سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ پارلامەنت ءماجىلىسىنىڭ دەپۋتاتتارىمەن بىرگە جاڭا سۋ كودەكسىن ىسكە اسىرۋ ماسەلەلەرىن تالقىلادى.
اسىرەسە سۋ رەسۋرستارىنىڭ اقپاراتتىق-تالداۋ ورتالىعىنىڭ جۇمىسىنا ەرەكشە نازار اۋدارىلدى، دەپ حابارلايدى aqshamnews.kz.
بۇگىندە ورتالىق ماماندارى سۋ رەسۋرستارىنىڭ ۇلتتىق اقپاراتتىق جۇيەسىن ازىرلەپ جاتىر. مينيستر مەن دەپۋتاتتار جوبانىڭ جۇزەگە اسۋ بارىسىمەن تانىستى. قازىرگى ۋاقىتتا قازاقستان بويىنشا 5000-نان استام سۋ وبەكتىسى سيفرلاندىرىلىپ، جۇيەگە ەنگىزىلگەن. «قازسۋشار» ماماندارى كۇن سايىن جۇيەگە وزەكتى دەرەكتەردى ەنگىزىپ وتىرادى. بولاشاقتا بۇل پروسەستى تولىق اۆتوماتتاندىرۋ جوسپارلانىپ وتىر.
ايتا كەتەيىك، سۋ رەسۋرستارىنىڭ ۇلتتىق اقپاراتتىق جۇيەسىن ازىرلەۋگە مەملەكەتتىك بيۋدجەتتەن قاراجات بولىنبەيدى. جوبا ەۋرازيالىق دامۋ بانكىنىڭ گرانتى ەسەبىنەن جۇزەگە اسىرىلىپ جاتىر.
مينيسترلىك بۇۇ دامۋ باعدارلاماسىمەن بىرلەسىپ، نەمىستىڭ TalsimNG جۇيەسىن ەنگىزىپ جاتىر. بۇل جۇيە سۋ قويمالارىنا تۇسەتىن سۋدىڭ قىسقا جانە ۇزاق مەرزىمدى بولجامدارىن ۇسىنادى. قازىرگى تاڭدا ەسىل جانە نۇرا وزەندەرىنىڭ باسسەيندەرى تولىقتاي مودەلدەنگەن. جىل سوڭىنا دەيىن ەلدەگى بارلىق سۋ رەسۋرسىن سيفرلىق مودەلدەۋ جوسپاردا بار.
سونداي-اق كەزدەسۋدە بالقاش كولىن ساقتاۋ بويىنشا ماستەر-جوسپار قۇرۋ تالقىلاندى. بىلتىر سۋ رەسۋرستارى جانە يرريگاسيا مينيسترلىگى فرانسيانىڭ دامۋ اگەنتتىگىمەن كەلىسىمگە قول قويدى، قۇجاتقا سايكەس فرانسۋز تاراپى كول باسسەينىن كەڭ كولەمدە زەرتتەيدى. ناتيجەسىندە 2040 جىلعا دەيىن ۇزاق مەرزىمدى ماستەر-جوسپار ازىرلەنەدى. بۇگىنگى تاڭدا قاجەتتى دەرەكتەردى جيناۋ جانە فرانسۋز ساراپشىلارىمەن اقپارات الماسۋ جالعاسىپ جاتىر.
وتىرىستا كوتەرىلگەن تاعى ءبىر تاقىرىپ ەلىمىزدىڭ سۋ وبەكتىلەرىندە سۋ قورعاۋ ايماقتارى مەن بەلدەۋلەرىن ورناتۋ بولدى. جۇمىستى ءۇش كەزەڭدە جۇرگىزىپ، 2027 جىلعا قاراي اياقتاۋ جوسپاردا بار. ەڭ الدىمەن سۋ قورعاۋ ايماقتارى مەن بەلدەۋلەرى ءىرى سۋ وبەكتىلەرىندە، كەيىن ورتا جانە شاعىن وبەكتىلەردە ورناتىلادى.
ءماجىلىس دەپۋتاتتارى مينيسترگە جانە اقپاراتتىق-تالداۋ ورتالىعىنىڭ ماماندارىنا اتقارىلىپ جاتقان جۇمىستار تۋرالى سۇراقتار قويىپ، ءوز ۇسىنىستارىن ءبىلدىردى. دەپۋتاتتار كادر دايارلاۋ، قۇرعاقشىلىقتى بولجاۋ، اۋىل شارۋاشىلىعىندا سۋدى ەسەپكە الۋ، سۋدى قايتا پايدالانۋ جۇيەسىن ەنگىزۋ، سۋ ماڭىندا پايدالى قازبالاردى ءوندىرۋ سەكىلدى وزەكتى ماسەلەلەرگە نازار اۋداردى.
«جاڭا سۋ كودەكسى مەن وعان قاتىستى زاڭ جوبالارىن ازىرلەۋ بارىسىندا بەلسەندىلىك تانىتقانى ءۇشىن ءماجىلىس دەپۋتاتتارىنا العىس بىلدىرەمىن. ءبىزدىڭ بىرلەسكەن جۇمىسىمىز مۇنىمەن اياقتالمايدى. قۇجات 10 ماۋسىمنان باستاپ كۇشىنە ەنەدى. سوندىقتان جاڭا سۋ زاڭناماسىندا قويىلعان مىندەتتەردى ءتيىمدى ىسكە اسىرۋدى قامتاماسىز ەتۋىمىز كەرەك»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.