اقتاۋداعى قاندى وقيعا: ادىلدىك ىزدەگەن انانىڭ حاتى
ماڭعىستاۋ وبلىسى، اقتاۋ قالاسىندا ادىلەتسىزدىك بولدى. Aqshamnews.kz رەداكسياسىنا وسىنداي حات كەلدى. حاتتى جازعان – كىسى قولىنان قازا بولعان ءجاسوسپىرىمنىڭ ءىسى بويىنشا كۇدىكتى ءارى وسى قىلمىستى جاسادى دەپ ايىپتالىپ وتىرعان جىگىتتىڭ اناسى. ول بۇل ىستە ادىلەتسىزدىك ورىن العانىن جانە قىلمىسقا قاتىسى بار نەگىزگى فيگۋرانتتاردىڭ بوستاندىققا جۇرگەنىنە قاپالى.
وقيعانىڭ ءمان-جايى
رەداكسيامىزعا حات جازىپ، كومەك سۇراعان انانىڭ ايتۋىنشا، 2025 جىلعى 8 ساۋىردە ماڭعىستاۋ وبلىسى، بەينەۋ اۋدانى، اقجىگىت اۋىلىندا 17 جاستاعى ساعىندىق ەسىمدى ءجاسوسپىرىمدى اۋىلدىڭ بىرنەشە “ستارشاك” جىگىتتەرى جابىلىپ ۇرىپ ولتىرگەن. قايتىس بولعان بوزبالا – وتباسىنداعى جالعىز ۇل ەكەن.
قايعىلى وقيعا بويىنشا ءقازىر ءبىر عانا ءجاسوسپىرىم قاماۋعا الىنعان. ءقازىر وسى ىسكە قاتىستى جالعىز ايىپتالۋشى ج.-نىڭ اناسىنىڭ سوزىنە سەنسەك، مۇندا نەگىزىنەن 13 كۇدىكتى بار. تەرگەۋ بارىسىندا بەينەۋ اۋداندىق تەرگەۋشىسى نۇرلىبەك مادييەۆ ءىستى بۇرمالاپ، باستى كۇدىكتى – م. ەسىمدى جىگىتتى جاۋاپكەرشىلىكتەن قۇتقارىپ جىبەرگەن، دەيدى اراشا سۇراپ، ادىلدىك ىزدەگەن انا.
اناسىنىڭ سوزىنە سەنسەك، وسى ىسكە تىكەلەي قاتىستى م.-نىڭ تۋعان جەزدەسى ماڭعىستاۋ وبلىستىق پروكۋراتۋراسىندا قىزمەت ەتەدى. ال اكەسى اۋىلدا بەدەلدى، مال شارۋاشىلىعىمەن اينالىساتىن داۋلەتتى ازامات ەكەن. وسى سەبەپتى، باستى كۇدىكتى جازادان قۇتىلىپ وتىر.
قازا تاپقان بالانىڭ اتا-اناسى – زەينەتكەرلەر، ال قاماۋدا وتىرعان ءجاسوسپىرىمنىڭ اتا-اناسى دا قاراپايىم، تىرەۋسىز ادامدار.
رەسمي ورگانداردىڭ جاۋابى
ءىستىڭ جاي-جاپسارىن انىقتاۋ ماقساتىندا Aqshamnews.kz رەداكسياسى ماڭعىستاۋ وبلىستىق پوليسيا دەپارتامەنتىنە رەسمي ساۋال جولدادى. ۆەدومستۆونىڭ اقپاراتتىق ساياسات ءبولىمى:
«اتالعان قىلمىستىق ءىس بويىنشا ماڭعىستاۋ وبلىستىق سوتىنا جۇگىنۋدى سۇرايمىز»، – دەپ قىسقا قايىردى.
سونىمەن قاتار، ىسكە قاتىستى شەشىمدى شىعارعان ماڭعىستاۋ اۋداندىق سوتىنا دا رەسمي ساۋال جولداندى. سوتتىڭ جاۋابى دا قىسقا بولدى:
«ءسىزدىڭ جولداعان سۇراعىڭىزعا بايلانىستى حابارلايمىز. ءىس بويىنشا ۇكىم زاڭدى كۇشىنە ەنگەننەن كەيىن سىزگە تولىق جاۋاپ ۇسىنىلادى».
بىزگە بەلگىلىسى، قىلمىستىق ءىس بويىنشا ماڭعىستاۋ اۋداندىق سوتى وسى ىسكە كىنالى دەپ ج.ج-نى 10 جىلعا سوتتادى.
بۇل – تەك ءبىر وتباسىنىڭ قاسىرەتى عانا ەمەس، قازاقستاندىقتاردىڭ ادىلەت جۇيەسىنە دەگەن سەنىمى تۇرعىسىنان اسا ماڭىزدى ءىس. جابىرلەنۋشى جاق ادىلدىكتىڭ ورناۋىن سۇرايدى. Aqshamnews.kz رەداكسياسى الداعى ۋاقىتتا بۇل ءىستى نازاردا ۇستايدى