الماتى قالاسىندا سىبايلاس جەمقورلىققا قارسى سانا قالىپتاستىرۋ جۇمىستارى جالعاسۋدا.
الماتى قالاسى بويىنشا سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنىڭ باسشىسى ارمان راحيموۆتىڭ ايتۋىنشا، جىل باسىنان بەرى 66 ءىس-شارا وتكىزىلىپ، 5،5 مىڭنان استام ادام قامتىلعان، دەپ حابارلايدى aqshamnews.kz.
«سىبايلاس جەمقورلىققا قارسى مادەنيەتتى قالىپتاستىرۋ — بىزدەگى باستى باسىمدىقتىڭ ءبىرى. ءبىز الدىن الۋ، اعارتۋ جانە ازاماتتىق جاۋاپكەرشىلىككە ەرەكشە ءمان بەرەمىز»، — دەدى ول وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسىندا.
مەملەكەتتىك ينستيتۋتتتارعا دەگەن سەنىمدى كۇشەيتىپ، ادال ءارى ءادىل بولۋدىڭ ماڭىزىن ارتتىرا ءتۇسۋ ءۇشىن، بۇل ماسەلەدە «زاڭ مەن تارتىپكە» كوبىرەك ارقا سۇيەۋ ماڭىزدى.
ارمان راحيموۆتىڭ ايتۋىنشا، «سىبايلاس جەمقورلىققا قارسى ۆولونتەرلىك» جوباسى اياسىندا الماتىدا 262 ەرىكتى جۇمىس ىستەيدى. ولار 34 كەزدەسۋ وتكىزىپ، جاستاردى ادالدىققا، زاڭعا باعىنۋعا ۇندەۋدە.
«بۇل جوبا جاستار اراسىندا اشىقتىق پەن ادىلەتتىلىك قاعيداتتارىن ناسيحاتتايتىن ءتيىمدى الاڭعا اينالدى»، — دەپ اتاپ ءوتتى ول.
ونىڭ سوزىنشە، بەلسەندى ازاماتتاردى ىنتالاندىرۋعا ەرەكشە كوڭىل بولىنەدى. بيىل سىبايلاس جەمقورلىق فاكتىلەرى تۋرالى حابارلاعان ەكى ادام 1،2 ميلليون تەڭگە كولەمىندە سىياقى العان.
«بۇعان بەي-جاي قاراماي، وسى ىسكە وزىنشە ۇلەس قوسىپ جۇرگەندەرگە العىسىمىز شەكسىز. 2024 جىلى بارلىعى 9 ازامات ماراپاتتالىپ، ولاردىڭ التاۋى 5،2 ميلليون تەڭگە كولەمىندە اقشالاي سىياقى الدى»، — دەدى دەپارتامەنت باسشىسى.