5 قازاندا ءابىلحان قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيىندە بەلگىلى قازاقستاندىق سۋرەتشى، «قۇرمەت» وردەنىنىڭ يەگەرى، ق ر قولونەرشىلەر وداعىنىڭ ءتورايىمى ايجان بەكقۇلوۆانىڭ 70 جىلدىق مەرەيتويىنا ارنالعان «كاو» اتتى جەكە كورمەسى اشىلادى.
«كاو» كورمەسى ايجان بەكقۇلوۆانىڭ 1990 جىلداردان باستاپ قازىرگى ۋاقىتقا دەيىن جاساعان جۇزدەن استام شىعارماسىن ۇسىنادى. رەتروسپەكتيۆالىق ەكسپوزيسيادا: توقىما، كيىز باسۋ، قاسيەتتى قۋىرشاقتار، زەرگەرلىك اشەكەيلەر، ەتنيكالىق كيىمدەر، سونداي-اق مەتالدان، كەراميكادان، اعاشتان جانە كيىزدەن جاسالعان، باسقا شەبەرلەرمەن جانە سۋرەتشىلەرمەن بىرلەسىپ جاسالعان جۇمىستار ۇسىنىلعان. بۇل جەكە كورمە جيناقتالعان تاجىريبەنىڭ، ءتۇرلى ەلدەردىڭ مادەنيەتتەرىمەن تانىسۋدىڭ، ءتۇرلى تەحنولوگيالاردىڭ كوركەمدىك كورىنىستەرىنىڭ ەرەكشەلىگى تۋرالى كوپ جىلدىق ويلاردىڭ، شىعارماشىلىق ادامدارمەن اڭگىمەلەر مەن سۇحباتتاردىڭ ناتيجەسى. كورمەگە قويىلعان جۇمىستار ونى ۇلتتىق مادەني كودتىڭ گەنەتيكالىق سەزىمىنە نەگىزدەلگەن جانە قازىرگى زاماننىڭ ىرعاقتارىمەن، نىساندارىمەن، بەلگىلەرىمەن، وي ۇلگىلەرىمەن بايىتىلعان وزىندىك اۆتورلىق قايتالانباس ءستيلىن قالىپتاستىرعان دارىندى سۋرەتشى رەتىندە كورسەتەدى، — دەيدى كورمە جەتەكشىسى ا.اقىلبەكوۆا.
ايجان بەكقۇلوۆا الماتىدا دۇنيەگە كەلگەن. 1976 جىلى حالىق شارۋاشىلىعى ينستيتۋتىن قىزىل ديپلوممەن ءبىتىرىپ، سودان كەيىن “قازاقفيلم” كينوستۋدياسىنا كينوكارتينا ديرەكتورى قىزمەتىنە جۇمىسقا ورنالاستى. سەرگەي سولوۆيەۆ، يراكليي كۆيريكادزە، سەرگەي بودروۆ سياقتى كورنەكتى كينوماتوگرافيستەرمەن جۇمىس ىستەدى.
1981 جىلى ماسكەۋدەگى كسرو گوسكينو جانىنداعى بۇكىلوداقتىق كينەماتوگرافيا شىعارماشىلىعى جانە باسشى قىزمەتكەرلەرىنىڭ بىلىكتىلىگىن ارتتىرۋ جوعارى كۋرسىن اياقتاپ، كينوستۋدياداعى جۇمىسىن جالعاستىردى. 1993 جىلى ت.جۇرگەنيەۆ اتىنداعى تەاتر-كوركەمسۋرەت ينستيتۋتىن «مونۋمەنتالدى توقىماشىلىق» ماماندىعى بويىنشا ءبىتىردى. سول جىلدان ول «شىعارماشىلىق باستاماشى ايەلدەر ليگاسىنىڭ» بىرلەسكەن ۇيىمداستىرۋشىسى جانە ۆيسە-پرەزيدەنتى بولدى. ليگا بۇگىنگە دەيىن ءتۇرلى سالالاردا ايەلدەردى الەۋمەتىك قولداۋ جانە ءبىلىم جەتىلدىرۋ ماسەلەلەرىمەن اينالىسىپ كەلەدى.
2003 جىلدان ايجان «Our Heritage» (ءبىزدىڭ مۇرا) قوعامدىق قورىنىڭ پرەزيدەنتى رەتىندە قوعامدىق قىزمەتتەر اتقاردى. قوردىڭ نەگىزگى مىندەتى - قازاقستان قولونەرىن جاڭعىرتۋ، ساقتاۋ جانە دامىتۋ.
2005 جىلى «Our Heritage» قوعامدىق قورىنىڭ اتىنان ق ر مادەنيەت مينيسترلىگىمەن، UNESCO جانە ەۋرازيا قورىمەن بىرلەسىپ، شيەۆرون، KCell ت.ب. كومپانيالاردىڭ قارجىلىق قولداۋىمەن «قازاقستاندا قولونەردى دامىتۋ جانە حالىق كوركەمونەر كاسىپشىلىگىن جاڭعىرتۋ» تاقىرىبىمەن قولونەردى دامىتۋ جونىندەگى ۇلتتىق باعدارلامانى ازىرلەۋ ماقساتىندا اتالمىش باعدارلامانىڭ قازاقستاندىق ۇيلەستىرۋ كەڭەسىن قۇردى. قولونەرشىلىكتى دامىتۋ جونىندەگى ۇلتتىق باعدارلاما قۇرىلعاننان كەيىن «Our Heritage» قورى ونى ىسكە اسىرۋعا كىرىستى. استانادا ۇيىمداستىرىلعان قولونەرشىلەردىڭ ءى حالىقارالىق كونفەرەنسياسىنا 150 دەلەگات قاتىستى، ولار ءۇشىن قور بيزنەس نەگىزدەرى، ماركەتينگ، قازاقستاننىڭ ءداستۇرلى قولونەرى - زەرگەرلىك ونەر، كيىز، اعاش ويۋ، كەستە تىگۋ، كىلەم توقۋ بويىنشا قازاقستاننىڭ وسكەمەن، قاراعاندى، استانا، شىمكەنت، اقتوبە، اقتاۋ، الماتى جانە ت.ب. قالالارىندا وقىتۋ سەمينارلارىن ۇيىمداستىرىپ وتكىزدى.
ايجان بەكقۇلوۆا 2009 جىلى «شەبەر» قازاقستاندىق شەبەرلەر فەستيۆالىنە باستاماشى بولدى. بايقاۋ قولونەرشىلەردىڭ شەبەرلىگىن، قولونەر بۇيىمدارىنىڭ ساپاسىن ارتتىرۋعا، ۇمىت قالعان تەحنولوگيالار مەن قولدانبالى ونەر تەحنيكالارىنىڭ اسسورتيمەنتىن كەڭەيتۋگە جانە جاڭعىرتۋعا ىقپال ەتتى. ال 2012 جىلى قازاقستان قولونەرشىلەر وداعىن قۇردى، ول ءقازىر وزىمىزدە عانا ەمەس، ەلىمىزدەن تىس جەرلەردە دە ەلەۋلى مارتەبەگە يە قوعامدىق ۇيىم.
2013 جىلدان باستاپ ايجان بەكقۇلوۆا قازاقستان قول قويعان ماتەريالدىق ەمەس مادەني مۇرا تۋرالى يۋنەسكو كونۆەنسياسىنىڭ اياسىندا ماتەريالدىق ەمەس مادەني مۇرا جونىندەگى ۇلتتىق كوميتەتتىڭ (مۇك) مۇشەسى جانە ساراپشىسى بولىپ تابىلادى. ايجان كوپ جىلدار بويى قازاقستاندا جانە ەلدەن تىس جەرلەر - فرانسيادا، گەرمانيادا، اقش-تا، قىتايدا، ءۇندىستاندا جانە باسقا دا كوپتەگەن ەلدەردە فەستيۆال، كورمە مەن كونكۋرستاردىڭ كۋراتورى جانە ۇيىمداستىرۋشىسى رەتىندە بەلسەندى قىزمەت اتقارىپ كەلەدى. قازىرگى ۋاقىتتا ايجان ءداستۇرلى جانە قازىرگى زامانعى ساندىك-قولدانبالى ونەر بويىنشا ساراپشى، قازاقستاننىڭ قولونەرشىلىگى بويىنشا ماقالالاردىڭ ۇيىمداستىرۋشىسى، سپيكەرى، كۋراتورى، جاتتىقتىرۋشىسى جانە اۆتورى. سونداي-اق ستۋدەنتتەر مەن وقىتۋشىلار، كاسىبي شەبەرلەر ءۇشىن قازاقستان، تۇرىكمەنستان، قىرعىزستان جانە باسقا دا ەلدەردە قازاقستاننىڭ قولونەرى مەن ونەرىن تانىمال ەتۋ ماقساتىندا كوپتەگەن حالىقارالىق كونفەرەنسيالاردا، سيمپوزيۋمداردا، فورۋمداردا قىزمەت اتقارادى.
— مەن ءارقاشان ەرەكشە ادامداردى كەزدەستىرۋ باقىتىنا يە بولدىم. ولار الەمگە جانە جەكە ومىرگە دەگەن مەنىڭ كوزقاراسىمدا شەشۋشى ءرول اتقارادى. كىسىنى تاڭ قالدىراتىن، شابىتتاندىراتىن، قۋانتاتىن جانە دۇنيەتانىمىن وزگەرتەتىن ول - ادامدار. ولار ۇيرەتەدى، اقىل-كەڭەس بەرەدى، ءسىزدىڭ پىكىرىڭىزدى سۇراپ، ءوز ويىمەن بولىسەدى. مەنىڭ جەكە كورمەم – ماعان كوڭىل بولگەن، قارىم-قاتىناس، قۋات بەرگەن، تەك جاعىمدى سەزىمدەر عانا ەمەس، سونىمەن بىرگە شىعارماشىلىعىما قۇشتارلىق سىيلاعان ادامدارعا بىلدىرگەن ۇلكەن العىسىمنىڭ بەلگىسى. مەنىمەن بىرگە شىعارماشىلىق ىنتىماقتاستىقتا جۇمىس ىستەگەندەرگە راحمەت، — دەيدى ايجان بەكقۇلوۆا.