ۆيسە-پرەمەر – مادەنيەت جانە اقپارات ءمينيسترى ايدا بالايەۆا Orda.kz پەن قازتاگ-قا قاتىستى سوت پروسەستەرىنە بايلانىستى مالىمدەمە جاسادى، - دەپ حابارلايدى aqshamnews.kz ءتىلشىسى.
ۆيسە-پرەمەر – مادەنيەت جانە اقپارات ءمينيسترى ايدا بالايەۆا قازاقستاننىڭ مەديا كەڭىستىگىندە قىزۋ تالقىلانىپ جاتقان بىرنەشە سوت پروسەسىنە، سونىڭ ىشىندە Orda.kz سايتى مەن قازتاگ اگەنتتىگىنە قاتىستى ىستەرگە بايلانىستى ارنايى مالىمدەمە جاسادى. ونىڭ ايتۋىنشا، مادەنيەت جانە اقپارات مينيسترلىگى بۇل پروسەستەردى ەرەكشە باقىلاۋدا ۇستاپ وتىر.
"ءبىز ءۇشىن ەلىمىزدە ءسوز بوستاندىعىنىڭ ساقتالۋى مەن بارلىق اقپارات تاراتىپ وتىرعانداردىڭ زاڭ اياسىندا جۇمىس ىستەۋى اسا ماڭىزدى. كاسىبي جۋرناليستيكا ادالدىققا، وبەكتيۆتىلىككە جانە تەكسەرىلگەن اقپاراتتىڭ ناقتىلىعىنا نەگىزدەلۋى كەرەك. مۇنداي جاعدايلار ءاردايىم مەديا قاۋىمداستىقتى الاڭداتادى. سەبەبى بۇل ءسوز بوستاندىعى مەن زاڭدى جۋرناليستىك قىزمەت سەكىلدى اسا ماڭىزدى ماسەلەلەرگە تىكەلەي قاتىستى. كاسىبي بۇقارالىق اقپارات قۇرالدارى زاڭدى بۇزباي جۇمىس ىستەگەن جاعدايدا عانا مەملەكەت ولاردىڭ قۇقىعىن ءتيىمدى قورعاي الاتىنىن ءتۇسىنۋى ءتيىس. ال ەگەر تاراپتار اراسىنداعى قاتىناستار قۇقىقتىق الاڭعا اۋىسسا، مەملەكەتتىك ورگاننىڭ ارالاسۋى سوتقا قىسىم رەتىندە قابىلدانۋى مۇمكىن. قالاي بولعاندا دا، ءبىز كاسىبي جۋرناليستەرگە قاتىستى اكىمشىلىك نەمەسە قىلمىستىق ىستەردىڭ بارىنشا اشىق ءارى وبەكتيۆتى قارالۋى قاجەت ەكەنىن ءاردايىم تالاپ ەتىپ كەلەمىز.
سونىمەن قاتار، ول مادەنيەت جانە اقپارات مينيسترلىگى ءوز قۇزىرەتى شەگىندە جۋرناليستەردىڭ قۇقىعىن قامتاماسىز ەتۋگە جانە سوت ىستەرىنىڭ ءادىل قارالۋىنا قاجەت بارلىق شارانى قابىلداۋعا دايىن ەكەنىن ايتتى.
ءمينيستردىڭ بۇل جازباسىنا قازتاگ اگەنتتىگىنىڭ باسشىسى اسەت ماتايەۆ جاۋاپ بەردى.
"قۇرمەتتى ايدا عالىم قىزى، قايىرلى تاڭ! سىزگە جاعدايدى دۇرىس بايانداماعان سياقتى. ەكى ءتۇرلى ءىستى قاتار قويىپ قاراستىرۋ ونشا دۇرىس ەمەس. بۇل ءىس شىلدە ايىندا قوزعالعان، ال قازتاگ-قا قاتىستى قىلمىستىق ءىس قاراشا ايىنىڭ سوڭىندا، جالعان ساراپتامالار نەگىزىندە جاريالاندى. مۇنداعى زاڭ بۇزۋشىلىقتار شاش ەتەكتەن. "ماسس-مەديا تۋرالى" جاڭا زاڭنىڭ 68-بابى ءبىزدى قورعايدى. سەبەبى رەداكسيا بارلىق ماتەريالدى تىكەلەي باستاپقى دەرەككوزدەن – Freedom Finance-قا قاتىستى ەكى قىلمىستىق ءىس بويىنشا جابىرلەنۋشىلەر مەن ولاردىڭ ادۆوكاتىنان الىپ جاريالادى. قولىمىزدا بەينەجازبالار بار، ال ماتىندە ولاردىڭ سوزدەرى دايەكسوز رەتىندە اينا-قاتەسىز كەلتىرىلگەن. بۇل – ولاردىڭ تىكەلەي ءسوزى. ولار Freedom Finance قىزمەتكەرلەرىنە قاتىستى قىلمىستىق ءىس بويىنشا ءالى كۇنگە دەيىن جابىرلەنۋشى سانالادى. وزگە باق-تاردىڭ كوبىندە جارنامالىق كەلىسىمشارتتار بولعاندىقتان، ولار جابىرلەنۋشىلەرگە ءوز الاڭىن ۇسىنبادى، سول سەبەپتى ولار ءبىزدىڭ رەداكسياعا كەلدى. ال قۇقىق قورعاۋ ورگاندارى ءىستى ءتيىستى دەڭگەيدە تەرگەمەدى. بىزگە قاتىستى ايىپتاۋلاردىڭ بارلىعى تەك ءبىرجاقتى، ايىپتاۋ باعىتىندا قۇرىلعان. وكىنىشكە قاراي، Freedom Finance-تىڭ قازاقستاندا ىقپالى بار ەكەنى بەسەنەدەن بەلگىلى..."، – دەپ جازدى ماتايەۆ ءوز ارناسىندا.
ەسكە سالايىق، بيىل جەلتوقساننىڭ باسىندا Orda.kz رەداكسياسىنىڭ كەڭسەلەرى مەن باس رەداكتور گۇلنار باجكەنوۆانىڭ پاتەرىندە ءتىنتۋ جۇرگىزىلگەن ەدى. باجكەنوۆاعا كورىنەۋ جالعان اقپارات تاراتتى دەگەن ايىپ تاعىلىپ، الماتىنىڭ تەرگەۋ سوتى ونى ەكى ايعا ءۇي قاماققا الدى.
ال قازتاگ اگەنتتىگىنىڭ باسشىلىعى – اسەت ماتايەۆ پەن باس رەداكتور ءامىر قاسەنوۆكە قاتىستى قىلمىستىق ءىس Freedom Finance كومپانياسىنىڭ شاعىمى نەگىزىندە قوزعالعان. Freedom Finance جۋرناليستەردى كومپانيانىڭ الاياقتىق سحەمالارى تۋرالى جازعانى ءۇشىن "كورىنەۋ جالعان اقپارات تاراتتى" دەپ ايىپتاپ وتىر.