الماتى اكىمدىگى قالانىڭ جاسىل جەلەك قورىن ساقتاۋ مەن دامىتۋعا الەۋمەتتىك جاۋاپتى بيزنەستى تارتۋ باعىتىنداعى جۇمىستى جۇيەلى تۇردە جالعاستىرىپ كەلەدى.
وسى جولى مەگاپوليستە ەڭ ماڭىزدى تابيعي نىسانداردىڭ ءبىرى باۋم اتىنداعى توعايدى اباتتاندىرۋ جوباسى قولعا الىندى. يگى باستاما قۇرىلىس سالاسىندا تانىمال BAZIS-A كومپانياسىنىڭ قولداۋىمەن جۇزەگە اسادى. كومپانيا بۇل ماقساتقا 4،7 ملرد تەڭگە ءبولىپ وتىر.
باۋم توعايى — الماتىنىڭ «وكپەسى» اتانعان، اۋماعى 137،7 گەكتار بولاتىن بىرەگەي ورمان القابى. بۇل جەر قالاداعى سيرەك ساقتالعان تابيعي لاندشافت پەن الۋان ءتۇرلى اعاش تۇرلەرىن بويىنا سىيدىرعان قۇندى جاسىل ايماق سانالادى. توعاي الماتىنىڭ بيوالۋاندىعىن ساقتاپ، قولايلى ميكروكليمات قالىپتاستىرۋدا وراسان ءرول اتقارادى.
اباتتاندىرۋ جوباسىنىڭ ماقساتى ەكوجۇيەگە زيان كەلتىرمەي، دەمالىس پەن سەرۋەنگە ارنالعان ينفراقۇرىلىمدى ۇقىپتى ەنگىزۋ. جۇمىستار تابيعي ورتاعا ارالاسۋدى بارىنشا ازايتۋمەن، جەر بەدەرى مەن اعاشتاردىڭ تامىر جۇيەسىن جانە جاسىل جەلەكتىڭ تابيعي قالپىن ساقتاي وتىرىپ جۇرگىزىلەدى. جوبا اياسىندا شاعىن ساۋلەتتىك پىشىندەر ورناتىلادى، تىنىشتىق پەن تابيعي ۇندەستىكتى ساقتايتىن سەرۋەن جولدارى مەن دەمالىس ايماقتارى جاسالادى.
توعاي اۋماعىن تابيعي ەرەكشەلىكتەرىنە قاراي دۇرىس ايماقتارعا بولۋگە ەرەكشە كوڭىل بولىنبەك: ءبىر بولىگى تىنىش دەمالىسقا ارنالسا، ەكىنشى بولىگى ەكولوگيالىق ايماق رەتىندە ينفراقۇرىلىمى شەكتەۋلى كۇيدە قالىپ، تابيعاتتى قورعاۋ مەن ەكولوگيالىق اعارتۋعا باعىتتالادى. مۇنداي ءتاسىل قالا تۇرعىندارىنا الىپ شاھاردىڭ ىشىندە تابيعاتپەن ۇيلەسىمدى ءارى ۇقىپتى قارىم-قاتىناس جاساۋعا مۇمكىندىك بەرەدى.
باۋم توعايىن اباتتاندىرۋ قالا ورمانىن قورعاۋ مەن ورنىقتى قالا ورتاسىن قالىپتاستىرۋ جولىنداعى ماڭىزدى قادام بولماق. الماتى اكىمدىگى الداعى ۋاقىتتا دا الەۋمەتتىك جاۋاپكەرشىلىگى جوعارى بيزنەستى قالا اۋماعىن كوگالداندىرۋعا، تابيعي ايماقتاردى قورعاۋعا جانە تۇرعىنداردىڭ جايلى ءومىر سۇرۋىنە باعىتتالعان باستامالارعا تارتۋ جۇمىسىن جالعاستىرا بەرەدى.