سەنات دەپۋتاتتارى، اتوم ەلەكتر ستانساسىن سالۋ جونىندەگى حالىقتىق شتاب مۇشەلەرى الىبەك ناۋتييەۆ پەن ساعىندىق لۇقپانوۆ اتىراۋ وبلىسى، ماحامبەت اۋدانىنا ساپارمەن باردى. ولار بەيبارىس اۋىلىندا ءبىلىم سالاسىنىڭ قىزمەتكەرلەرىمەن كەزدەسىپ، اتوم ەلەكتر ستانساسىنىڭ قۇرىلىسى مەن ونىڭ وبلىس جانە ەل ءۇشىن ماڭىزدىلىعىن تۇسىندىرۋگە باسا نازار اۋداردى.
سەناتورلار اەس قۇرىلىسىنىڭ قازاقستاننىڭ ەنەرگەتيكا سالاسىنىڭ تۇراقتى دامۋىنا عانا ەمەس، ەلدىڭ ەنەرگەتيكالىق تاۋەلسىزدىگىن نىعايتۋعا جانە ەكونوميكاعا وڭ اسەر ەتەتىنىنە توقتالدى. سونىمەن قاتار، اتوم ەلەكتر ستانساسى ەكولوگيالىق تازا ەنەرگيانىڭ سەنىمدى كوزى رەتىندە ماڭىزدى ءرول اتقاراتىنىن اتاپ ءوتتى.
دەپۋتاتتار الەمنىڭ جاڭارتىلاتىن جانە ەكولوگيالىق تازا ەنەرگيا كوزدەرىنە كوبىرەك كوشىپ جاتقانىن، ال اتوم ەنەرگەتيكاسى وسى اۋىسۋلاردىڭ نەگىزگى قۇرامداس بولىگى ەكەنىن ايتتى. ولار اەس كومىرتەكتى ەنەرگيا كوزدەرىنە تاۋەلدىلىكتى ازايتۋ ارقىلى قورشاعان ورتاعا تيگىزەتىن وڭ اسەرىن ەگجەي-تەگجەيلى ءتۇسىندىردى.
سونداي-اق، پارلامەنت دەپۋتاتتارى مەملەكەت باسشىسىنىڭ قىركۇيەكتەگى جولداۋىندا ايتىلعان نەگىزگى ماقساتتار مەن مىندەتتەرگە توقتالىپ، ولاردىڭ ەنەرگەتيكا سالاسىنا تىكەلەي قاتىسى بار ەكەنىن ءتۇسىندىردى. مەملەكەت باسشىسىنىڭ ۇسىنعان دامۋ باعىتتارى ءاربىر سالانى، سونىڭ ىشىندە ەنەرگەتيكالىق سەكتوردى جاڭا دەڭگەيگە كوتەرۋگە باعىتتالعانى ايتىلدى.
دەپۋتاتتار كەزدەسۋ بارىسىندا قاتىسۋشىلاردىڭ بيىلعى قازان ايىندا وتەتىن رەفەرەندۋم تۋرالى سۇراقتارىنا جاۋاپ بەرىپ، ەلىمىزدىڭ ەنەرگەتيكالىق ستراتەگياسىنىڭ بولاشاعى ازاماتتاردىڭ شەشىمىنە بايلانىستى بولاتىنىن اتاپ ءوتتى. ولار تۇرعىنداردى رەفەرەندۋمعا بەلسەندى قاتىسىپ، ءوز داۋىستارىن بەرۋگە شاقىردى.