اتوم ەلەكتر ستانسياسىن سالۋ بويىنشا رەفەرەندۋم قارساڭىندا وڭىردە ءتۇسىندىرۋ جۇمىستارى قارقىن الىپ كەلەدى. بۇگىن ا.س.پۋشكين اتىنداعى وبلىستىق كىتاپحانادا سالا ماماندارى تۇرعىنداردىڭ ساۋالدارىنا جاۋاپ بەردى.
قازىرگى ۋاقىتتا قوعامدا قىزۋ تالقىلانىپ جاتقان اەس ماسەلەسىنە د.سەرىكبايەۆ اتىنداعى شقتۋ-دىڭ ساۋلەت، قۇرىلىس جانە ەنەرگەتيكا مەكتەبىنىڭ دەكانى، قاۋىمداستىرىلعان پروفەسسور، PhD دوكتورى، ق ر قۇرمەتتى ەنەرگەتيگى ايبەك اقايەۆ تۇسىنىكتەمە بەردى.
«اەس – جاسىل ەنەرگەتيكانىڭ ءبىر ءتۇرى جانە ونىڭ ماڭىزى زور. قازاقستان ۋران قورى بويىنشا الەمدەگى كوشباسشى ەلدەردىڭ ءبىرى بولعاندىقتان، بۇل رەسۋرسىمىزدى پايدالانۋ ماڭىزدى. حالىق اراسىندا نەگە جاڭارتىلاتىن ەنەرگيا كوزدەرىن دامىتپايمىز دەگەن سۇراقتار تۋىنداپ جاتىر. بۇل سالا دا دامىپ كەلەدى، الايدا ونىڭ قۋاتى شەكتەۋلى. مىسالى، جەل ەلەكتر ستانسيالارىنىڭ قۋات كوەففيسەنتى 35%، كۇن ەلەكتر ستانسيالارىنىڭ قۋاتى 18% عانا. ال اەس قۋات كوەففيسەنتى 90%-عا دەيىن جەتەدى، بۇل ونى ءتيىمدى جانە تۇراقتى ەنەرگيا كوزىنە اينالدىرادى»، – دەپ ءتۇسىندىردى ايبەك اقايەۆ.
ونىڭ ايتۋىنشا، اەس سالۋ تەحنولوگيالارىن ۇسىناتىن بىرنەشە ەل بار، جانە سولاردىڭ ىشىندە 4 كومپانيا عىلىمي-تەحنولوگيالىق الەۋەتى نەگىزىندە تاڭدالىپ الىنعان. قۇرىلىس بارىسىندا قاۋىپسىزدىككە ەرەكشە ءمان بەرىلىپ، بۇرىنعى اپاتتاردان ساباق الىنادى. الماتى قالاسىنداعى يادرولىق فيزيكا ينستيتۋتىنىڭ زەرتتەۋلەرى بويىنشا، اەس-تىڭ زيانى وتە تومەن ەكەندىگى دالەلدەنگەن.