مەملەكەت باسشىسى قاسىم-جومارت توقايەۆتىڭ جۇڭگو حالىق رەسپۋبليكاسىنا رەسمي ساپارى اياسىندا ءال-فارابي اتىنداعى قازاق ۇلتتىق ۋنيۆەرسيتەتى بازاسىندا «سيفرلىق تەحنولوگيالار جانە روبوتوتەحنيكا» حالىقارالىق ينستيتۋتى مەن روبوتوتەحنيكا ورتالىعىن اشۋ ءراسىمى ءوتتى.
بۇل ماڭىزدى كەلىسىم ءال-فارابي اتىنداعى قازۇۋ مەن قىتايدىڭ جەتەكشى جوعارى تەحنولوگيالىق كومپانياسى – Jiangsu Huibo Robotics Technology Co.، Ltd. اراسىنداعى ستراتەگيالىق ارىپتەستىكتىڭ ناتيجەسى بولىپ تابىلادى، دەپ حابارلايدى aqshamnews.kz.
ءراسىم قازاقستان پرەزيدەنتى قاسىم-جومارت توقايەۆتىڭ بەيجىڭدەگى قازاقستان-قىتاي ىسكەرلىك كەڭەسىنىڭ وتىرىسى اياسىندا ءوتتى.
ايتۋلى شارا بارىسىندا اشىلۋ راسىمىنە ءال-فارابي اتىنداعى قازۇۋ باسقارما ءتوراعاسى – رەكتور جانسەيىت تۇيمەبايەۆ پەن Jiangsu Huibo Robotics Technology Co.، Ltd. (جۇڭگو) كومپانياسىنىڭ وكىلى لي ۆەن (Li Wen) حانىم قاتىستى.
تاراپتار ورتاق ىنتىماقتاستىقتى ودان ءارى تەرەڭدەتۋگە جانە عىلىم مەن ءبىلىم سالاسىنداعى ءوزارا ءتيىمدى جوبالاردى بىرلەسىپ جۇزەگە اسىرۋعا نيەتتى ەكەندىكتەرىن راستادى. سونىمەن قاتار بۇل ورتالىق بولاشاقتا ءبىلىم، زەرتتەۋ جانە يننوۆاسيا سالاسىندا ءىرى كلاستەرگە اينالادى دەگەن سەنىم ءبىلدىردى.
سالتاناتتى ءبولىم بارىسىندا ينستيتۋت پەن روبوتوتەحنيكا ورتالىعى تۋرالى ارنايى بەينەروليك كورسەتىلدى. ورتالىق KazNU Hub اۋماعىندا ورنالاسقان جانە جالپى اۋدانى 600 شارشى مەتردى قۇرايدى. جوباعا سالىنعان ينۆەستيسيا كولەمى – 2 500 000 اقش دوللارى. قازىرگى تاڭدا ورتالىقتا 13 زاماناۋي روبوت ورناتىلعان.
ينستيتۋتتا باكالاۆريات، ماگيستراتۋرا جانە دوكتورانتۋرا دەڭگەيلەرىندە «روبوتوتەحنيكا»، «مەحاترونيكا»، «جاساندى ينتەللەكت» جانە «زاتتار ينتەرنەتى» (IoT) باعىتتارى بويىنشا بىرلەسكەن ءبىلىم بەرۋ باعدارلامالارىن ازىرلەۋ جانە جۇزەگە اسىرۋ جوسپارلانۋدا.
سونداي-اق عىلىمي-زەرتتەۋ جۇمىسى دا نەگىزگى باسىمدىقتاردىڭ ءبىرى بولماق. ماماندار وندىرىستىك، سەرۆيستىك جانە ءبىلىم بەرۋ روبوتتارى سالالارىندا زەرتتەۋلەر جۇرگىزىپ، ءوندىرىستى اۆتوماتتاندىرۋ مەن اقىلدى باسقارۋ جۇيەلەرىن جاساۋعا ۇلەس قوسپاق. بۇدان بولەك، جوبا اياسىندا ستارتاپتار مەن يننوۆاسيالىق كومپانيالار قۇرىلادى.
بۇل باستاما قازاقستاننىڭ سيفرلىق دامۋ جولىنداعى ماڭىزدى قادامىنا اينالىپ، ەلدىڭ حالىقارالىق يننوۆاسيالىق كەڭىستىكتەگى ورنىن نىعايتۋعا سەرپىن بەرمەك.