الەۋمەتتىك جەلىدە توي قوناقتارىنىڭ ەرەكشە ءبيى ۆيرۋسقا اينالىپ، مىڭداعان قارالىم جينادى. جەلىدەگى جۇرت قوناقتاردىڭ ۇيلەسىمدى قيمىلدارىنا قاراپ، بۇل ءبيدىڭ جاي دۇنيە ەمەس ەكەنىن تالقىعا سالدى. بولجاعانداي-اق، "فۋتبولشىلار ءبيى" دەپ اتالىپ كەتكەن بۇل ءداستۇرلى ءبيدىڭ تاريحى تەرەڭدە جاتىر. اqshamnews.kz ءتىلشىسىنىڭ ماتەريالىنان ءبىلىڭىز.
"فۋتبولشىلار ءبيىنىڭ" تاريحى قانداي؟
"فۋتبولشىلار ءبيى" - سقو-داعى گاۆريلوۆكا (قازىرگى كوكالاجار - ەسك.) اۋىلىنىڭ ءداستۇرلى ءبيى. تاريحى 1981–1982 جىلداردان باستاۋ الاتىن بۇل ءبيدىڭ ۇلكەن قۋانىشپەن تىكەلەي بايلانىسى بار. بۇل تۋرالى گاۆريلوۆكا اۋىلىنىڭ تۇرعىنى مارال كەنجاحيموۆا اڭگىمەلەپ بەردى.
"سول جىلى جازدا فەستيۆال اياسىندا گاۆريلوۆكا سپورتشىلارى سپارتاكيادادا ءبىرىنشى ورىن الىپ، قۋانىش ۇستىنە قۋانىش قوسىلىپ، اۋىلدىڭ بي ۇيىرمەسى دە كوركەم ونەرپازدار بايقاۋىندا جەڭىسكە جەتتى. قوس جەڭىستى اتاپ ءوتۋ بارىسىندا فۋتبول كومانداسىنىڭ كاپيتانى سەرىك ساتييەۆ بي ۇيىرمەسىنىڭ جەتەكشىلەرى بوتاگوز ەستەنبەكوۆا، تاتيانا پروحورەنكو جانە لاريسا توپينادان ويىنشىلارعا بىرنەشە قيمىل ۇيرەتۋدى وتىنەدى. ارينە، سپورتشىلاردىڭ كوپشىلىگى بي يكەمىنە ەپسىز بولعاندىقتان، قيمىلداردى جەڭىلدەتىپ، قاراپايىمداۋ ەتىپ جاساعان. ءبىراق ءدال وسى قاراپايىمدىلىق ءبيدىڭ باستى ەرەكشەلىگىنە اينالىپ، بۇكىل اۋىلعا ورتاق ءداستۇردى قالىپتاستىردى"، - دەدى مارال حانىم.
ۇرپاقتار ساباقتاستىعىنا اينالعان بي
مارال كەنجاحيموۆا بۇل ءبيدى الەۋمەتتىك جەلىدە بولىسكەننەن كەيىن قىزىعۋشىلىق تانىتقانداردىڭ كوبەيگەنىن ايتتى.
"اكەلەرىمىز بەن اعالارىمىزدىڭ بيگە اسا يكەمى جوق بولاتىن. سوندىقتان قيمىلداردى جەڭىلدەتۋگە تۋرا كەلدى. ءبىراق وسىنىڭ ءوزى ءبيدى ودان سايىن ەرەكشەلەدى. سولايشا ۆيدەوداعى “فۋتبولشىلار ءبيى” پايدا بولدى. سودان بەرى بۇل بي جىلدان جىلعا، ۇرپاقتان ۇرپاققا ۇيرەتىلىپ، اۋىلىمىزدىڭ ناعىز بەينەسىنە اينالىپ كەتتى"، - دەيدى ول.
مارال حانىم ءۇشىن بۇل بي تەك كوڭىل كوتەرۋ عانا ەمەس، اۋىلدىڭ تاريحىمەن استاسىپ جاتقان ۇلكەن ماقتانىشتىڭ بولشەگى.
قاراپايىم بي قالايشا اۋىل برەندىنە اينالدى؟
بي اۆتورلارىنىڭ ءبىرى لاريسا توپينا جىلدار وتە كەلە "فۋتبولشىلار ءبيى" اۋىلدىڭ شىنايى برەندىنە اينالعانىن ايتادى:
"ينستاگرامنان دا، تيكتوكتان دا قايتا-قايتا كورىپ وتىرامىن. ءبىزدىڭ اۋىلدىڭ باستى ەرەكشەلىگى – وسى بي. ءبىر قاراعاندا كىشكەنتاي عانا اۋىل بولعانىمەن، ءبىز ءۇشىن ول اتامەكەنىمىز. ۋاقىت وتسە دە، ءقازىر ءۇشىنشى بۋىن بيلەپ ءجۇر. ونى تۇرعىندارىمىزدىڭ ءار جەردە بيلەپ جۇرگەنىن كورۋ قانداي قۋانىش! ءبۇتىن ءبىر اۋىلدىڭ برەندىنە اينالىپ كەتكەن "فۋتبولشىلار ءبيىنىڭ" ماڭىزى، قۇندىلىعى ءبىز ءۇشىن ەرەكشە"، - دەيدى ول.
بۇگىندە بۇل ءبيدى گاۆريلوۆكا تۇرعىندارى قىز ۇزاتۋ، توي-مەرەكەلەردە، ءتۇرلى جيىنداردا مىندەتتى تۇردە ورىندايدى. ول اۋىل ادامدارىنىڭ بىرلىگىن كورسەتەتىن سالتقا اينالىپ كەتكەن.
الەۋمەتتىك جەلىدەگى جىلى لەبىزدەر
جەلى قولدانۋشىلارىنىڭ پىكىرلەرى دە ەرەكشە. بەينەروليكتىڭ قارالىمى 400 مىڭنان اسىپ، 20 مىڭنان استام لايك جينادى. كورەرمەندەر:
"كورگەن سايىن كوز الماي قارايسىڭ!"، "كەرەمەت كوڭىل-كۇي سىيلايدى، ءبارى بىردەي بيلەپ تۇر عوي"، "بۇل اۋىلدا بي كادىمگى ءداستۇر سەكىلدى. قيمىلدارى سونداي ۇيلەسىمدى"، - دەپ ءسۇيسىنىپ جاتىر.