2 قىركۇيەك كۇنى مەتروعا 117 مىڭ جولاۋشى مىنگەن، دەپ حابارلايدى aqshamnews.kz
الماتىدا مەتروعا مىنەتىن جولاۋشى اعىنى بويىنشا رەكورد ورناتىلدى، ءبىر تاۋلىكتە جەر استى كولىگىنىڭ قىزمەتىن 117 مىڭ ادام پايدالاندى. بۇل كورسەتكىش – مەتروپوليتەننىڭ تاريحىنداعى ەڭ جوعارى دەڭگەي.
«2 قىركۇيەك كۇنى مەترو ارقىلى 117 مىڭ جولاۋشى تاسىمالداندى. بۇل تاۋلىكتىك كورسەتكىش مەتروپوليتەن تاريحىنداعى ەڭ جوعارعى كورسەتكىش بولىپ ەسەپتەلەدى»، – دەپ جازىلعان الماتى مەتروسىنىڭ رەسمي Instagram پاراقشاسىندا.
مەترو قىزمەتكەرلەرى جولاۋشىلار سانىنىڭ ءوسۋىن جاڭا وقۋ جىلىنىڭ باستالۋىمەن ءتۇسىندىردى – قىركۇيەكتە قالادا مەكتەپ وقۋشىلارى مەن ستۋدەنتتەردىڭ قوزعالىسى كۇرت كوبەيگەن.
ءقازىر الماتى مەتروسىندا «رايىمبەك باتىر»، «جىبەك جولى»، «المالى»، «اباي»، «بايقوڭىر»، «مۇحتار اۋەزوۆ اتىنداعى تەاتر»، «الاتاۋ»، «سايران»، «ماسكەۋ»، «سارىارقا» جانە «باۋىرجان مومىش ۇلى» سياقتى 11 ستانسيا جۇمىس ىستەيدى.