنشى ءادىس – جاساندى ينتەللەكت ارقىلى فەيك ۆيدەو جاساۋ
تەحنولوگيانى دا ءوز پايداسىنا اسىرعىسى كەلگەن الاياقتار:
-
جاساندى ينتەللەكت كومەگىمەن ۇلتتىق بانك قىزمەتكەرلەرىنىڭ بەينەسىن قولدان جاساپ، فەيك ۆيدەولار ازىرلەگەن.
-
بۇل ۆيدەولاردا ولار وزدەرىن بانك وكىلى رەتىندە كورسەتىپ، جۇرتتى جالعان ينۆەستيسيالىق كومپانيالارعا شاقىرىپ، كەيدە «زاڭگەرلىك كومەك ۇسىنامىز» دەپ تە سەندىرەدى.
نازار اۋدارىڭىز! ۇلتتىق بانك ەشقاشان:
- جەكە تۇلعالارعا حات جولدامايدى
- جەكە تۇلعالارعا قوڭىراۋ شالمايدى
- جەكە تۇلعالارعا قىزمەت كورسەتپەيدى
- جەكە تۇلعالارعا كرەديت بەرمەيدى، دەپوزيت اشپايدى
- جەكە تۇلعالاردىڭ كرەديت تاريحىن باقىلامايدى
- ازاماتتاردى ينۆەستيسيالىق كومپانيالارعا شاقىرمايدى
- ۇرلانعان اقشانى قايتارۋعا زاڭگەر ۇسىنبايدى
ەگەر وسىنداي الاياقتاردىڭ ارباۋىنا ءتۇسىپ قالساڭىز:
-
ۋاقىت جوعالتپاي، قۇقىق قورعاۋ ورگاندارىنا جۇگىنىڭىز
-
نەمەسە ۇلتتىق بانكتىڭ بايلانىس ورتالىعىنا حابارلاسىڭىز — 1477
تاعى ءبىر كەڭ تاراعان الاياقتىق ءتۇرى:
ينتەرنەتتە مىناداي مازمۇنداعى حابارلامالار تارالۋدا:
«ەگەر “سۋستاۆپرو” تاپسىرىسى وتەلمەسە، سوت ارقىلى شىعىندار وندىرىلەدى. بانك كرەديتىنەن باس تارتىلۋى نەمەسە شەتەلگە شىعۋعا تىيىم سالىنۋى مۇمكىن. سالەمدەمەڭىز پوشتادا، ىشىندە 30 000 تگ سەرتيفيكات بار...»
بۇل — جالعان اقپارات. كرەديت، ايىپپۇل، سوت ارقىلى قورقىتۋ — اڭعال ازاماتتاردى قارجى تۇزاعىنا ءتۇسىرۋ ءادىسى.
ەڭ ءجيى زارداپ شەگەتىندەر — زەينەتكەرلەر
جاقىندا سەمەي قالاسىندا زەينەتكەر ايەل ءوزىن «پوليسەيمىن» دەگەن الاياققا سەنىپ، 10 ملن تەڭگە اۋدارماق بولعان. ابىروي بولعاندا، كەلىنى ارالاسىپ، بۇل ارەكەتتى توقتاتقان.
وسىنداي جاعدايلار ەل ىشىندە ءجيى كەزدەسەدى.
نە ىستەۋ كەرەك؟
-
ۇلكەندەرگە، اتا-اجەلەرىمىزگە بۇل تاقىرىپتى ءتۇسىندىرىپ وتىرۋ قاجەت
-
داستارحان باسىندا، كۇندەلىكتى اڭگىمەدە الاياقتىق تۇرلەرى تۋرالى ەسكەرتىپ جۇرىڭىزدەر
-
جاستار جاعى — ۇيدەگىلەردى ساقتاندىرىپ وتىرۋعا مىندەتتى
قارجىلىق قاۋىپسىزدىك – بارشامىزدىڭ ورتاق جاۋاپكەرشىلىگىمىز.
بۇل اقپاراتتى جاقىندارىڭىزبەن ءبولىسىڭىز. الاياقتارعا الدانعان ءبىر ادامنىڭ زەينەتاقىسى، ءومىر بويعى جيعان اقشاسى، ءتىپتى باسپاناسى دا كەتىپ قالۋى مۇمكىن.