استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا بۇرىنعى ديپلومات ساكەن ماماشقا قاتىستى ۇكىم شىقتى.
سوتتىڭ ۇكىمىنە سايكەس، قازاقستان رەسپۋبليكاسى قىلمىستىق كودەكسىنىڭ 110-بابى 2-بولىگى 1-تارماعى بويىنشا ساكەن ماماش كىنالى دەپ تانىلىپ، ورتاشا قاۋىپسىزدىك مەكەمەسىندە 6 جىلعا باس بوستاندىعىنان ايىرىلدى. ۇكىمدى سۋديا ارتۋر ابدىحانوۆ جاريا ەتتى، دەپ حابارلايدى aqshamnews.kz.
سونىمەن قاتار، قىلمىستىق كودەكستىڭ 49-بابىنا سايكەس، ساكەن ماماش 1-سىنىپتى كەڭەسشى دارەجەسىندەگى ديپلوماتيالىق اتاعىنان ايىرىلدى.
ەكس-ديپلوماتقا قاتىستى سوت پروسەسى 10 ماۋسىمدا باستالعان بولاتىن. ءىس جابىق فورماتتا قارالدى. بۇعان دەيىن سوت وعان بۇلتارتپاۋ شاراسى رەتىندە ءۇيقاماق قولدانۋ تۋرالى ءوتىنىشتى قاناعاتتاندىرماعان ەدى.
ايتا كەتەيىك، 2024 جىلدىڭ مامىر ايىندا ساكەن ماماشتىڭ بۇرىنعى جۇبايى كارينا گوسمان ونىڭ ون جىل بويى دەنەسىنە جانە جىنىستىق تۇرعىدا كۇش قولدانعانىن مالىمدەگەن. وسى مالىمدەمەدەن كەيىن ساكەن ماماش قىزمەتىنەن شەتتەتىلگەن. وسى جىلدىڭ 28 ماۋسىمىندا ساكەن ماماشتىڭ ۇستىنەن دەنساۋلىققا قاساقانا جەڭىل زيان كەلتىرۋ فاكتىسى بويىنشا سوت وتىرىسى وتكەن بولاتىن.